Mas borroka

Mas borroka (sakheraz: мас тардыhыы, «makila-tira»; errusieraz: мас-рестлинг, translit.: mas-restling; ingelesez: mas-wrestling) Jakutiako kirol herrikoia da, sokatiraren antzeko joko tradizionaletik eratorria. Kirolaren gaur egungo izena Roman Dmitriev borrokalari jakutak asmatu zuen. Mas hitzak «egurra» edo «makila» esan nahi du sakheraz, eta wrestling hitzak, berriz, «borroka» ingelesez.^[1]

Historia

Makila-tira zaletasun arrunta zen marinelen artean, beraz, borroka-joko horren aldaerak Alaskan eta Ipar Europan ere aurki daitezke. Jokoa bereziki ezaguna zen eskualde hauetan XIX. mendean.^[2]

Errusia Osoko Kirol Erregistroak 2003an aitortu zuen kirol hau. Letonian erregistratutako Mas Borrokako Nazioarteko Federazioak arautzen du ofizialki. Ameriketako Estatu Batuetako lehen txapelketa irekia 2013ko ekainean egin zen.^[3]^[4] 2017an, mas borroka Ulianovsken egindako Estatu Burujabeen Erkidegoko Herrialde Kideen Kirol eta Joko Tradizionalen Jaialdiaren parte izan zen.^[5]^[6]

Arauak

Lehiaketa 4 x 5 m-ko plataforma batean egiten da. Borrokalariak elkarren aurrez aurre esertzen dira, oinak lehiaketa eremua banatzen duen oholean bermatzen dituzte eta egurrezko makila (mas) bat tiratzen dute, oholarekiko paraleloan mantentzen saiatuz. Mas borroka egiteak besoetako, hanketako, bizkarreko eta sabeleko giharretako indar handia eskatzen du. Partida batek borrokalarietako batek bi edo hiru txanda irabazi arte irauten du. Aurkaria lurrera botatzea lortzen duenak irabazten du, eta makila askatzen duenak berehala galtzen du.^[1]^[7]