Liverpool Football Club

Liverpool Football Club, izay antsoina matetika hoe Liverpool FC na fotsiny hoe Liverpool, dia klioba baolina kitra anglisy natsangana tamin’ny 3 jona 1892 ary miorina ao Liverpool, any Avaratra-Andrefan’i Angletera.

Ny mpilalaony (antsoina hoe « Reds ») dia efa milalao hatramin’ny nahaterahan’ny klioba tao amin’ny kianja Anfield. Ny marika famantarany dia ny « Liver bird », vorona angano, antsasany kôrmorana antsasany voromahery. Ny hira You’ll Never Walk Alone, izay hymne sy teny fanevan’ny klioba, dia malaza maneran-tany. Liverpool FC dia manana iray amin’ireo palmarès eoropeana tsara indrindra: enina Ligin’ny Tompondaka, telo Amboaran’ny UEFA, iray Amboaran’ny Firenena Mikambana, ary iray amin’ireo palmarès anglisy lehibe indrindra: valo ambin’ny folo Tompondakan’i Angletera, valo Amboaran’i Angletera, folo Amboaran’ny ligy ary enina ambin’ny folo Community Shields.

Niditra tanteraka tao amin’ny angano momba ny baolina kitra anglisy sy eoropeana ilay klioba nandritra ny tapany faharoa tamin’ny taonjato faha-XX, rehefa tonga teo amin’ny toeran’ny mpanazatra i Bill Shankly ka nanomboka nahazoan’ny klioba fahombiazana ara-panatanjahantena goavana. Tamin’ny taona 1980, dia niaina fahoriana roa misesy izay nisy fiantraikany lalina ary nanova ny baolina kitra anglisy sy eoropeana. Ny voalohany dia nateraky ny mpanao herisetra avy ao Liverpool: 39 Italiana, mpanohana ny Juventus, no maty nandritra ny loza tao Heysel, tao Brussel, tamin’ny famaranan’ny amboaran’i Eoropa 1985; ny faharoa dia nahafaty mpanohana Liverpool 97, nandritra ny loza tao Hillsborough, tao Sheffield, tamin’ny 1989.

Ny klioba dia manana fifandrafiana lehibe amin’i Everton FC, ilay klioba hafa tantara avy ao Liverpool (derby an’i Merseyside), ary koa amin’i Manchester United, izay toy azy ihany koa dia iray amin’ireo ekipa be mpandresy indrindra any Angletera (derby an’i Avaratra-Andrefana).

Rohy ivelany

Tranonkala ofisialy (amin'ny teny frantsay)