Suvon

Suvon
수원 / 水原
*(Suvon)*
	Flag;
Valdkund	Korejan Tazovaldkund
Eläjiden lugu (2025)	1,228,165 ristitud
Pind	121,05 km²
Pämez'	Li Čžedžun; (heinku 2022—,; 이재준 / 李在浚)
Telefonkod	+82−31
Aigvö	UTC+9

Suvon (kor.: 수원 / 水原 [sʰu.wʌn]) om lidn Korejan Tazovaldkundan lodehes. Om Köngido-agjan administrativižeks keskuseks da palaks.

Istorii

Eländpunktan aluz om pandud 1. voz'tuhal meiden erad. Vspäi 1413 se om olmas nügüdläiženke nimenke. Hvasonan lidnuz om saudud vozil 1794−1796 sirdamha Korejan pälidnad sihe (onetomašti), mülüb UNESCO:n Mail'man jäl'gushe.

Vl 1949 Suvon sai oficiališt lidnan statusad. Vl 1969 «Samsung Electronics»-kompanijan aluz om pandud neche lidnha. Nügüd' nece korporacii da sen «tütred» oma kaikiš suremb radonandai Suvonas, niiden päfaterad sijadasoiš lidnas.

Geografijan andmused

Reljef om kukhikaz. Lidn sijadase koumekümnes kilometras suvhe Seulaspäi, 66 m ü.m.t. keskmäižel korktusel. Kvangösan-mägi om kaikiš korktemb čokkoim.

Klimat om mussonine. Paneb sadegid 1312 mm vodes, sidä kesken pol' (650 mm) heinkus-elokus.

Tobmuz

Suvon jagase nelläks ümbrikoks (gu, edel 2003. vot niid oli koume). Ned alajagasoiš 44 administrativižeks rajonaks (dong).

Edeline lidnan pämez' om Jom Thejon (염태영 / 廉泰英, heinku 2010 — uhoku 2022).

Eläjad

Lidnan ristitišt ületi millionad 2000-nzil vozil. Vn 2000 rahvahanlugemižen mödhe lidnan eläjiden lugu oli 946,704 ristitud, vn 2010 — 1,071,913 ristitud, vn 2020 — 1,210,150 ristitud. Kaikiš suremb lidnan ristitišt om nügüd'.

Korejalaižed ottas 97 % ristitištos (2020), jättud 3 % oma verazmalaižed.

Kaik üks'toštkümne universitetad, kaks' kolledžad da 33 korktad školad ratas lidnas. Mail'man futbolčempionatan-2002 üks' stadionoišpäi sijadase Suvonas.

Transport

Lidn ühtenzoitase Seulanke manpäližel metrol (ühtenz' jono «indigo», nell' stancijad). «Seul — Pusan»-kiruhraudte da kiruhavtote läbitadas lidnad.

Lähembaine rahvahidenkeskeine lendimport sijadase Inčhonas. Suvikorejan sodavägiden aviabaz om lidnas, severz'-se AÜV:oiden personalad jäb siš tähäsai Korejan sodan jäl'ghe.