Zum Inhalt springen

Reiner Haseloff

Us der alemannische Wikipedia, der freie DialÀkt-Enzyklopedy
Reiner Haseloff, 2025
Reiner Haseloff

Dr Reiner Haseloff (* 19. Februar 1954 z BĂŒlzig) isch e dytsche Bolitiker (CDU). Är isch vum 19. April 2011 bis zum 27. JĂ€nner 2026 MinischterbresidĂ€nt vum Land Sachse-Anhalt gsii. Dervor isch er vu 2006 bis zue syyre Wahl zum MinischterbresidĂ€nt Minischter fir Wirtschaft un Arbet vu Sachse-Anhalt gsii. Vom 1. NovĂ€mber 2020 bis zum 31. Oktober 2021 isch er turnusmĂ€ĂŸig dr BresidĂ€nt vum Bundesrot gsi.

Dr Haseloff het vu 1973 bis 1978 an der TĂ€chnische Universitet Dresden un dr Humboldt-UniversitĂ€t z Berlin Physik studiert. Derno het er in eme UmwĂ€ltforschigsinschtitut gschafft. Anne 1991 het er an dr Humboldt-Universitet Berlin mit dr Arbet „Entwicklung von MessgerĂ€ten auf der Basis der linearen Laser-Absorptionsspektrometrie zur empfindlichen MolekĂŒlgas-Konzentrationsmessung unter dem Aspekt des Einsatzes in der Umweltkontrolle“ zum Dr. rer. nat. promoviert.

Vu 1992 bis 2002 isch dr Haseloff DirÀkter vum Arbetsamt Wittenberg gsii.

Dr Reiner Haseloff isch ghyrote un het zwai Chinder. Är ischt remisch-katholisch un dodermit dr erscht katholisch MinischterbresidĂ€nt vu Sachse-Anhalt.

Dr Reiner Haseloff isch anne 1976 in d CDU vu dr DDR yydrĂ€tte. Är het syt 1990 em CDU-Landesvorstand vu Sachse-Anhalt aaghert un isch syt 1994 stellverdrĂ€ttende Landesvorsitzende vu dr CDU. Syt DezĂ€mber 2008 isch er derzue au Mitglid im CDU-Bundesvorstand.

Wu dr MinischterbresidĂ€nt Wolfgang Böhmer aagchindet het, ass er uf e nomoligi Kandidatur bi dr Landdagswahl 2011 verzichtet, isch dr Reiner Haseloff am 20. Merz 2010 uf eme Barteidag z Peißen aistimmig zum CDU-Spitzekandidate fir d Landdagswahl gwehlt wore.[1]

D CDU isch bi dr Wahl am 20. Merz 2011 uf e Stimmaadail vu 32,5 BrozÀnt chuu un isch dodermit vor dr Linke un dr SPD di sterkscht Chraft im Land. Am 23. Merz 2011 het di nei CDU-Fraktion dr Reiner Haseloff zue ihrem Fraktionsvorsitzende gwehlt.[2].

Vu 1990 bis 1992 isch dr Haseloff stellverdrÀttende Landrot vum Landchrais Wittenberg gsii.

Am 23. Mai 2002 isch er zum StaatssekretÀr im Minischterium fir Wirtschaft un Arbet vum Land Sachse-Anhalt ernÀnnt un no dr Landdagswahl 2006 am 24. April 2006 as Minischter fir Wirtschaft un Arbet in di vum Wolfgang Böhmer gfiert Landesregierig vu Sachse-Anhalt beruefe wore.

Vu 2006 bis 2011 isch er BresidÀnt vum NetzwÀrch vu dr EuropÀische Chemi-Regione (ECRN) gsii.

Am 19. April 2011 isch dr Haseloff zum neie MinischterbresidĂ€nt vu Sachse-Anhalt gwehlt wore. Bi dr Landdagswahl am 13. Merz 2016 isch d CDU wider sterkschti Bartei wore, wel d SPD aber stark verlore het, het di groß Koalition kai Meehait me ghaa. WĂ€ge dĂ€m isch derno ne Koalition us CDU, SPD un dr Griene bildet wore. Dr Haseloff isch am 25. April as MinischterbresidĂ€nt widergwehlt wore.

Bi dr negschte Landdagswahl am 6. Juni 2021 isch d CDU uf 37,1 % vu dr Stimme chuu,[3] 7,3 ProzÀntpinkt mee wie bi dr Wahl 2016. Wel d CDU un d SPD zÀme ne Meehait im Landdag vu aire Stimm ghaa hÀn un d Dreier-Koalition CDU/SPD/Grieni schwirig gsii isch, hÀn di Griene kai Verlengerig vu dr Koalition me welle un vyl us dr CDU au nit. S isch derno ne Koalition us CDU, SPD un FDP bildet wore. Am 16. SeptÀmber 2021 isch dr Haseloff zum MinischterbresidÀnt gwehlt wore.[4]

Am 7. August 2025 het dr Haseloff aagchindet, ass er bi dr Landdagswahl 2026 nimi aadrÀtte duet.[5] Zum 27. JÀnner 2026 isch er vum Amt as MinischterbresidÀnt zruggdrÀtte, am Dag druf isch dr Sven Schulze zue sym Noofolger as MinischterbresidÀnt gwehlt wore.[6]

 Commons: Reiner Haseloff – Sammlig vo Multimediadateie
  1. ↑ Mitteldeutsche Zeitung: Reiner Haseloff - Minister fĂŒhrt CDU in die Wahl, 21. Merz 2010.
  2. ↑ Mitteldeutsche Zeitung: Haseloff neuer CDU-Fraktionschef, 23. MĂ€rz 2011.
  3. ↑ Wahl des Landtages von Sachsen-Anhalt am 06. Juni 2021. Statistisches Landesamt Sachsen-Anhalt, abgruefen am 7. Juni 2021.
  4. ↑ Haseloff im zweiten Wahlgang gewĂ€hlt. In: n-tv.de. 16. September 2021, abgruefen am 16. September 2021.
  5. ↑ Haseloff macht Weg fĂŒr Nachfolger frei. 7. August 2025, abgruefen am 7. August 2025.
  6. ↑ Regierung: Weg fĂŒr vorzeitigen Wechsel von Haseloff auf Schulze frei. In: zeit.de. 12. Januar 2026, abgruefen am 12. Januar 2026.
DĂ€ Artikel basiert uff ere frĂ€ie Übersetzig vum Artikel „Reiner_Haseloff“ vu de dĂŒtsche Wikipedia. E Liste vu de Autore un Versione isch do z finde.