Bien d'Intrés Cultural

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Bien d'Intrés Cultural u BIC (Bien de Interés Cultural en castellano) ye una figura churidica d'a Lechislación espanyola ta la protección d'o Patrimonio historico espanyol, en as suyas variants de biens muebles y de biens immuebles.

Concepto y regulación churidica

A declaración d'un bien como d'intrés cultural ye una figura churidica de protección d'ixe bien, regulata en a Lei 16/1985, de 25 de chunio, d'o Patrimonio historico espanyol. Sindembargo, ista figura churidica fue dimpués incorporata por as lechislacions d'as diferents Comunidaz autonomas, en procesos administrativos similars a o procedimiento d'o Ministerio de Cultura.

Definición legal

Seguntes os articlos d'a Lei, un "Bien d'Intrés Cultural" ye cualsiquier obchecto mueble u immueble d'intrés artistico, historico, paleontolochico, arqueolochico, etnografico, cientifico u tecnico que l'administración competent declare como tal. Tamién o patrimonio documental u bibliografico, chacimientos arqueolochicos, lugars naturals chardins u parques con valor artistico, historico u antropolochico.

Categorías de Biens d'Intrés Cultural

Molimentos

Son os biens immuebles arquitectonicos u d'incheniería con intrés historico, artistico, cientifico u social.

Chardins historicos

Ye una superficie amugata, producto d'a ordenación por l'hombre d'os elementos naturals, a vegatas complementatos con construccions humanas, y que tienen intrés por o suyo orichen u pasato historico u por a suya valura estetica, sensorial u botanica.

Conchunto historico

Ye una agrupación d'immuebles con una unidat d'asentamiento, contina u dispersa, condicionata por una estructura fisica representativa d'a evolución d'una comunidat humana por estar o testimonio d'a suya Cultura o estar un elemento d'uso y disfrute d'a comunidat.

Lugar historico

Ye un lugar u parache natural binclato a feitos u escaicimientos pasatos, tradicions populars, creyacions culturals u d'a Natura y obras de l'hombre con valura historica, etnolochica, palentolochica u antropolochica.

Zona arqueolochica

Ye un lugar u parache natural a on bi ha biens muebles u immuebles que se puet estudiar con a metodolochía d'a ciencia de l'Arqueolochía, sían en a superficie, baixo tierra u baixo a mar u d'atras auguas.

Procedimiento administrativo

L'administración competent en a materia ubre un expedient (encara que atras administracions, entidaz u mesmo particulars pueden fer una solicitut). Dica a resolución d'o expedient, o bien recibe, con caracter preventivo, as mesuras de protección d'as leis. A declaración la fa o Concello de Gubierno d'a Comunidat Autonoma (si en tien transferitas as competencias) u o Consello de Ministros, a propuesta d'o ministro de Cultura.

Una caracteristica especial ye que a declaración ye automatica, por a propia lei y dende a suya promulgación sin necesidat de dengún tramite adicional, ta castiellos y as suyas ruinas y ta lugars con arte rupestre.

Consecuencias d'a declaración

Cuan se declara que un bien ye un Bien d'Intrés Cultural:

O bien pasa a estar un bien de dominio publico: encara que contine estando una propiedat privata, l'Administración ye obligata a la suya proteción por a suya valgua artistica, historica u de cualsiquier mena.
Ta fer cualsiquier obra u modificación en o bien ye necesaria una autorización de l'Administración.
O propietario d'o bien tien a obligación de fer-lo accesible ta inspección, visita publica u investigación.
O propietario d'o bien puet recibir aduyas u subvencions publicas ta o mantenimiento d'o bien.
O bien protechito no puet estar separato d'a suya redolada, ni tampoco puet estar exportato a l'extrancher.
Ta os biens immuebles, cal fer un plan especial urbanistico u protecher-los con cualsiquier atra figura d'o planeyamiento urbanistico.

Biens d'Intrés Cultural en Aragón

[1]

[2]

[3]

[4]

[5]

[6]