چنلی تئل

داریخیر خیالیم ! روحومو یاخیر

..................................... باغیریر سکوتلار فریاد لار اوسته

غرورون  اوزوندن حقارت یاغیر

..................................... باغیریر سکوتلار فریاد لار اوسته

بوغولور حسرتدن دیلیمده سوزوم

قوشا بولاق تک دولوبدور گوزوم

اوزومو گورمگه یوخومدور اوزوم

.................................... تئشه لر یاغیرلار فرهادلار اوسته

.................................... باغیریر سکوتلار فریادلار اوسته

توپراقلار تیتره ییر بوز داماریمدا

اولدوزلار چیرپینیر سولوم ساغیمدا

اوزانیب قالمیشام زامان یولوندا

..................................... آی دا چابالیری توپراقلار اوسته

..................................... باغیریر سکوتلار فریادلار اوسته

اولدوزلاری ساییب آیا چاتمیشام

سوسموشام سوسموشام ، هایا چاتمیشام

گئجه نی سورویوب گونه قاتمیشام

.....................................دوداقلار تیتره ییر دوداقلار اوسته

.....................................باغیریر سکوتلار فریادلار اوسته

گولملی گولملی آغلایان منم

داغلار اوره گینی داغلایان منم

سوکوتو هارایا  باغلایان منم

.................................... وولقانام مسکنیم بو داغلار اوسته

.................................... باغیریر سکوتلار فریادلار اوسته

boz torgai | Musicians Available

اوتن چاغلاردا شاعیرین

سینه سینی یار داغلاردی

ایندی ایسه سیگارئت له داغلاییرلار سینه سینی

بو سوچا کی

قارالارا آغ دئمه ییب

آغ یئرلره باغ دئمه ییب

او سوللارا ساغ دئمه ییب

آدام ساتماق امه گیله

بیر تیکه چورک یئمه ییب

هاوا دولوب داشیب گلیر               بولود قارا گئیینیب دیر

بو زامانین احوالینا

 دئییرلر کی : سئوگی اؤلوب

بوتون شهرین آداملاری              پیچیلداشیر بیربیریله

دئییرلر کی :

آخشام چاغی               بو گلن قارا بولوددان

سئوگی سیز اؤپوش یاغاجاق 

                           دومــانلاردان باش قالدیران

                            زیروه سینـده قــارا باخیـن  

                            یاماجیندا گــول بیتیــر ه ن

                            سینه سینـده داغا باخین 

                                                              داغا باخین داغا باخین !

داغا باخین داغا باخین

                            نه لـــر یارادمیــــش یارادان             

                           سئلده بوغولموش سارادان 

                           قارانلیــــق لاردان ، قارا دان  

                           دورولـانمیــــش آغـــا باخیـن 

                                                              داغا باخین داغا باخین !

داغا باخین داغا باخین

                           ایچه ریسین سوز یاندیریر 

                           سینه سینی کوز یاندیریر

                           ظالیم ، دایان ، دوز ، یاندیریر!!

                           اود وورولموش باغا باخین

                                                            داغا باخین داغا باخین !

داغلار آغلار یارالی           داغ دره دن آرالی

یوواسیزدان سورمایین            هارالی سان، هارالی؟!

تأسف له سایین ادبیات اوستادی آذربایجانین باشاریلی گنج شاعیری

ابراهیم احمدی

 دونیـــادان کؤچدو ... ائلیمیــزین باشی ساغ اولسون

تورکون دیلی تک  سئوگیلی ایستکلی دیل اولماز

اوزگه دیله قاتسان بو اصیل دیل اصیل اولماز

کهلیک کیمی قاردا باشینی باتماسا شاعیر

اوز ایل ائوباسین موفته سینه ساتماسا شاعیر

یالنیش سوزیله میلتی آلداتماسا شاعیر

اوز شعرینی فارسا عربه قاتماسا شاعیر

شعری اوخویانلار ائشیدنلر کسیل اولماز

قیچلار گوجونو هیمتی نی دیزدن آپارمیش

یوللار آماجین دوزلوگونو ایزدن آپارمیش

وارلیقلارین اوغرو بیزیم ائومیزدن آپارمیش

فارس شاعیری چوخ سوزلرینی بیزدن آپارمیش

صابیر کیمی بیر سفره لی شاعیر بخیل اولماز

فارسین دیلی شیرین اولا گر تورکو نمکدیر

کوکسومده منیم چیرپینان ایلقاردیر اوره کدیر

تورکو اوخویوب یازماغی هر تورکه گرکدیر

تورکون مثلی فولکلورو دونیادا تک دیر

خان یورقانی کند ایچره مثل دیر میتیل اولماز

تورکون دیلی ایندی بوتون عالمده یئر ایئتمیش

یاهو گوگلی فیس بوکو هاتمیلی سیر ائتمیش

اوز شهرتینی بیرده بودونیاده دیریلتمیش

توران قوشون قیصر رومی اسیر ائتمیش

کسرا سوزودور بیر بئله تاریخ ناغیل اولماز

 دونیاده گرک هر دیلین آنجاق سوزو اولسون

شاعیر سوزو سوزلرده سئچیلمیش گوزو اولسون

اوزگه سوزونه اویماسین آرتیق  اوزو اولسون

پیشمیش کیمی شعرینده گرک داد دوزو اولسون

کند اهلی بیلیرلر کی دوشاب سیز خشیل اولماز

چیرکین ، بئزه نه هر نه قدر یاخشی  بدلدن

کسگین سئچیلر اصلی گوزل لیک او بدلدن

تورکو قوروماق ایندی گرک یاخشی ُ بد  الدن

سوزلر ده جواهیر کیمی دیر اصلی  - بدلدن

تشخیص وئرن اولسا بو قدر زیر زیبیل اولماز

یـادیندامی گئـدیـردیـک، چئـییــن چئـییــن ال-اله                    بولـودلارا دئییردیک، قار یاغیشین سپه له

ایسلات بیزی آی بولود،قوی سئودامیز تر اولسون                   عشقیمیز بو دونیادا مجنوندان بتر اولسون

شـاختـا ووردو اوشوتـدو ، قیزارمیـشدی اوزومـوز                    آما یئــنه گئـدیردیـک ، یـورولمـوردو دیزیمیز

یـادینــدامی دئـییـردیـن بازاردان بیــر شـال آلاق                     بــاغلا اونو بـوینـونـا ، باشینا قوی بیر پاپاق

دئـییردیـم کی سئـوگیلیم ، عشقیـنین حرارتـی                     قویماز منی اوشویم ،بودور عشقین عادتی

یادیندامی اوشودوک؟بیرجه کاسا آش ایچدیک                     تئز آیریلماماق ایچین آشی دا یاواش ایچدیک

یئــنه ده دوشـدوک یـولا ، چئیین چئیین ال-اله                      آیــریــلاجاییــق دئــیه قلـبـیـمـیـزده ول وله

من سنه شئعر اوخوردوم،سئوگیدن آیریلیقدان                      سنین گوزون یاشالدی،گوروردوم گوزوم آلتدان

آیـریلیــق یاخیـنلاشدی ، دئـدیم اوپـوم اوزوندن                      یئنه ده سن اوتاندین ، اوپـدون منیم الیمدن

تئـز آیـریـلمامـاق ایـچیـن ، یـولـودا اوزادیردیــق                       آخشام اوستو شاختادا ،کوچه نی دولانیردیق

گلدیک چاتدیق واغزالا ،من سنی سالدیم یولا                      سن قاطارا مینه نده هئی باخیردین ساغ سولا

سنین گوزون یاشالدی، آیریلیق واختی یئتدی                       منیم قلبیم پارتلیردی ، آخی سئوگیلیم گئتدی

قاطـار یـولا دوشنـده مـن اونـلا دانـیـشیــردیم                       دمیــر یــولا یــالواریـب ، اورکــدن آلیــشیردیـم

دئــییردیم سئوگیلیمی ، مقصده سالیم یئـتیر                        گـوزله یـیـرم یـولـونـو ، اونــو یـئـنـه ده گـتـیـر

قاطـار گوزدن ایـتـینـجه باخیردیم دالیسینجاق                        ایسته دیم کی قاییدام ، آیاق گلمیردی آنجاق

او گئــجه نی ائـویمه ، مـن داخی قاییتمادیم                         سن سیز بوش اوتاغیمدا ،تکجه گلیب یاتمادیم

ایندی سنیـن اییی نی ، یاستیغیـمدان آلیـرام                        یــاتــانـدا خیـالیـنـی قـولـوم اوسـتـه سـالیـرام

                                             یادیـندامی گئـدیردیک چئیین چئیین ال - اله

                                             آللاه قویسا یاشاریق ، چئیین چئیین ال- اله 

سارانین هوروگو سویا ساریلجاق                         سارماشیق ساچیندا هاوالانمیشــام

اویناسین لار تئل لر سازلار بیزیمدیر                      سازلارین سئیرینده یازلار بیزیمدیر

یــازلارین قوینـونـدا غـازلار بیـزیمدیر                      سالجانی دویدوقجا سایالانمیشام

ساوالان قیــزلاری سهند قیــزلاری                        قارابـاغ یــوردوندا یــارالانمیـشــام

نه دنسه بیلمیــرم دردیم نه دندیر                        کونلومــون کونلونـدن آرالانمیشــام

               یئللره قارشی گئدردیم گویه

                                     اولدوزلار تک

 هامییا بیرجه داغارچیق

                      گول آتاردیم اوجادان

سویله یردیم هامی اوغلان قیزا  آرواد کیشی یه

                    کی گلین گوزگولرین اوزره دوشن هیسلری

                                                   بیر دفعه سیلک

                                  تانریدان بیرجه شکیل

                                      گوزگولرین ایچره سالاق .........

توپ تفنگ لر آدینی

              اینسانین بیربیره دوشمانلیق ائدن یوللارینی

                                   باغلاییب یاز سئلینین ایچره آتاق

یئللره قارشی گئدردیم گویه الدوزلار تک 

                                      بردووان اولسایدیم 

بردووان : اوشاقلار کاغیذدان اوچاق دوزلدیب ساپینان باغلاییب گویده اوچوردان اویونجاقا دئیر

گوزللیگیندن آرخـایین                              گئدیر ائویندن ائـویـنـه

قانیلا بیر صولح ماهنی سین                    یازیر سئوینه سئوینه 

یـارا باخین یارا باخین                             یئــره دوشن نــارا بـاخین

من ائویمده او ائوینده                             آی لا اولدوز حسره تینده

من اوتن ایزین گوناهی                           او ایتن قیزین پناهی

یــارا بـاخین یارا بـاخین                           او قانلی دووارا باخین

سحـره گـوز تیــــکه تیـــــکه                      یــــار ائــویـــنـی تــیـکه تــیـکه

چاتلاقلاردان گویله سه یدیم                    یاشیل تورکو سویله سه یدیم

بو سوکوتون فریادیندا                             که په نه یین قانادیندا

یارا باخین یارا باخین                              قوینوندا کی نارا باخین

او قانلی دووارا باخین                             یئره دوشن نارا باخین

بوینوندا کی دارا باخین                            یــارا باخین یارا باخین 

                         یوواسیزدان سورمایین                هارالی سان هارالی   

گونش گویون اورتاسیندا بیر بوزارمیش یاماق کیمی

                           بالتا بالتا کسیلیردی یاشیل لیق لار

                                     بویلو قادین قان ایینه یئریکلرکن

                                           بیربیریله ساواشماقدا دوغولمامیش اکیزتای لار

دوداق لاردان اوپوش سورگون گئدن چاغدا

                   بولوک بولوک وارلیغیمی قالاق - قالاق نیسگیل لره قاتیب

                                                                        چاتدیم اوز یوکومو

                                                                            یولا دوشدوم قاراچی لار کاروانیلا.

او اوبادان بو اوبایا

                داشییارکن یوخلوغومو

                                  سیلینمه دی گوز ائویمدن

                                            قارا دومان

                                                یئنه بالتا

                                                  یئنه یالان

اولکه اولکه سووخالاندیم قاراچی لار هاراییندا :

                        داغ لار آغـلار یــارالـی                   داغ دره دن آرالــــی

                        قاراچی دان سورمایین                 هارالی سان هارالی 

سارامی تاپشیریب آرپا سئلینه                        کوکسومه داغینی تاخیب آغلیرام

او گئـدن دن بـری بیـر دیـلـک کیـمی                  اودونـدا یانیـرام کپـنـک کیـمی

جانیمی چیخاردیب بیر کوینک کیمی                  قویورام اونومده باخیب آغلیرام

اوره یـیـم یـئـنـه ده بـاغلیـدیـر اونا                      عشقیندن گیریرم گونده مین دونا

سئوگیم بیر دنیزدیر او گوزل سونا                      دردیـنـی گوزومـه یـاخیب آغلیـرام

بیـلیــرم قـایـیـدیـب گله جـک دورنــام                  اوخویوب دردیمی بیله جک دورنام

تایمازین گوز یاشین سیله جک دورنام                 او گونو گوزله ییب اوخوب آغلیــرام

                                  او گئدن یوللارا باخیب آغلیــرام

بودور ان مقـددس آرزوم دیـله ییـم                             اینسان بیربیرینه اولماسین دوشمن

دیـله رم اینسانـلار بوتـون دونیـادان                          سیلیب محو ائله سین دوشمان کلمه سین

صلحون گویرچینی اوچسون هاوادا                           کیمسه ائشیتمه سین توپ تفنگ سسین

اینسانلار بیربیرین سئوسین سئویلسین                    آزاد قوشلار کیمی سورسونلر حیات

قالماسین اورکده نه نیفرت نه کین                           کونوللرده اولفت اولسین قات با قات 

             هاوا توتقون

        ائله بیل داغدا بوراندیر ............... شاخیر هر بیر یانا شیمشک

گویه باخ بیر :

             چاپدیریر کوهلن آتین ایلدیریم اوغلو قارا گویده

                                      ائله بیل قار یاغاجاقدیر

                                                       یادا

                                              گویدن یئنه اولدوز آخاجاقدیر

هاوا بوم بوز

           هاوا سولغون

                      هاوانین هر نه یی دولغون

اولمایا قاش قارالیبدیر

                       یا گونش داردا قالیبدیر

                           گه ل   اوته ک  بیربئله چاغدان

                        سورویورلر توزا باتمیش گونشی دار کوچه لرده

                                     یئنه ده سومسوگ اوشاقلار

                      ایسلانیرام 

                           قان بویاق لی یاغیش لارین ایسلاغیندا

پاسلانیرام

         آغلار ـ مه لر   سیزی ـ حسرت  پاسلاغیندا

یئنی یولداش

            هله ده وار ............

                       گوزلریمین اوزه رینده

                           سورویورلر اولدوزلاری گئدر گلمز یوللاریندا

                                       هر اولدوزون دمیر قاندال قوللاریندا 

هله ده وار ....... هله ده وار

                       گوزو یاشلی کوچه لرده دولانیرلار

                                               پیس میریق لار

هله ده وار .........

                      قان اییندن گوزلر آخیر

 قارانلیقا قوناق گلن ساغیرچالار

                              اللرینده قانلی چاخیر

                                    کوچه لرده کئفلی کئفلی اوخویورلار :

 گئجه لر آی گئجـه لر                      غوربه ته تای گئجه لر

گلین قانلی چاخیردان                     آپـاریـن پـای گئـجـه لر 

 اوزون سئون بیر عیدده لر                 کلمه نی ده اوینادیرلار

                         یازیقلیغیم گلیر سنه

                              دئموکراسی نین کلمه سی

                                        آزادلیغین مقوله سی

 یــارادارام آزادلیــغی                           ایچیـمیـزدن کوچـر یـاغی

قویارام داغ اوسته داغی                    دوزلـده رم شهری بــاغی

                        هئی دئییری دئموکراسی

                         آلدادیـری هـر بیـر کسی

گرکدیر میـللت اویـانسین                     یـالان قـارشیـندا دایـانسین

اوز ائلیندن گوجون آلسین                    دوشمانا سئل تک جالانسین

                         تورک اوغلو آییقدیر دئسین

                         عالمه یئتیرسین سسین

            دولانیب یاشیرام اوز نفسیمله

                 اوچورام اوخورام فرحله نه رک

                       یئییرم ده نیمی اینسان الیندن 

                                ایچیرم سویومو یاشیل قابیمدا

                                    من ایچدیگیم سولار تمیزدیر تمیز

                                           کلرلانیب بو سو اینسان الیله

گویده اوچان قوشلار سویوقدا یاتیر

     گورورسن اوچ گونله ده نه تاپماییر

        ایچیری سویونو لئه لی بولاقدان

            تاپمیری بیر یووا قار توتموش باغدان

من یئدیگیم ده نلر آریتلانیبلار

     آلیبدیر صاحابیم باها قئیمته

         منیم قفسیمده اوچ یاتاغیم وار

               دوزه لدیب صاحابیم دمیر مفتیلدن

                      اوخورام کئیف ائدیر منیم سسیم له

                          من اوزگور بیر قوشام اوز قفسیمده

تبریز اوستو مییانا                        گول سونبوله دایانا

اوخو بولبولوم اوخو                        بلـکه یاریـم اویـانـا

حسین رزمی ده دیئییر :

بـورا تبـریـز اوستـو بورا مییـانـا                     تیـکان قویمور گـول سونبولـه دایانا

بوردا بولبول ایستیر اوخوسون اما                به له شیر دیمدیگی نغمه ایله قانا

بوراسی شوشه دووارلی بیر دوستاق

زهرلی گؤزلرین سوزگه جینده

دمير بارماغليقلار ساياق دوزولن اينسانلار دوستاغيندا
سيناق سيچانلاريييق بيز.

جان سوموروجو سئروملار
و قان اميجي قامچيلار سيناغيندان کئچيريليريک.
باشيميزدا دوه دريسي
و يادداشيميزدا تيکان تيکان بئينيميزه يئديزديريلن اؤلوم.
جانيميز يولوخوجو خسته‌ليکلر يئمي
و قانيميز دونياني ديزه چؤکدورن ائپيدئمي.

بوراسي شوشه دووارلي بير دوستاق
کيميلري
آغ ماسکالارلا قورونورلار نفه‌سيميزدن
کيميلري
سانکي بالاجا قارا باليقلارلا دولو
بير آکواريوم تاماشاچيسيديرلار.
جام زيندانيني سينديرماغا کيمسه‌ده تپر يوخ
گؤزلوک گؤزلوک آرتير قيناقچيلاريميز
و باخيش باخيش تالانير تارلالاريميز.

اوووي ديمديکلرده ياغمالانان تارلالار!
اوووي چيمديکلرده گئدن گونباخانلار!
هئچ کيمسه قوللاريني آچمازمي ايکي يانا؟ !
هئچ کيمسه چئوريلمزمي قوش قووانا؟!

بوراسي هاوا دووارلي بير دوستاق
آرتيق بوراخيلميش بوتون قاندالليلار
کيميسي قورد کيمي
کيميسي مانقورد کيمي 

سیندیم

سوکوت سیندی

بیلدیم کی

ائئئئئئئئئه

واریمیشام

باخیرام آی باجاسیندان

باشقا بیر ماوی گویه

اوردادا وار ائله بیل

گئجه یوردون قانا دونموش دنیزیندن

نئچه بیر غملی بولود

چنلی داغ     قانلی سویود

گئجه دیر

باخیرام آی باجاسیندان

باشقا بیر ماوی گویه

بیر فانیس تک

یادا قطب اولدوزو تک رهبر اولام

ایسترم یای گونو

چوللرده آخان بیر سو اولوب

دووم دورو گوز یاشی تک

یولدا چوخور ایچره دولام 

ایسته مم نقش و نگاریم قالا شئعریم اوخونا

ایسترم بیرسیزی حسرت تک اورکلرده قالام

اونودورسا منی ائل

چکمسه تاریخ آدیمی

ایسترم آی تکی یورد اوسته

گئجه شوق سالام

اوزور سونا دویغوم غم دنیزینده

اووچو تک گزردیم سنین ایزینده

سئودیم گورنمه دیم سئوگی گوزونده

                                      گئدیرم سن داها گورمزسن منی

بیتدیم چینار کیمی سنین یولوندا

گزدیم قاطار کیمی سنین یولوندا

سیندیم دووار کیمی سنین یولوندا

                                     گئدیرم سن داها گورمزسن منی

خزانا یئتیشیب باهار چاغلاریم

آتیلیب پانبیق تک اوجا داغلاریم

کولگه سیزدیر منیم بوتون باغلاریم

                                     گئدیرم سن داها گورمزسن منی 

یاغدیم بوران کیمی چنلی تئلینده

چاپدیم قیرآت کیمی چنلی بئلینده

چالیندیم قوپوز تک جونون الینده

                                    گئدیرم سن داها گورمزسن منی

دوندوراردیم  اورگیمی 

بو شئیطانلی هاوادا

کیفسی مه سین

سینیق دیر کوره گیم

یئلکه نیم جیریق

سنده سونسن

من نئیله رم

محببت سوسوزویام من 

آلیشیب اوره ییم

اود دوتوب یانیر

بونداندیر کپنک لر 

آلیب دوورومو

آیلی گئجه ایدی

اوغلان پیچیلتیلا سئویرم دئدی

عهدیندن دونه نین گوزو اویولسون

آیدا عشقیمیزه قوی شاهید اولسون 

اونلار آیریلدیلار

آیلی گئجه ایدی

اوغلان باشقاسینا سئویرم دئدی

آی گیردی بولودا

اوزونده کدر

قورخدو کی یئنه ده  شاهید  چکه لر