آذربایجان

اؤگون كی من گؤز آچدیم آنام دانیشدی توركی
اؤگون كی من دیل آچدیم آتام دانیشدی توركی
اؤگون كی آدیم آتدیم بابام دانیشدی توركی
اؤگون كی من ساواشدیم باجیم دانیشدی توركی
..........
مكتبه من گئدنده دیلیم قالیبدی باغلی
ائشیددیم توركونو دئدی اؤخو فارسینی
هارای لارام آچیلسین مدرسه ده اؤخولسین
من دیلیمی ایستیرم اؤزگه دیلین سئومیرم

 استاد كريمي مراغه اي

قیش چیخدی گزیر کوچه نی بو تازه جوانلار

یوخ یوخ نه جاوان درس تمدن اوخویانلار

چون مدرسه قورتولدی چیخوب ائیله تماشا

چارراه خیاباندا دوشوب گؤر نئجه غوغا

قیزلار کی چیخور مدرسه دن خیلی دل آرا

نازیله گئدیر منزله گویا که مارالدی

بیردن گوروسن آتدیلار بمب رنگی سارالدی

بو بوینی یوغون قانمور اوشاقدور چوخی قورخار

یا حملی وار آرواددی جانیم زحمتی آرتار

یا تریکی دور نعشه قاچار معرکه فالخار

ظاهرده موحصلدی اوزی اهل کمالدی

لیکن کافی تشبیهدی لاب او مالدی که مالدی

چارشنبه سوریده اولوبدور بئله مرسوم

بو رسملری واجب ائدوبدور ننه کلثوم

تصدیق ایلیوب چوخلارینی زینب پاشا مرحوم

بیر ساعت اوتور دقتیله ائیله تماشا

بیر بیر او یازان رسملری ائیلیوم انشاء

اولسون شب چارشنبه گرکدور هامی دلشاد

چیخسونلار داما قیز گلین اوغلان کیشی آرواد

هر دامدا گرگ اود یانا اولموش بئله ایجاد

قیزلار اونون اوستوندن او ساعتده آتیلسون

اما آتیلاندا دییه جاق بختیم آچیلسون

دامدان ائیله کی اندیلر قورتولدی تماشا

بیر مجمعه خوش شب چره ائیلر مهیا

خورما یمش ایگده سوجوق و فخری و حلوا

بیر عیده خانیم قلبیده بیر نیت ایده رلر

گیزلینجه قولاق آسماقا جدیت ایده رلر

شال ساللاماقا بعضی ایدر شوقیله رغبت

باغلاللار انون شالینه هر شیدن اوساعت

خوش یمن اولار گر دولما پیشیرسه شاما آرواد

شامدان صورا بیر آز بادام اویناللا یاتاللار

آرواد کیشی هر تک تکی مقصوده چاتاللار

بير باخيشلا مني سن زار و پريشان ائله دين

عاشيقين اولدوم اماقلبيمي ويران ائله دين

 عالمه اولموشودوم شهره سني سئومگيله

بي وفاليخلا بوتون دونياني حيران ائله دين

جان بهاسينه سنین عشقيوي آلميشديم اما

بيلمدين قدريمي سن عشقي چوخ ارزان ائله دين

عمرومي دونيامي عشقين يولونا گويمشديم

گئتمه يين له نه گوزل هر شي يي جبران ائله دين

«منصور » ی عاشیق اولوب سئومگه پشمان ائله دین

منصور مصطفائی فر

 

http://youldashlar.blogto.ir/

http://youldashlar.blogto.ir

http://youldashlar.blogto.ir/

http://youldashlar.blogto.ir/

وطنداش ! نه گوزه ل سسله نیر بو سؤز
یعنی بیر وطنین اولادیییق بیز
آنامیز عینی دیر قارداشیق دئمک
من سنه آرخایام ، سن منه کؤمک

وطنداش ! نه گو‍‍‍‍‍‍ٔزه ل سسله نیر بو سؤز
یعنی ایکی جاندا بیر اوره ییک بیز
گوجسوزوک ، بیز هئچیک سن ده ، منده ، تک
وطنه گووه نیب اولدوق وطنداش
منیم اوره گیمی قاناتسین گره ک
سنین دیرناغینا دگن چیرتماداش

وطنداش ! نه گو‍‍‍‍‍‍ٔزه ل سسله نیر بو سؤز
یعنی بیر اقلیمده بؤیوموشوک بیز
سنی ده ، منی ده بؤیودن وطن
سنه ده آنادیر منه ده آنا
سنده جواب ده سن ، منده هر زمان
واحدآنامیزین خوشبختلیغینا

وطنداش ! نه گو‍‍‍‍‍‍ٔزه ل سسله نیر بو سؤز
یعنی بیر قایناقدان سو ایچمیشیک بیز
او سو قلبیمیزده جوشدو قاینادی
عینی بیر آد ایله تانیتدی بیزی
وطنین عنوانی وطنین آدی
بیزه خاطیرلاتدی وظیفه میزی!

وطنداش ! نه گو‍‍‍‍‍‍ٔزه ل سسله نیر بو سؤز
وطن ابدی دیر گئده ر گییک بیز
انسان قدرتلی دیر اؤز وطنینده
بيليريك دونیایا بیز نییه گلدیک
او بیزی یارادان بیز اونا بنده
یارادان اوغروندا اؤلمه یه گلدیک

 

                                        « بختیار وهاب زاده »

بیزی یاندیریر ، یامان آیریلیق                    بو داریخدیران دومان آیریلیق
باشا ساووریر سامان آیریلیق                      آمان آیریلیق ، آمان آیریلیق

بیر گؤزون آچار ، بیر گؤزون یومار                      آرازی سرین گؤردیکده اومار
خزری درین گؤردوکجه جومار                    قان دریاسینا جومان آیریلیق

                             آمان آیریلیق ، آمان آیریلیق

آرازیم وورسون باش ، داشدان داشا                    گؤز یاشی گرک باشلاردان آشا
نئجه یاد اولسون ، قارداش - قارداشا                        نه دین قانیر ، نه ایمان آیریلیق

                             آمان آیریلیق ، آمان آیریلیق

گؤیلرین ، گونون - آیین گیزلدیر                      اولدوز آخدیریر ، سایین گیزله دیر
اوخونی آتیر ، یایین گیزلدیر                         قدیمی ائدیب کمان آیریلیق

                             آمان آیریلیق ، آمان آیریلیق

آیریلیق گله ، بیر کرم قیلا                         بیر نئچه گون ده ، بیزدن آیریلا
غم ده بیز تک سووا ساوریلا                          هانی بیر بئله گومان آیریلیق
                             آمان آیریلیق ، آمان آیریلیق

دئدیم آیریلیق ، قیناما منی                          سنی گؤرموشم ائللر دشمنی
یوزمین کره ده سیناسام سنی                         همان آیریلیق ، همان آیریلیق

                             آمان آیریلیق ، آمان آیریلیق

آمانسیز گؤزون یومان آیریلیق                         جان جیزلیغیندان اومان آیریلیق
نه غملی یازار (دومان) آیریلیق                          دیللره سالان دومان آیریلیق

                             آمان آیریلیق ، آمان آیریلیق

سن اونودسان دا(سلیمان) منی                          اونودمیاجاق «شهریار» سنی
یاز گله ر ،بولبول قاپسار چمنی                        ایندی لیک سه وسون زمان آیریلیق

                             آمان آیریلیق ، آمان آیریلیق

هر دورد فصیل واریدی  ، آنامین یایلیغیندا

آرتیقدا باهارایدی ، آنامین یایلیغیندا

سارا آیدین خیاللی ، هجر مینیردی آتا

دانیشان نیگار ایدی ، آنامین یایلیغیندا

دووار قانلی عابباسین ماهنی سی گول له نیردی

گولگزده خومار ایدی ، آنامین یایلیغیندا

اولاییردی قوردوموز ، تانینیردی یوردوموز

بیر اودلو دیارایدی ، آنامین یایلیغیندا

سریه نین شرفی ، دهشت قارانلیقیندا

ییرمی بیر فنارایدی ، آنامین یایلیغیندا

تومروسون قیزی گره ک اوز وئرمه سین اوزگه یه

قئیرت بیر دوواریدی ، آنامین یایلیغیندا

شدده سینی چکنده ، آتامادیل توکنده

محبت قاتارایدی ، آنامین یایلیغیندا

باغلایاندا باشینا آرتیق گؤزه ل له شردی

گورونن ویقارایدی ، آنامین یایلیغیندا

آنام بیزه پایلادی ، گنجه پایلی بوقچاسین

گؤزلر اینتیظارایدی ، آنامین یایلیغیندا

 

یاریم اولسون ، یار اولسون «داغلی» منده بیر قیزا

وئردییم ایلقارایدی ، آنامین یایلیغیندا

سید رضا بنی فاطمه «داغلی»

تعريف ائله سه لر ايگده آغاجين

دئسه لر كي اوُِِلاردوز ، اينانمارام

هر كيمسه داشييار اؤز ذاتين آخير

شه كه ره چئوريله دوز اينانمارام

*************************

قيشين قاري اؤلار يازيندا ياغيش

هر يئتنده ن اؤلماز اوماسان باغيش

قئسير اينه ك وئرسين هارادان ساغيش

بيتيرسه قلمه قؤز ، اينانمارام

*************************

« آي داغلي » مرد اؤلان ائليني آتماز

آلداتماز طاماحا ،‌سوده سو قاتماز

قولدور قاباقيندا ميمون اويناتماز

يانديرماز دئسه لر كؤز ، اينانمارام

                                سيد رضا بني فاطمه «داغلي»

آغیر اؤلوب یامان داشیم

دیلیمد ه ن آغری یر باشیم

چیخاردیر گؤزومو قاشیم

باخ ائی دونیامیزا باخ ائی

*********************

اؤزومونکو اؤلوب اؤزگه

اؤزلویونه اؤلوب په زگه

قارا تئلیم اؤلوب گیزگه

باخ ائی دونیامیزا باخ ائی

*********************

زامان اؤلوب لاپ اؤیونجوق

ارککله نیر منه قانجیق

"داغلی گویلوم" اؤلور خینجیق

باخ ائی دونیامیزا باخ ائی

هارای باهاریدیر ، اوره ییم هارای

دیله گه ل گوللنسین دیله ییم هارای

چال توپا قیلینجی ، کس آلما کیمی

یوخسا کسیلرسن بیله ییم هارای

آشیق اوُل آشیق اوُل ، آشیق اوُل اشیق

ائله یاراشیق اوُل مله ییم هارای

کوله ک میدانی دیر ، چینار اول چینار

اَییلمه اَییلمه کوره ییم هارای

هارایلا قئیرتی ، قورقود اوُل قور اوُل

هارای باهاریدیر اوره ییم هارای

قوپوز دوشومده كئچيره م

ايستييه نين ساغليغينا

ماهني ماهني هوم ايچيره م

ايستييه نين ساغليغينا

**************************

باشيمدا وار ائل هاواسي

سارا دييه سئل هاواسي

بيرجه ساري تئل هاواسي

ايستييه نين ساغليغينا

**************************

اركيم اولسا ، اركه اولار

باشيمداكي بؤركه اولار

اؤز ائليمه ، توركه اولار

ايستييه نين ساغليغينا

گوزون آلدين گوزومدن ، مهربانليقدان نه تئز دويدون!

  مني قوودون او قلبيندن قوناقليقدان نه تئز دويدون

سيلينديم سينه دن ، تئلدن ، آديم دوشدو شيرين ديلدن

يولوب زولفوم يئله وردين ، قارانليقدان نه تئز دويدون

آجي حسرت مني الدن سالاجاغميش ، نييه گلديم

 ساچيمي غملي كولكلر يولاجاغميش ، نييه گلديم

او سنين دويغولو باغرينداكي آتش منه بنزر

 آلووم داغلارا وولكان اولاجاغميش ، نييه گلديم؟

يار گلمه دي قوينومداكي قولاردا يورولدو

گزديم اوقد ه ركؤلگه لي كوللاردا يورولدو

گوز يولدا ، آياق يولدا اوره ك ياردا امانت

  يولدان يولا دؤندوم داخي يولاردا يورولدو

****************************************************************************

 

 آجی حسرت منی الدن ، نییه گلدیم

                                                              ساچیمی غملی کولکلر یولاجاغمیش ، نییه گلدیم

او سنین دویغولو باغرینداکی آتش منه بنزر
 

                                                              آلووم داغلارا وولکان اولاجاغمیش ، نییه گلدیم ؟   

 

*****************************************************************************   

 

 یار گلمه دی قوینومدا کی قوللاردا یورولدو

                                                              گزدیم اوقده ر گولگه لی کوللاردا یورولدو

گوز یلدا ، آیاق یولدا ، اوره ک یاردا امانت

                                                              یولدان یولا دوندوم داخی یوللاردا یورولدو

              «« نگار خياوي »»

گولور آمما دوداغیندان گولوش آغلار گویه ریر
آغلاییر آمما بنوٍوشه دولو باغلار گویه ریر
سوسور آمما باخیشیندان بایاتی دامجیلاییر
سوسور آمما بوغازیندان بوغاناقلار گویه ریر

****************************

****************************

بير گون مني قانداللاياجاقلار، کئفيم اولسون!

دوستاقلارا پاي يوللاياجاقلار، کئفيم اولسون!

 

آرخامدا چوخور باختيما نيسگيل دولاجاقدير

کؤلگه‌مده اؤلوم ياللاياجاقلار، کئفيم اولسون!

 

سو دئيبدير منه اولده آنام آب كي يوخ                               يوخو اوئرتدي اوشاقليقدا منه ،خواب كي يوخ

ايلك دفعه كي چوره ك وردي منه،نان دئمه دي                    ازليندن منه دوزدانه ، نمكدان دئمه دي

آنام اختر دئمييبدير منه ، اولدوز دئيب او                             سو دوناندا دئمييب يخدي بالا ، بوز دئييب او

قار دئييب ، برف دئمييب ، ال دئييب او                               منه هئچ وقت بيا سويله مه ييب ، گل دئييب او

ياخشي خاطير لاييرام ياز گونو ، آخشام چاغيلار                   باغچانين گون چيخانيندا كي ايلك گون ياييلاندا

گه ل دئييردي داراييم باشيوي اي نازلي بالام                       گلمه سن گرباجيوين آستاجا زولفون دارارام

او دئمزدي كي ، بيا شانه زنم بر سر تو                              گر نيايي بزنم شانه سر خواهر تو

بلي ! داش ياغسادا گويدن ، سن اوسان منده بويام             وار سنين باشقا آنان ، واردي منيم باشقا آتام

اوزومه مخصوص اولان باشقا ائليم واردي منيم                      ائليمه مخصوص اولان باشقا ديليم واردي منيم

ايسته سن قارداش اولاق ، بير ياشياق ، بير ليك ائده ك         وئر گينن قول-قولا بوندان سورا ، بير يولدا گئده ك

اولاً اوز گه كولكلرله گرك اسميه سن                                 ثانياً وارليقما ، خلقيمه خورباخمياسان

يوخسا گر زور دييه سن ، ميلتيمي خوار ائده سن                 گون گلر صفحه چونر ، مجبور اولارسان گئده سن


«««««««محمد تقي زهتابي»»»»»»»

داغام ئیل قوجاقیندا

کؤزه م مرد اوجاقیندا

یوخسول ائو بوجاقیندا

یایدا بوز شاعیری یم

*********************

شعیریم ائلین سوزودی

آخار سئلین سوزودی

کسگین دیلین سوزودی

من ، قوپوز شاعیری یم

*********************

وطن باغری مین بندی

دوغما یوردوم "اور" کندی

وار بوینومدا کمندی

چؤره ک - دوز شاعیری یم

                                                            سیّد رضا بنی فاطمه

حیله دونیاسیندا ، یالان ایچینده

آخی دوستوم قوجالماییم نئیله ییم

آدام یوخ ! آغیلی ایلدن ایچینده

آخی دوستوم قوجالماییم نئیله ییم

*******************************

شیرین دانئششانین ، اوره گی آجی

باخیر بیربیرینه یولداش قیقاجی

قارداش داشا دؤنوب ، باج آلیر باجی

آخی دوستوم قوجالماییم نئیله ییم

********************************

باشیم آغری چکیر ، دیلیمین اوسته

آرزی مین اؤلوسو الیمین اوسته

ائل دردی ، دوز یوکی بئلیمین اوسته

آخی دوستوم قوجالماییم نئیله ییم

اوبا کؤچوب یورد اولاییر

قوزقون گودور قورد اولاییر

دردلی سوسوب درد اولاییر

هوروت – هوروت باخیر داشلار

داشا دؤنوب سانکی باشلار

 

دیل دایانیب گؤز دانیشیر

خیالیمله سؤز دانیشیر

من بیرمسه یوز دانیشیر

هوروت – هوروت باخیر داشلار

باش ایاقدی بوردا، باشلار

 

یاغمور یاغیب یئر قوخویور

هؤرومجکلر تور توخویور

من آغلیرام یئل، اوخویور

هوروت – هوروت باخیر داشلار

کیم کیمه دیر، آ یولداشلار

 

توپراقلاری قاتمیش اینسان

 سئوگیلیسین آتمیش اینسان

سون دوراغا چاتمیش اینسان

هوروت – هوروت باخیر داشلار

اوز ایچیندن آخیر داشلار

 

من گئدیرم یول دایانیر

دول بوشالی قاتارلانیر

بیلمزایدیم، داشدا قانیر

هوروت – هوروت باخیر داشلار

داشدان آخیر، قانلی، یاشلار

تانيميرسان مني سن ؟

 

گئت مني ، داغداكي داشدان خبر آل

 

مني آيري، ساليب آنلين يازيسي،

 

                                       داغلاردان

 

من اوجا داغلارين اؤ

               

                         پارچالانان سيرداشييام

 

باخما ايندي جوان اوغلانلارا من ،

 

                                          باش داشييام

ساوالانين داشييام؛

 

يادا گل

 

كيمليگيمي

 

              گؤزده كي ياشدان خبر آل

 

من اؤ صحرالري آباد ائلييه ن گؤز ياشييام

 

من آراز قارداشييام

 

چيرپينير ائل غمي هي، سينه م ايچره دالغالانير

 

سينديرير سدلري بيرده ن

 

                               كاغاذ اوسته جالانير

 

بيت لر بير بيرين اوسته قالانير

 

من اؤ ديللرده قالان شهريارين، يولداشييام 

 

" تايسيزام"

 

من بير آز اوندان ناشييام .

                                               بهنام شاه نعمتي(تايسيز)

اورگیم آغلاییر، گؤزلریم دولور

هر زامان گؤرنده شور گؤلیمیزی

بیر عمور توتوبدی الیند ه ن ائلین

ایندی سه اَل آچیب گؤزله ییر بیزی

 

بیر زامان واریدی شهرتی شانی

عرشه چاتدیرمیشدی آذربایجانی

بو همان دنیزدی چکیلیب قانی

آز قالیر قوریا، قالمیا ایزی

 

چاره سیز دنیزه چاره قیل وطن

آغلا، گؤز یاشیوی تؤک دنیزه سن

دوزلارین ایله ییب اینینه کفن

قیزاریب دنیزین ماوی بنیزی

 

عثمانین یومروغو، کاظیمین داشی

قؤیمارام کسیلسین گرزومون یاشی

کسیلسه جان وئره ر خزر قارداشی

بیر داها گؤره نمز اورمو، دنیزی

 

اورمیه، اردبیل، زنجان، همدان

جیغاتی، تاتائو، سهند، ساوالان

یاندیریر اؤلکه نی حسرتله هیجران

دیغلادیر آیریلیق قؤجا تبریزی

---

   من ده توستو له ییب آلیشدیم یاندیم          آلوووم سؤنسه ده، کؤزوم قالاجاق...

قارا یئل ده اسسه سؤندورسه منی             کولومو داغیتسا، توزوم قالاجاق

پرده-پرده کولوم بیر کتاب اولسا                   عالمه یاییلیب سؤزوم قالاجاق

یانمادیم اؤزومه یاندیم ائل اوچون                یانان اوره کلرده سوُزوم قالاجاق

دونیادا آختاردیم گؤزللر ایزین                       گؤزللر ایزینده گؤزوم قالاجاق

بیر یئنی یول سالدیم یالقیز آد قویدوم           گئتسم ده بو یول دا ایزیم قالاجاق...

از کتاب "جیغیر-باغیر" ص ۱۱۶

---

"ایکی جان آواره سی"

بیر قانلی اوره ک چیرپینیری قان آراسیندا

                                                       ویرنیخمادادیر قالمیش ایکی جان آراسیندا

هجرانه دؤزوب یا کی چالیشسین چاتا وصله

                                                        آواره قالیب وصل ایله هجران آراسیندا

چوخ جان آتیری جانینی جانانه یئتیرسین

                                                         سین_ سین گزیری عالم امکان آراسیندا

فکریم یول ایتیرمیش غریب آواره دی سانکی

                                                          حیران دولانیر برّ و بیان آراسیندا

گون باتمیش اذان دیر دئیه سن قاش قارالیبدیر

                                                         یول اَیریمی بیر قورخولو اورمان آراسیندا

ال اوزمه لی یَم یا یئنه ده دؤزمه لی یَم من

                                                          تدبیر قیلین بو ایکی بحران آراسیندا

بیر خیردا گیلایه یئکه لیر اولسون عداوت

                                                           بیر عؤمر یئر ائتسین ایکی جانان آراسیندا

جاندا دا مایا قویمالی اولساق یئری واردیر

                                                         تا صلح یارانسین بوتون انسان آراسیندا

یوخ غصه سی بیر گون ده کوسولسه دوشونن دوست

                                                         لازم دی اوموب_ کوسمه ده خوبان آرسیندا

بیر سام یئلی اسجک او کی بیزدن الین اوزدو

                                                         اوندان نه اوماق قورخولو طوفان آراسیندا

حق وئرمه لی ییک حق لی یه هر کیمسه اولا حق

                                                          زور قانونو جنگلده دی حیوان آراسیندا

نقد اولسادا آنجاق ائله دوزگون گرک اولسون

                                                          بیر کلمه ده هئچ اولمایا بهتان آراسیندا

بهلول کیمی من ده آغاجی اَت کیمی سوردوم

                                                         هارون لارا سؤز ساپلادیم عنوان آراسیندا

بیر گون گله جک یالقیز آدین قالمیش اؤزون یوخ

                                                         ائللر دئیه جک آدینی دستان آراسیندان

سندن قالاجاق قالسا بو اوچ یئرده نشانه

                                                         آرشیو ایله ویترین ایله دیوان آراسیندا

شاید ده سنین شکلینه هیکل یوناجاقلار

                                                           ائللر گؤره جک شهرده میدان آراسیندا

                                                                                                          یالقیز

---

آی بو جهانی خلق ائده ن،لطف ائله بیر جهانه باخ

جانه گلیبدی بنده لر،بیر زادی ائت بهانه ، باخ

من بیلیرهم یؤرولموسان،دونیا دایانسا دورموسان

لـیـک دوشـن اَیاقــیـدان،بـنـده ی نـاتـوانـه بـــاخ

گوندوز ایشیقدا جورلوسن،بؤینو یؤغونلارین ایشین

بـؤیـنـودا قـیل کـیـمـیـنـلـرین ایـشلـریـنه شـبانه باخ

وار نه قدر بـو حـالـیـمـیز،قـاره دی روزگـاریمـیـز

آنـد ایـچـیـریک یالان سنه،بـیزده اؤلان ایمانه باخ

هاممی دئیر کی من دوزه م،بیلمیره م ایری کیمدی بس؟

بیربئله ایری ایشـلـری،کـیــم گـؤرورو یالانه بــاخ

اؤرو پیشیک ده کوفته نی،یئییر،دئییر به بیلمیسن

تئز سیلیر آغزی بورنونو،یاغلی دؤداغ ،دهانه باخ

الـلـی،ایـاقـلیـلار قـاپـیـر،یاغـلی دیـلی اؤلان تاپـیـر

ال سـیز ـ ایاقـسیز اؤرتادا،غارت اؤلور ،تالانه باخ

صلح سئویرسن آی کیشی ،قؤیما نفاق تؤره لده لر

خلـق آراسـیـنـدا بـیـر بـئـله فـیرتانالار سالانه باخ

اوستونه صافلارین قؤیان،آلتینا زیر زیبیل باسان

چؤمچه سینی ووران زامان،گل بو سؤغان ساتانه باخ

سن کی گؤرورسن آنلیسان،یؤخ دئمه منده بیلمیره م

دوزگون حسابی ایسته سن،چؤرتگیه سال ،قاپانه باخ

بوردا تمام اؤلور سؤزوم،هاممیسی یؤخ بیر آزجاسی

حـؤصلـه ن اؤلـسـا وئـر قـولاق باقـیـه داسـتـانه بـاخ

بئينيمده ساوالان گؤزومده آراز

يول آليب گئديرم دوماندا چن ده

درديمي سيزلايير بير صدفلي ساز

نسيگيله بويانير ماهني دا من ده

 

ساغيمدا يارادير سولومدا يارا

باغلانيب آياغيم كؤچه بيلميرم

سنه كؤرپوله نن قولومدا يارا

بو سئنيق كؤرپودن كئچه بيلميرم

 

اوزومو دؤنده ريب خزره ساري

سينيرام ايچيمده آيلي بير گئجه

گؤزومده سورگوندو دورنا قاطاري

ياييليم لي بير گئجه ، يايلي بير گئجه

 

حسرتله دايانيب بير آه چئكيرم

آرزيمي گؤزومده سئله دؤنده رير

ساحيلدن – ساحيله گوناه چئكيرم

آرازي يانديريب كوله دؤنده رير

 

بير قوشما يازيرام ياريسي سودا

ياريسي توپراقدا اود دوتوب يانير

بارماغيم آز قالير سني اونودا

بلكه ده وئرديگي ايلقارين دانير

 

بلكه ده يازيميز يازيلميش بئله

بلكه ده ساوالان سيغمايير منده

دؤزه رم بير آزدا ، دؤزه رم هله

بوراندا ، ياغيشدا ، دوماندا ، چن ده

سنينله يم، سولدوگونش باتدي آي    

قافييه لر فيكره دالير هارداسان؟

گؤزلريمين قاراسيندا لاي بالاي        

 آيريليغدي چؤكوب قالير هارداسان؟

                  ******

باغيريرام سسيم باتير ايچيمده       

 سنسيزليگيم سنه چاتير ايچيمده

بو شاختادا - شاختا ياتير ايچيمده    

گونش آخيب قاش قارالير هارداسان؟

               ******

 يازي يازان قارا يازيب يازيمي !!!           

 هئچ بيلميرم هارا يازيب يازيمي!!!؟

سينم اوسته آلديم سينيق سازيمي  

 بوساز سندن ايلهام آلير هارداسان؟

             ******

سن خزره چئوريليرسن بير آندا        

 من دومانا قارق اولورام دوماندا

بارماقلاريم شاه پرده يه جوماندا      

 تئل قيريليرماهني سولور هارداسان؟

من دویا بیلمه دیم نه اولدو بیزه

سندن آیریلالی گوله بیلمیرم

گئری دؤن منی ده آپار دنیزه

قورتولوب یانینا گه له بیلمیرم

 

سینیق اوره گیمده سنین حسرتین

داغ کیمی چئکیلیب داغ کیمی قالیب

بلکه ده دؤنمه گه یوخ جسارتین

بلکه ده بوداغلار آیریلیق سالیب؟!! 

               *****

گئری دؤن بیر اته ک اومودوم قالدی

دئدیم وارلیغیمیز سولماسین داها

گه لمه دین ، آرزیلار سولدو سارالدی

سن سیز یاشاماغیم قالیب آللاها  

       

یادیندا بیر گئجه قول بویون اولدوق

سنین گؤزلرینده بوغولدوم بیر آن!!!

نه ده نسه بئله جه سارالدیق سولدوق

او سئنیق کؤرپوده آیریلان زامان

                 *****

ال – اله ، اوز – اوزه دایاندیق دوردوق

« آی » دا خومار – خومار باخیردی بیزه

کؤرپونون اوستونده بیر نیشان قوردوق

آیریلدیق ، سؤز وئردیک بیر بیریمیزه

               *****

سن باتدین دنیزه بیر دنیز کیمی

سندن آیریلالی گوله بیلمیرم

من سئنیق کؤرپوده قالان ایز کیمی

قورتولوب یانینا گه له بیلمیرم

یارین بویون قوجاقلادیم

یار آغلادی من آغلادیم

ییغیشدی قونشولار بوتون

جار آغلادی من آغلادیم

باشیندا قارقالان داغا

دانیشدیم آیریلیغ سوزون

بیر آه چکیب باشینداکی

قار آغلادی من آغلادیم

طاریمدا نا آغاجلاری

منی گوروب دانیشدیلار

بویومو زیتون اوخشادی

نار آغلادی من آغلادیم

ائلئی کی اسدی بیر خزان

تالاندی گوللریم منیم

خبر چاتینجا بلبوله

خار آغلادی من آغلادیم

اورک سوزون دئدیم تارا

سیملر اولدی پارا پارا

یاواش یاواش سیزیلدادی

تار آغلادی من آغلادیم

دئدیم کی حق منیم کی دیر

باشیمی چکدیلر دارا

طناب کسنده بوینومو

دار آغلادی من آغلادیم