مدونة الشاعر ابو عارف مقّدم

لصبای ومسامری

اللیلی ونجم سعده...

والشوگ اخذنی ومشه

لمّی ولبوی وهلی

وزغری الگضه ابمهده...

والروح من بین ادی

فرّاشه عتهه الهوه

خذهه ومشه الوحده...

اتدوّر حدیقة ورد

مر بیها غبشه النده

فزّزها وتعدّه...

وبکل فراشه طبع

تنهضم لوتنتحر

لوما تشم ورده...

وبلا فراشه الورد

وبلانده ینتحر

لوما غسل خدّه...

والگلب طیر وجفل

حل باب سجنه وطلع

من یگدر ایردّه...

مهما نسوه خللته

بعده الگلب ما نسه

بعده ابهوی بعده...

وعیونی مصفه الدمع

والجفن ساهر عمر

ما مر علیه سهده...

والوجه مایه انخبط

والخدّی لیلی شهد

ما لامس امخده...

والعمر مرسه حزن

ما مرها مرکب فرح

من شف بحر مدّه...

وتعشّه بیّه الزمن

وانه الاحسّب چنت

بی گادر اتغدّه...

والوکت من هد علی

حشّم اویا دنیتی

ما هد علی وحده...

حشّمت محّد فزع

والحظ ترکنی وغفه

والنام شیگعده...

وحدی ابطرج حسبتی

یچوینی صیف الهجر

واتجمّد ابّرده...

مغزل یفرنی الحزن

والخیط من ینگطع

بمعاتت ایشدّه...

اضحک چذب وبتسم

موگد جمر داخلی

یمّی الیجی اشحدّه...

موکلهه تنعد سوه

کلمن وثوبه الخلگ

متفصّل ابگدّه...

بیهم یخون الوعد

والثانی لو واعدک

مایخلف ابوعده....

ظلمه وشمس ماشفت..

گد ما مصایب علی

مرّن ابد ماصحت..

رادنّی اطیحن واطخ

وبطیحتی تشتمت..

لاویت چف الوکت

گد ما صلب ما طحت..

وبصدری سرّی انکتم

بی  للخلگ ما بحت..

وکلما علی دنیتی

اتهد منها ابد ماخفت..

واشما علی حشّمت

وحدی ابعزم واجهت

واشما نطتنی وخذت

هذا آنه متبدّلت..

والحسّبونی گطن

صافی الجدمهم صرت..

مگلوبی طنهم طلع

من ما درونی اشچنت..

صح گلبی لون الگطن

بس من شفتهم گمت..

حلفه وصریم وحسچ

بدروبهم خضّرت..

ماخذ اطباع النخل

من ینطی ما یلتفت..

بعثوگه شایل کرم

والطیب منهن یکت..

والعوز من مر علی

للعنده ما دنّگت..

واشما غزانی الزمن

صوب الغبر ما رحت..

الهم صبر لوجعت

ماعندی بس ما گلت..

فضّلت بیت الگصب

بلذل قصر ما ردت..

و رد الصبی ولعباته..

و رد الفرح واخذ الترح من دنیتی ودمعاته..

و رجّع العمری المر علی مثل الحلم

مرّت غفل وس تعجل ابممشاته..

ورجّع طفولیت الامس خل بیها احس

واخذ الالم وآهاته..

و رد حیلی الی الباگه الوکت منّی ومشه

وضاعن علی سچّاته..

واخذ النوی وخللی الهوی

ورجع العشگ بمسامره وهمساته..

واخذ الجفه وخللی الوفه

حتی الگلب یفتح سجن حسباته..

و رد الربیع و ریحته

و اخذ الشته الما بی مطر

والبورحن نسماته..

و رد النده

الفارگ عمر خد وردته

والحنّت البوساته..

و رد فاخته النخل العصه ابعثگه الحمل

ختصیح بلچی اینگّدن رطباته..

و رد البلابل طاح گلهن تینّه وحل موسمه

و صوفر نبگ سدراته..

و رد العمر مشحوف یمشی ویلهوه

مو بلم عشّاری الوکت ثگّل حمل ربعاته..

و رد یا زمن ورد الشواطی

وشلب الاغریبه الغفه ابفی بیدره

وت ردّن ابّاثاته..

و فزّز زرازیر البراری

النامن ابشجرة کبَر

گلهن اغراب الیول اجه المصطاحنه ولگّط بذر شلباته..

و رد یا زمن صوت الحواصید

و غنه الجمّال وس راب الگطه

وخیصیح لبیهن وفه ویملی السمه ابصیحاته..

و رد یا زمن ذاک الفدان وسچّته

اشتاگت الکاگ الشوفته

من عافها اسوادی وکسر مسحاته..

و رد یا زمن

خل هورنه ابخنیاب زوده ایطگ فرح

وگل الطیور الهاجرت ترجع اله

و خی عیّدن سمچاته..

و رد یا زمن

خل البنات ایغنّن ابغناوة اطلع یا صفر

و اولادنه اتشب الصَیَر

حتی السلف یتحنّن احدیثاته..

رد یازمن

رد یا زمن...

یاچف کت وفه ابهل خلگ منصب

محبّه وما عــــرف فد یوم منصب

من الله اکسبت بلجـــــود منصب

وجعلها طاهــــــــره وحرّه وزچیّه

----------------------------------

آیه فاطمــــــــــــــه و ربّک مثلها

ابصورة امه وظل واضــــــح مثلها

بلنسوان من صـــــــــــارت مثلها

و حوت اشرف معانی اعله الوطیه

-----------------------------------

ربّـــــــــک بشّـــــــر المختار وملا

ابنصر ون زل کلامـــــه اعلیه وملا

جعل من فاطمــــه بت وهل وملا

وعلی خلّا وصی الکل البـــــــریّه

ذکرت امّی او جـرت دمعات الاعیون

او الها الگلب فـــــــاض ابکل حنینه

صدگ طافت علی بفراگهـا اعــوام

او علی مـر الوکت یطـوی ابسنینه

بس ابهـــــای مـــا نسّتنی الایـام

ولا لحظــــــه الـگلب سـکّن ونینه

ذکرت امّی او جبت خـوّانی ویـّای

المسقط روسنـــه او للبیت اجینه

حتّی انقبّله او نتـــــذکّر الچــــــان

ون شــــوف المــــکان البی ربینه

امنــــه الطیفه مــــا فــارگ العین

او ریحت طیبها اتفــوّح بــــــــدینه

او الهـــا ابکل کتر بلبیت تـــــذکار

او نحس بخیالهــــا ایعایــن علینه

یمّه اهنـــــــا لعبنه ابهـذا الامکان

او یمّه اهنا گعدنــه اهنـا مشینه

یمّه اهنا گبل حضّرنـــــه الادروس

او یمّه اهنا کتبنه اهنا قــــــــرینه

یمّه اهنا گضت سـالـــوفــة اللیل

او یمّه اهنا سهرنــه اهنـا غفینه

یمّه اهنا گعدنـه ابضی الاســرای

او یمّه اهنا ضحکنه اهنــــا بچینه

یمّه اهنا جــــدرنه ابموگـده ایفور

او یمّه اهنا شــــربنه اهنـا کلینه

یمّه اهنــا لبسنه اجـدید الاهدوم

او یمّه اهنـــا حنـــان اتقاسمینه

یمّه اهنا کبرنـــه ابـــدارچ الطین

وب حضنچ الدافی اتــــرعــرعینه

یمّه اهنــا گضت کل الســوالیف

او غـــربلنه الــــــوکت وتفارگینه

یالیت الزمــــان ایــــــــردّچ اردود

وی عـــود المضه اوشخصچ یجینه

بس هیهات یـــرجع کلمن ایروح

او لا ینفع عله الـــراحـــوا بچینه

او اذا ضاعـن علی سچّات الادروب

اظل الهم صبــــــر وابچیلک ادموع

او اقبل بل علی من ربـی مکتوب

او اذا صـــار الملاگه اهناک اراویک

او اگللک ییوسف شــــوف یعگوب

----------------------------------

من طبع الیحب یسأل عله الیهواه

ویحس بلحبیب ابجرّت انفاســـــه

او اذاطبع الیحب ینسه الحبیب ابساع

چا ضاع الهوی وتفرهـــــدت ناسه

---------------------------------

غط بیّه الحزن من جدمی للراس

او هـــــم المر علیّه ایعادل اجبال

حسبه اتجیبنی او تاخــذنی حسبات

اترید ابیا لسان اشکیلک الحــــال

لا کل جــــرح بیک اتظهره للناس

ولا کل الحچـــی المضموم ینگال

ثلثین الــــــــــولد علخال مرفوض

الصدگ کل الولد یطلع عله الخال

----------------------------------

ما ینحسب یوم او لا تمر ساعات

یوم الیمر بیّه او مــــــــا اشوفنک

مرّه اتصوّرک نجمه او مداک ابعید

او مرّه اتصوّرک لوحـه او ارسمنک

کلک عاطفه اورقه اوحنان اوشوگ

ابهای اویاک احیرن وین ابــوسنک

---------------------------------

کتبتک بلشعر اجمـــــــــل مواویل 

اوعله صدری ابفخرعللگتک اوسام

او زرعتک رازقی ابخافــــورة البیت

او لعیونی تجــــی اتغافلنی وتنام

ماردتک علی بسهامـــــک اتصیب

ردت عنّی تصـــد بیدیک الاسهام

----------------------------------

یا اجمل دمــــــــــع عرفنه العیون

او فــوگ اشفایفی احله ابتسامه

الک بلگلب لهفه اتعـــــادل الکون 

من دنیــــای تمتد للقیامــــــــــه

---------------------------------

حبّیتک محبّه الما عـــرفها انسان

او لا یوجد مثلثهه او لایصـح منهه

او خللیتک هویتی او للگلب دگّات

وبکیفک علی اشتامـــــر او تنهه

--------------------------------

اتمنیت الگلب بی بــــاب یلمحبوب

او افتح بـاب گلبی اوعینک اتشوفه

چاشفت ابمحبتک شنهو بی سویت

حتی اتصدگه وتقدّر اظـــــــــــروفه

------------------------------------

علی طاریک لو مــــــر تصفن الروح

او تذب کلشی الاکـو من بین ادیهه

او تهیم ابعید بیک ابلا مسافـــــــات

او تصیر اعتابهه او کلشی ابحچیهه

او تهم للنوم عـــــــود اترید تنساک

تغمض اعیــــــــونهه او تلگاک بیهه

العذابی وحسّبتنی استتر برداک

اذا زودک جمعتة وگــــــدر برداک

انه اتحــــــــــــدّاک ما تگدر علیه

---------------------------------

هم تدری اشکثر بجفاک ظل من

دلیلی وبـــــودادک علی ظل من

اسأل عن بنات الــــدهر ظل من

عگبی ابخلگ حتی اتلـــــوم بیه

-----------------------------

اذوب ابنظــــرتک کل وکت منتل

تفت وبهــای احس الگلب منتل

اتریــــد اتعوفنی اشغیّرک منتل

چنت لوظیم مسنی اتجن علیه

-------------------------------

قسم بلصوّر الخمســـــه منهوه

عگبه وفـــــرحتی الیتنی منهوه

حبیبی الصدگ هم تدری منهوه

حبیبی العاف کلشی و ردعلّیـه

--------------------------------

اعـاین کلوکت للربـــــــــع مـامن

بیهم زیــــن سوّه و علی مـامن

ما واحد نخــــــانی و یـوم مامن

منهـم بلمضه و ردّیت ادیـّـــــــه

او ردلی اشما ضــــــــاع امنسنینی،حتی ارتــــــــاح ابعمـــــــــــــری الیای

وخذ الدمعــــــــه الحــــــــرگت خـــــــــدّی او ردلی البسمه او خلهه اویای

وخذ احـــــــــــزانی او ردلی افـــــــــراحی او ردلی الضحکه او شیل ابچای

او اجمع کل ضویات الشارع وخذ اتریک الدایم یلگف حتی اشعل بمکانه اسرای

او اخذ اصحابی العدهم کلشی او رد اصحــــابی الفقره الماعهـــــــم حفّای

او اخذ الکالبتوز اویاک او وردالدفله او رد النخله او خـل تکسرللیمشی افیای

او رجع خبزة تنّور امّی او عیش الطاوه او سمچ البنی مـــارید امفطّح ودیای

او رد صوتی ابحّته الدنیه او ذان الطرشه وخذ اللیل او رد الغبشه او صوت آذان ابلا سماعه او رد موگدنه او قوری الچای

او اخذ اشما عندی امنل دنیه او رجّع امّی او اهلی الراحـوا کلهم منّی او ردلی اهوای

او صادر کل نوطه او موسیقی او کل معزوفه الما تطربنی او خـــــل بس یمّی ایظل النای

او اخذ الشیب الجبته الراسی او ردلی النشوه او خمــــــــــرة کاسی او شد اجروحی ابگطعت ململ بس لا تلچمهن بهدای

او گل ظعن الحمّلتـــــــه ابّوگه اینوّخ نوگه او خل یوگف صیـــــــــــح الحدّای

یل حمّلت احـــلامی او ماشی ابصرّة واشی و الشدّوهــــــــا اویاک اعدای

رد یا عمری او ردلی اصبای 

حن مرّه حن ،یلما تحن ،یل عمری عـدّیته ابمحبتک بس احن

و جن مرّه جن ،جنّیت بمحبتک عمر ،لجلی ابزمانک مرّه جن

و ون مـــرّه ون ،گضّیت کل لیلـــی و نهــــــــــاری اعلیک اون

حن مرّه حن ،یل بگت من عندی الفرح عذّبنی بجفاک الحزن

یل ما تحن چمــدوب اعــــــــدّی العمر کل ســــــــاع انسحن

یل عشرتک مــــرّه و عـــــــــذاب و متعبـــه و حبّـــــک سجن

حن مرّه حن،یل بورحن نسمات شـوگک گل هواک ایکت مزن

یل جرّعتنی الکاس امـــــــــر امنل صبر وهموم ما گدهن وزن

یل شفت من ویــــــداک نجمات الظهر وبلیلی سهّرت الجفن

حن مرّه حن ، لشوکت اظل اویــــــــاک خــــــــــایب ممتحن

یل ما تحن ، مو گلبی وصله امنللحم ارحـــم یمن هجرک فرن

خللیتنی ابتالی العمر الناس تحصد حنطـــــــه وانه اجمع تبن

یل ما تحن لشوکت ابگه ابرّحت الفرگه و عـــــــذابـک انطحن

یل کبّریتک بلگلب وبعینی چنت اتنام مـــــــــــــا تهوه الحضن

الخلگ تزرع گطن ویخضّر ورد وانـــــه ازرع القداح ویخضّر گطن

وک مرّه حن یل ماتحن خلانی بجفاک الوکت نقال اخله اوانشحن

حن مره حن

یلمــــا تحن

والحله العندک اتعـــــــادل من تمر

اشبدّلک شـــــو ما تسلم من تمر

اویاک ما سوّیت بـــــــدّه ابهلحیات

--------------------------

من گبل حالی انته اعرفک منتمی

والشهد والعسل لسمــک منتمی

الوصّفک والـــــــگال بلمی منتمی

انته من عندک نبع مـــــای الحیات

-------------------------

یلحـــــــــدیت ابظعن خلّی ونّبی

علـــــه افراگه الگلب صارت ونّبی

ابمسجد السهله انــدعیلک ونّبی

لو اتخلیه عنـــــــــدی هلّیله یبات

----------------------------

جرح البگلبی اللفانی مــن عسل

فرگتک یل طعم ثغرک مـن عسل

بلصلاة اشغر ودعّی مـــن عسل

فرّق ابّیناتنـــــــه ایشوف الممات

-----------------------------

یا مسن یاکل ابهجرک یابـــــــرد

یا شته اجـــورید لیلک یابـــــــرد

الیمته اظل اعلیک اصیحن یابــرد

اوردلی ویّاک الوفه اوطعم الحیات

-------------------------

آنه اعد شوگی او حنانک عیدالی

اوکلشی من عندی الخذیتـه عیدالی 

تدری یمته افـرح وحسّن عیدالی

من تعیـــد ابعیـــد وتعیــد الحیات

------------------------------

ریت تـــــدری الگلب حبک مرمره

یمن گلبک لا الــــــــــم لا مرمره

خل یصیر انصـــــاف عندک مرمره

علی لو بلطیف ورجـــــــع لا تبات

----------------------------

گلبی ما ون اعلـــــــه غیره ونتله

او بی ختمت اکتاب شوگی ونتله

شُمر سنّاره ابــــــــــدلیلی ونتله

اوخذه اویا روحی اومهجتی امچلّبات