دیان‌پێدانان

 

گه‌لێ جار شتم دزیوه

وه‌کوو: پاره‌ له‌ گیرفانی به‌رپشتێنی چۆغه‌ی باوكم

ژه‌مۆلكه‌ رۆن له‌ گڵێنه‌‌ی ئامۆژن و

گڕكه‌ له‌ بێستانی فاتێ

كتێب له‌ دووكانی ناجی

كه‌ سه‌رقاڵی موشته‌ری بوو

مریشكیش زۆر...

ته‌نانه‌ت ماچ

له‌ روومه‌تی كچێكی جوان

ئه‌و كاته‌ی وا،

سه‌ری نابوو به‌ سه‌رمه‌وه‌

هێڵه‌کانی له‌پی ده‌ستی بگرمه‌وه

 

ته‌نیا شتێك نه‌مدزیوه‌ و

قه‌تیش بیرم له‌ دزینی نه‌كرده‌وه‌

به‌س شێعر بوو

چون پێم وابوو

شێعر تیرێژی هه‌تاوه

ره‌گاژۆی وا له‌و دڵه‌دا

به‌ گریان لێی هه‌ڵقوڵاوه‌

 

91/7/3- بانه

 

 

 

کۆڵان

 

کۆڵان وه‌كوو

دڵێكی ته‌نگ و تاریكه‌

ئه‌مشه‌و لای من

گه‌لێ خامۆش و باریكه‌

دیواره‌كان له‌ دوولاوه‌

وه‌ك دڕنده‌

شاڵاویان بۆ من هێناوه‌

لێك دێنه‌ پێش

لێم دێنه‌ پێش

رامده‌گووشن

هه‌موو گیانم دێننه‌ ئێش

 

سێبه‌رێكی سارد و غه‌ریب

به‌ شوێنمدا راده‌خووشێ

خه‌مێكی ره‌ش له‌ گه‌ڵمایه‌

له‌ دڵمایه‌

منی ته‌نیا تێر ده‌گووشێ

 

کۆڵان یه‌كجار ته‌سك و تاره‌

کۆڵان ماره‌

کۆڵان ماری برینداره‌

ده‌كشێ... ده‌كشێ

کۆڵان ئه‌مشه‌و

له‌ گه‌ڵ هه‌نگاوی من ده‌خشێ

 

ئه‌م کۆڵانه‌

ئه‌م کۆڵانه‌ی ئه‌مشه‌و له‌ لام گۆڕستانه‌

زۆر شه‌وی‌تر پێیدا هاتووم

وامده‌زانی پێی ڕاهاتووم

به‌ڵام  گیانه‌

راهاتنم له‌‌ گه‌ڵ تۆ بوو نه‌وه‌ك کۆڵان

وه‌ هاتنم بۆ لای تۆ بوو

بۆ لای تۆی جوان

 

کۆڵان بێ‌تۆ گۆڕستانه‌

دیواره‌كان منی تێدا راده‌گووشن

سێبه‌ر به‌ سه‌ر له‌شما كشا

خه‌می ره‌شی ئه‌م شه‌وه‌شم

بیرم ده‌خوا... له‌شم ده‌خوا

 

توخوا گیانه‌

گه‌ر به‌ سه‌فه‌ر هاتیته‌ ئه‌م شاره‌ كڕه‌

له‌م کۆڵانه‌وه‌ تێ‌په‌ڕه‌

گۆڕێكی كۆن وه‌ك وێرانه‌

دڵێك تێیدا چاوه‌ڕوانه‌

سه‌ر هه‌ڵبڕه‌

هێواش هه‌نگاوت هه‌ڵگره‌

كوشته‌ی خۆته‌

شه‌هیدێكی دڵ به‌ سۆته‌

توخوا گیانه‌

له‌ بیرت بێ

كه‌ ئه‌م کۆڵانه‌ جێژوانه‌

كه‌ ئه‌م کۆڵانه‌ جێژوانه‌

68/6/22- بانه‌

 

 

ماڵئاوایی

 

ئه‌مشه‌و شێعرم

له‌ چاوی هه‌ر وشه‌یه‌كی

فرمێسكی خه‌م هه‌ڵئه‌ڕێژێ

ئه‌مشه‌و هه‌ستم

له‌ دارمه‌یتێكی ره‌نگ‌زه‌ردا

ته‌رمی هیوا

به‌ره‌و سووچی دڵم ده‌بات و ئه‌ینێژێ

ئاخر سێ په‌نجه‌ و قه‌ڵه‌مێك

بۆ نامه‌یه‌ك

روومه‌تی یه‌كتریان رنی

له‌و نامه‌دا "ماڵئاوایی"

پڕ به‌ هه‌موو گۆڕستانی دڵ پێکه‌نی!!

69/10/9

 

 

هاوڕێ گیان

 

 نه‌ورۆز بڵێسه‌و مه‌شخه‌ڵی هه‌سته

جێژنه، باوه‌ڕه، هیوا و مه‌به‌سته

بۆیه گه‌لی کورد به ئاواته‌وه

گشت ساڵێ یادی لێ ئه‌کاته‌وه

 

پیرۆزبایی تێک‌شکانی سوپای کڕێوه له تۆ و هه‌موو کوردێک و له هه‌موو مرۆڤێکی ئازادیخوازی سه‌رانسه‌ری جیهان ئه‌که‌م. دڵنیام ساڵێک زیاتر له ئازادی و گه‌یشتن به ئاواته‌ ئینسانییه‌کانمان نزیکتر بووینه‌ته‌وه چونکه وه‌ک ئه‌ڵێن "ره‌وتی مێژوو بریتییه له کرانه‌وه‌ی تۆماری ئازادی"

باوه‌ڕیشمان وایه که:

 

"ره‌وڕه‌وه‌ی مێژوو به‌ره‌و پێش مل ئه‌نێ و ناچێته‌وه"

 

 

 

به‌یانی باش

  

 

له‌ گه‌ڵ تۆدام به‌یانیان كه‌ چاو هه‌ڵدێنم

له‌ كانیاوی كازیوه‌دا ده‌م و چاو ئه‌شۆم

هه‌ور خاولی و شنه‌ی به‌یان و خه‌نده‌ی تۆیش

ئه‌بن به عه‌ترێكی نه‌رم و

هه‌ناسه‌كانم پڕ ئه‌که‌ن له‌ تازه‌یی و...

به‌یانی باش

 

به‌خته‌وه‌رم كه‌ له‌ گه‌ڵتام

به‌خته‌وه‌رم كه‌ هی یه‌كین

به‌خته‌وه‌رم كه‌ له‌ كۆتای هه‌موو ئازار و خه‌مێكا

ئه‌گه‌ڕێمه‌وه‌ باوه‌شت

كه‌ له‌ كۆتای خه‌زانی پیری ته‌مه‌نا

ئه‌مبه‌یته‌وه‌ بۆ به‌هاری مناڵیم و

لێوم ئه‌نێی به‌ هه‌ناری به‌رۆكی یاده‌كانته‌وه‌

 

به‌یانی باش

ئه‌م به‌یانییه‌ و هه‌موو به‌یانانی پێشوو

ئه‌م به‌یانییه‌ و ئه‌وانه‌ی وا نه‌پشكووتوون

ئه‌وانه‌ی وا

پڕن له‌ ژه‌نینی شه‌رابی پرچه‌كانی تۆ

به‌ لێوی پڕ هه‌رزه‌كاریی

ئه‌ڕشه‌ی ده‌ قامكی ژه‌م‌بورده‌م

 

به‌یانی باش

چاوت پڕی حه‌یرانی سه‌وزی نێرگزن

ده‌نگت ته‌ژی

حه‌ریری ده‌سبازی نه‌سیم و چیمه‌نزار

ئامێز لانه‌ی ناسكترین ئه‌وینی خوا

دیسان چاوت

ئاخ چاوت!!

 

به‌یانی باش

بیست و یه‌ك ساڵه‌ له‌ گه‌ڵتام

ئیتر جاجمی ژووره‌كه‌م چۆن نابێته‌ به‌شێك له‌ كه‌لتوور و مێژووم

سه‌رینه‌كه‌م

چۆن پڕ نابێ له‌ پرووشه‌ی گوڵ‌مێخه‌ك و ره‌شه‌ رێحانه‌ی خاتره‌

په‌نجه‌ره‌كه‌م چۆن نابێته‌ ده‌لاقه‌یه‌ك بۆ فه‌لسه‌فیترین روانگه

بنار و پێده‌شت و هه‌موو نیشتمانم

چۆن نابێته‌ قیبله‌ و چۆن ئه‌توانم جێیان بێڵم

به‌ بێ ئه‌وه‌ی ده‌سنوێژ له‌ ئه‌وین هه‌ڵبه‌ستم و

به‌بێ ئه‌وه‌ی دوو ركات نوێژیان بۆ بكه‌م؟

 

هه‌موو رۆژێك به‌یانی باش

كۆڵانگه‌ڕیی هه‌رزه‌كاریم

له‌ گه‌ڵ تۆدا بۆته‌ گه‌ڕانی شه‌قام و

شه‌قامه‌كان

تینووی ده‌نگی هه‌نگاوی تۆ له‌ هه‌نگاوما

دووكانه‌كان

هه‌تا چاوی ده‌ڕابه‌یێك ئه‌كرێته‌وه‌

به‌یانی باشت لێ ئه‌كه‌ن له‌ شێوه‌ما

گه‌ر تۆ نه‌بای

هه‌ر هه‌موویان ئه‌كه‌وتنه‌ به‌ر چه‌پۆكانی ورچی پیری

له‌ گه‌ڵ هه‌موو هه‌ناسه‌یێك هه‌ڵیئه‌مژم

به‌یانی باش

له‌ خۆمه‌وه‌ هه‌تاكوو تۆ

له‌ تۆوه‌ تا چرۆترین خۆمه‌كانم

 

پڕ له‌ هزرێكی زوڵاڵی گۆرانیم و

له‌ گه‌ڵمدا پیاسه‌ی هه‌موو شه‌قامه‌كانی شار ئه‌كه‌ی

په‌نجه‌كانم ده‌ لاولاون

له‌ لاولاوی په‌نجه‌كانی تۆ ئاڵاون

بۆنی گوڵجاڕی بوونی تۆ

له‌ گه‌ڵ فێنكایی سروه‌و به‌یانییدا

ئه‌مخه‌نه‌ به‌ر تاڤگه‌ی زوڵاڵی خه‌یاڵ و

پڕم ئه‌كه‌ن له‌ هزرێكی روون و زوڵاڵی لاوك و

رێ ئه‌به‌مه‌ سه‌رچاوه‌كه‌ی روانینی خوا

ده‌نگه‌ده‌نگی رێبوار و شار

له‌ ئاهه‌نگی كه‌سك‌ره‌نگی ده‌نگی ناسكت هه‌ڵئه‌كشێ و

ئه‌بێته‌ خۆشترین سروود

ماشێنه‌كان به‌ ره‌نگاڵه‌ی نیگاكانتا ره‌ت ئه‌بن و ره‌نگ ئه‌گۆڕن

ئێسته ئاڵ و كه‌مێكیتر شێن و دواتر كه‌سك و ئه‌مجا زریقه‌رێژ

وه‌ك دامێنی كراسه‌كه‌ت

تاوێكیتر تریفه‌یی

وه‌ك مانگ له‌ ئاسمانی شه‌قام

ئه‌مجا...

 

من چیمه‌؟

پڕم له‌ هزری ناسك و ...

دكتۆراودكتۆر ئه‌مگێڕن

باسی تۆیان بۆ وه‌گێڕم!

كه‌ تێناگه‌ن

نوشته‌ی شیزۆفێڕنیم له‌ مل ئه‌كه‌ن.

 

من چیمه‌؟

بیست و یه‌ك ساڵه‌ له‌ گه‌ڵتام

به‌ سه‌عات و به‌ چركه‌كانی هه‌ناسه‌م

هه‌موو رۆژێكی ته‌مه‌نم به‌یانی باش

هه‌موو شه‌وێكی ته‌مه‌نم خه‌ونه‌كانی تۆ ئه‌یڕۆژن

هه‌موو خه‌ونێكی ته‌مه‌نم

ئیدامه‌كه‌ی ئه‌گاته‌ ده‌سته‌ملانی تۆ 

 

 

به‌ زمانی شیزۆفێڕنی یا چی زمانی دنیایه‌

به‌یانی باش

لێره‌كانێ نامهێڵن نامه‌ت بۆ بنووسم

ئه‌م شووڵه‌ ئاسنینانه‌

نامهێڵن لێو به‌ لێوته‌وه‌ بنووسێنم

ئه‌م هه‌موو ده‌رمانی خه‌و و ئارامبه‌خشه‌

شێتیان كردووم... ئه‌ممرێنن

 

به‌یانی باش

با نه‌شزانم سات و سه‌عات و شوێن و جێ

تا ئه‌ستێره‌ی به‌یانی چاوه‌كانی تۆم له‌ سه‌ر هه‌ڵبێ

پڕی رێگه‌ و چرۆی نه‌كراوه‌ی زه‌مانم

به‌یانی باش

هاتنی ساڵی تازه‌ی زایینی له هه‌موو گه‌لانی جیهان پیرۆز بێ

هیوادارم بۆ گه‌لی کوردیش 2014 پڕ بێ له ده‌ڵاقه‌ی نوێ و مژده‌ی تازه‌

ساڵی تازه ئه‌که‌م به بیانوویه‌ک بۆ  ئه‌وه‌ی خۆشه‌ویستی و ئه‌وینی خۆم

بۆ هه‌موو ئه‌وانه‌ی خۆشم‌ویستوون و خۆشیان‌ویستووم،تازه بکه‌مه‌وه.

هه‌روه‌ها زامی به‌سوێی کۆچی ناوه‌ختی ته‌های هه‌زار و یه‌ک سێو،

به‌و هیوایه ئه‌لاوێنمه‌وه که ساڵی تازه، ساڵی وه‌دیهاتنی

ئاره‌زووه سپی و خاوێنه‌کانی ئه‌و نازداره بێت

هه‌رمان

 

-1-

 

به‌رامبه‌ری ئاوێنه‌ی رۆحم وه‌ستاوی

ئه‌و شوێنانه‌ی

سیمات شیرین‌تر ئه‌نوێنن

ئه‌یانبڕی و

شێعر شێعر

ئه‌یاننێریته لاپه‌ڕه‌ی ده‌فته‌رمه‌وه

چاوه‌ڕوانی رۆژێک ئه‌که‌م

شاری رۆحم

بکه‌یته شاری ئاگر و

ئاواته‌کانیشم چه‌شنی ده‌سته‌چیله بسووتێنی

تاکوو له ناو کڵپه‌وگڕا

شێعرێک له وه‌زنی تریفه و

له ئاهه‌نگی ترپه‌باری شه‌وی  ژوان و

له به‌حرێکی تازه‌ی زوڵاڵتر له کانی

سه‌ر هه‌ڵدات و

جوانیت بکا به گۆرانی.

 

-2-

 

له‌تێکی گیانم ئه‌بڕیت و

بۆ ئازاری له‌ته‌که‌ی دی

وه‌کوو مناڵ

       به‌کوڵ ئه‌گری

 

-3-

 

رێم بردۆته هۆده‌هۆده‌ی

ئه‌شکه‌وتێکی شاراوه‌ی ون

وڵام، ئۆقره‌ی

زیندووبوون و گه‌وره‌بوونم پێ‌ده‌به‌خشێ:

من نه‌تخه‌مه توێ‌توێی پێستی هونه‌رمه‌وه

ئه‌وسا جوانییت

خۆری ئێواره‌ئاسایی

بۆ ناو گه‌رووی فه‌رامۆشی

                           ئه‌خشێ...

                               ئه‌خشێ...

 

  

بویته باران

داباریته وشکارۆی سوێری چاوانم

له گه‌ڵ زریان

بویته میوانی ئازیزی شه‌وی گیانم

وه‌کوو وشه

له‌نگرت گرت 

له ئاسمانی شێعری کڵۆڵی نه‌گبه‌تیم

 

وا رێژنه‌بارانی ئه‌سرین

وا هه‌نسکی ئازاره‌کانی بێ‌که‌سیم

سۆزێک له سوتماکی ده‌روون ئه‌لوورێنن

وا ده‌ په‌نجه‌ی حه‌سره‌ت‌گه‌سته‌م

چه‌مه‌ری بۆ جوانه‌مه‌رگی

ئه‌م به‌هاره ئه‌هۆننه‌وه

به قه‌سیده‌ی

شینی گرینێکی خه‌ستی بێ‌کۆتایی

 

ناخم له کۆچی بێ‌واده‌ت داڕماوه

نیگام

کۆتره‌باریکه‌ی ترساوی

به‌ر شاڵاوی واشه‌ی خه‌مه

ئه‌گه‌ڕێ به‌ شوێن چاوه‌کانتا

خۆی حه‌شار دا

هه‌ناسه‌کانم بۆنی تۆیان لێ‌دێ هاوڕێ

چاوه‌کانم

پڕن له کوێرایی و شه‌وی بێ‌کۆتایی

حه‌زیان وایه

له ده‌لاقه‌ی کامێراکه‌ی ده‌ستی تۆوه

بڕواننه ئه‌م دنیایه

 

ئاخ ته‌ها

چۆن به‌ ده‌ستی قه‌ده‌رێکی نائاسمانی

که‌وتینه بۆسه‌ی ئه‌هریمه‌ن

ئه‌بوو هه‌رگیز چاومان خافڵ نه‌کردایه

ئه‌بوو پاش مارف و ژیلا

ئه‌بوو پاش جه‌عفه‌ر و سواره

قه‌دری خه‌زنه‌کانی خۆمان بگرتایه

ئه‌بوو هه‌رچی ودم و دۆعای چاوه‌زاره

بماننووسیبایه هاوڕێ

ئه‌بوو له چی سه‌یاره و بازاڕ و شه‌قام

له چی دووکان و شۆسته‌یه

له چی حیزب و تاک و کۆیه

گوڵێکی ناسک و شلکی وه‌کوو تۆمان وه‌شاردایه

 

ئاخ چه‌ن کوێر بووین

دانه‌یه‌ک... دووان... سیان...

ئاخر تا که‌ی

ره‌مز و رازی مه‌سێجه‌کانی ئه‌هریمه‌ن

ناکه‌ینه‌وه؟

 

گه‌رچی هێڵی جوغڕافیا

وڵاتێکی پێ‌ نه‌به‌خشین

که‌چی هێشتا

ئێمه خه‌ڵکێکی ئاواره و بێ‌وڵات نین

وڵاتێکی به‌رین و گه‌وره‌مان هه‌یه

تێیدا یه‌کتر ئه‌گرینه‌وه

تێیدا شایی و شین ده‌گێڕین

ئه‌و وڵاته ناوی خه‌مه

ناوی مه‌رگه‌ساته، ده‌رده

ناوی هیوای جوانه‌مه‌رگ و

هه‌ناسه‌ی خه‌مناک و سه‌رده

رووباره‌کانی: فرمێسکی قه‌ت‌نه‌وه‌ستاو

ئاسمانه‌که‌ی: رووگه‌ی چاوی دڵداران و

خۆر و مانگ و ئه‌ستێره‌شمان

رێبواران و سه‌ردارانی وه‌کوو خۆتن

 

به‌ڵام ئێستا

له گه‌ڵ هه‌ڵقرچانی جه‌رگا

له گه‌ڵ رووباری ئازار و

ته‌م و خه‌می چاوه‌کانی پڕ له سۆما

ئه‌بێ چبکه‌م

 

رۆژه‌کانم هه‌رچۆنێ بێ

له ژاوه‌ژاوی بازاڕا ده‌خافڵێنم

به‌ڵام له‌گه‌ڵ خه‌ون و خه‌یاڵ

ساته قورس و خه‌سته‌کانی ته‌نیاییدا

ده چۆن رابێم

 

خۆزگه ئێستا له جیاتی تۆ

من ده‌بووم و

تۆ له ده‌لاقه‌ی کامێرای سه‌ر شانته‌وه

خه‌مه‌کان و هیواکانی ئه‌م هه‌رێمه‌ت

تۆمار ده‌کرد

 

کۆتره‌کانی وڵاتی من بوونه کۆچه‌ر

ئه‌ستێره‌کانی ئاسمانی وڵاتی من

بوونه کۆچه‌ر

گیانه‌کان و ژیانه‌کانی وڵاتی من

ئه‌نفال کران

په‌پووله‌کانی شیناوێم ره‌ش هه‌ڵگه‌ڕان

دره‌خت و شینایی چیا

له به‌ر شاڵاوی خه‌رده‌لا

زه‌رد هه‌ڵگه‌ڕان

 

ئێمه ئه‌بێ

رابێین له گه‌ڵ وڵاتێکی بێ‌کۆترا

رابێین له گه‌ڵ

ئاسمانێکی ئه‌نفال‌کراو

رابێین له گه‌ڵ خه‌می ته‌نیایی و بێ‌که‌سی

له‌ گه‌ڵ سووتووی مناڵانمان

له گه‌ڵ چیای رووته‌ڵ له سه‌وزایی و ژیان

 

بێ‌هیوا بووین له قاییمی دیواره‌کانی پشتمان

له راوه‌ستاوی ئه‌ژنۆمان

له سه‌داقه‌تی په‌نجه‌کان

له‌ ئاراسته‌ی ئه‌و ڕێگایه‌ی پێیدا ئه‌ڕۆین

 

تۆ هاتیت و

له ده‌لاقه‌ی کامێراکه‌ی سه‌ر شانته‌وه

نیشانت داین

که هه‌ر خۆمان

ئه‌ستێره و مانگ و هه‌تاوین

ته‌نیا خۆمان

رۆحی په‌پووله‌ی سووتاوین

بۆنی سه‌وزه و

دره‌ختی زه‌ردهه‌ڵگه‌ڕاوین

ته‌نیا خۆمان

پشتی ئه‌ستووری خۆمانین

هێزی ئه‌ژنۆ و

ده‌ستی بڕوا و

سه‌نگی سه‌بووری خۆمانین

 

پێوه‌ری ئێمه بۆ شکۆی که‌سه‌کانمان

مه‌رگ و ئه‌نفال و فتوایه

چبکه‌ین برا

چاره‌نووس و قه‌ده‌ر وایه

 

ئه‌هریمه‌ن بۆ مه‌رگی ئێمه فتوای داوه

ره‌نگه ئێسته چاوی حیزی هه‌ر زیته‌ی دێ

ئاخۆ ئه‌مجار

کام ئه‌ویندار

دڵی له هێڵی سووری ئه‌و گه‌رمتره

کام شۆڕه‌سوار

سه‌ری له هێڵی سووری ئه‌و به‌رزتره

کام سێو له‌م باخه سێوه‌دا

پتر له هێڵی سووری ئه‌و

بۆنی خۆشه‌ویستی ئه‌دا

 

به‌داخه‌وه ئه‌مجاره‌شیان

ئه‌هریمه‌ن زووتر له خۆمان

خه‌زنه‌کانی ئێمه‌ی بینی و

لێی فڕاندین

 

توخوا ته‌ها

چاوه‌کانتم لێ‌ دامه‌خه

هه‌زار پۆله‌کۆتری هیوا

وێڵن به‌دووی ئاسمانێکا

قووڵ و بێ‌بن و زوڵاڵ بێ

شه‌وه‌کانی

وه‌کوو چاوانی مه‌ندی خۆت

هێلانه‌ی مانگ و ئه‌ستێره و

رۆژه‌کانی

گه‌ش و دڵگر و ساماڵ بێ

 

هه‌تا دوێنێ خۆشه‌ویستیت

وڵاتێکی پێ‌ئه‌به‌خشین

پڕاوپڕی هیوا و ئه‌وین

ئێسته‌ش ئازاری هاوبه‌شی بێ‌تۆییه

نیشتمانی گه‌وره‌مانه

ناهێڵێ لێک بترازێین و

ناهێڵێ په‌رته‌وازه بین

نامه

 

كه سامی پڕ له غوربه‌تی

شه‌وی تاریکی ته‌نیایی

شارۆچکه‌که‌ی دڵی منی

به هێلانه‌ی ئارامی گرت

که فه‌لسه‌فه‌ی هه‌بوون و مان

له خه‌زانی بێ‌هاوده‌می

له‌رز گرتی و که‌وته گومان

دڵم، حه‌زم، هه‌ستم، گیانم

وه ئاره‌زووم

بوونه په‌نجه و

به خامه‌ی ئه‌شق

درگای به‌هاری نامه‌که‌ی

پڕ سکاڵامیان کرده‌وه

 

چه‌نده خۆیی

کۆت و به‌ندی وشه و رسته‌ی

حه‌زی تۆیان له گه‌ردن کرد

وه بوونه په‌یک

بۆ هێنانی ئه‌و په‌یامه‌ی

که دیده‌مان زۆر له‌وه‌پێش

له ژوانگه‌که‌ی پڕ له شه‌رمی رێی مه‌کته‌با

له گه‌ڵ رۆژباش

بۆ یه‌کیان برد

وام‌ده‌زانی به‌رده‌نووسی دڵی ئه‌تۆم

وه‌کوو شێعر خوێندۆته‌وه

وام‌ده‌زانی

ده‌روازه‌که‌ی سینه‌ی ئه‌تۆم

وه‌کوو ئه‌لبۆم کردۆته‌وه

وام‌ده‌زانی...

وام‌ده‌زانی...

ئێواره بوو

کۆڵان چۆڵ بوو

ئاسمان ماندووی گریانێ بوو

وه ره‌شه‌مه

خاڵی ره‌شی دیاری ئه‌کرد له رێگه‌ما

شه‌ماڵ خزی

وه گۆڕی رێ

هه‌رچیم که بوو

له له‌ت‌له‌تی نامه‌که‌ما

بردی به تاڵان و دزی

 

فرمێسکی خوا

له روومه‌تی هه‌ور تکا و

شیوه‌ن ئاهه‌نگی تک‌تکه‌ی بارانی گرت

وه من سه‌رخۆشی مه‌ی "شکان"

ديواره‌كانم كرد به پشت

وه بوومه هاوده‌می خه‌می قه‌ت‌نه‌مرم

پێ ناگرم

به‌و چاوانه وه‌ها که‌وتووم

که‌ تازه قه‌ت پێ ‌ناگرم

 

بۆچی وات كرد

ئازیزه‌که‌ی هۆش و بیرم

پیرۆزه‌که‌ی ئه‌ڵقه‌ی حه‌زم

بۆچی وات كرد؟!!!

تاوان چبوو

جگه له‌وه‌ی خۆشم ویستی

جگه له‌وه‌ی

رازی دڵی گه‌رم و ته‌نیام

وه‌کوو ده‌ستێکی رووخراو

بۆ ده‌رخستی

زۆر له مێژه وه‌کوو زاهید

گۆشه‌نشین و چۆڵ‌گه‌ڕم

له کونجی میحرابی دڵا

هه‌گبه‌یه‌کی پڕنیازم

له باوه‌شی

حه‌ز و هه‌ستی بریندارما هه‌ڵگرتووه

هه‌موو رۆژێ ئێوارانه

جارێ سوجده‌ی له‌ بۆ ده‌به‌م

رۆحی ئه‌شقی شه‌ق‌کراومه

له بلووری تێک‌شكاوی غرووری دڵ

قه‌ت نامرێ و هه‌ر زیندووه

 

هه‌ر زيندووه

به‌ڵام زامار

به‌ڵام خه‌سته و په‌رۆش و زار

لام پیرۆزه

ته‌نیا یادگاری ژینمه

وه‌کوو به‌هاری کوردستان

وه‌ک نه‌ورۆزه‌

 

بیره‌وه‌رییه‌کانی لادێ

 

... 

هه‌تا کزربوونی هه‌تاو
خۆمان ئه‌دایه ده‌ستی ئاو

ئاسمانه یا رووباری شین
باسکه‌مه‌له‌ یا هه‌ڵفڕین

پڕژه پڕژی شه‌ڕه‌ئاوه
کۆلکه‌زێڕینه وه‌ستاوه

که شل ئه‌بووین که‌نفت و خاو
جێمان‌ئه‌هێشت به‌هه‌شتی ئاو

له بات کڵاوێک بۆ سێبه‌ر
تونکه‌ی ته‌ڕمان ئه‌کرده سه‌ر

به لاژه لاژ و خاوه خاو
هه‌ڵئه‌کشاین هه‌نگاو هه‌نگاو

ئه‌گه‌شتینه قه‌راغی دێ
له‌ش تینێکی تێ‌ئه‌گه‌ڕێ

به‌ڵام تامی مزره‌گڕکان
ئه‌ژنۆی رۆشتنمانی ئه‌شکان

ئه‌بوو هێزێکمان بێته به‌ر
بێستان بێستان، دێبه‌ر دێبه‌ر

ترۆزی و کاڵه‌کی شیرین
ره‌شه‌تووتڕکی ناو په‌رژین

تا باخه‌وان سۆسه‌ی ئه‌کرد
مناڵ چێژی خۆی لێ‌ئه‌برد

جارجار شووڵێکی ئه‌وه‌شان
خه‌تی ئه‌خسته ده‌فه‌ی شان

گریان تێکه‌ڵ به‌ پێکه‌نین
ئه‌بوه نوقڵی ترش و شیرین

ئه‌تکایه سه‌ر لێوی هه‌ناو
شیله‌ی ئێش و نۆش تێکه‌ڵاو

***

که زه‌رده‌په‌ڕ له‌و دۆڵه‌دا
شه‌وی ره‌شی لێ مۆڵ ئه‌دا

په‌ل و پۆپی سووره‌چنار
بۆ چۆله‌کان ئه‌بوو به‌ شار

جریوه‌یان به سه‌دهه‌زار
هه‌ڵنیشتووانی نادیار

زه‌ڕنه‌قووته‌ی هه‌ر ئه‌و به‌هار
بێ‌هێلانه و بێ‌جووت و یار

وه‌کوو کایه‌ی سه‌ری شه‌وان
ئه‌که‌وتینه وێزه‌ی ئه‌وان

هه‌ر به‌ شۆخی به‌رد و پلار
هه‌ر به‌ڕاستی ئه‌که‌وتنه خوار

بۆوان باڵه‌پڕژه‌ و برین
بۆ ئێمه خۆشی و پێکه‌نین



شه‌وه کاتی نان‌خواردنه
سینی هێنان و بردنه

ئێمه‌ی مناڵ لێره له‌وێ
کوا سینی‌مان به‌رئه‌که‌و‌ێ

به‌ڵام که‌سیش بێ‌به‌ش نابێ
سه‌ر و بابۆڵه‌مان واپێ

بابۆڵه‌ی چی، میتر ئه‌بێ
ده‌م و کاکیله شل ئه‌بێ

که شه‌و ئه‌گه‌شته دره‌نگان
ئه‌کوژاوه چرای دیوه‌خان

ده‌نگی دایه‌گه‌وره‌ی به‌ساڵ
ئه‌یبردینه دنیای خه‌یاڵ

دێوه‌ڕه‌ش به فێڵ و گزی
کچه شازاده‌ی ئه‌دزی

ئێمه‌ی ماندووی رۆژی کایه
کوا تینێکی وامان تیایه

دانیشین ئاخۆ شازاده
دیلی دێوه یا ئازاده

مه‌یل ئه‌دا به‌و خونکاره
یا دێو له‌ تاوی خه‌مباره

له‌به‌ر ئێش و ئازار و ژان
ناچار ئه‌خوا شازاده‌ی جوان

ئیتر خه‌وی شه‌وی هاوین
خۆمان له ئامێزی هاوین

بیکه‌ینه توێشووی رۆژگار
بۆ رۆژانی سه‌خت و دژوار

ئێستا خه‌ممان بێ‌خه‌میه
دواڕۆژ کێ ئه‌زانێ چییه

...

 

ئازیزه‌که‌م

بشێ رۆژێک بۆم بلوێ

کۆرپه‌ی دڵم

                 له ناو بێشکه‌ی سنگتا بنوێ

تۆ بڵێی رۆژێک به‌ یه‌ک بگه‌ین، بۆ یه‌ک ببین

له گوڵزاری ژینا به جووت ده‌ست بگرین

تۆ بڵێی داری به‌زه‌یی خواش بێته به‌ر

ئه‌م دوو دڵه ببن به هاوڕێ و هاوسه‌ر

کۆرپه‌یه‌کی وه‌ک خۆت جوانمان پێ‌ببڕێ

تروسکه‌ی هیوای کورد بێ و

مه‌شخه‌ڵی رزگاری هه‌ڵگرێ

خه‌ون

له‌و خه‌ونه‌دا

که داییره‌ی ئه‌وین و هه‌ست

شوعاعی بێ‌نیهایه‌ت بوو

له‌و خه‌ونه‌دا

که‌ نه‌رمه هه‌وری عاتیفه

له‌مس ده‌کرا و

سنگی هه‌زار حیکایه‌ت بوو

له یادمه چه‌نده تینوو

ماسیی نیگام

هاویشته نێو ده‌ریای که‌سکی چاوه‌کانت

له یادمه

سوێری ئه‌سرینی دیده‌م و

مزری ماچی لێوی ئه‌تۆم چۆن هه‌ست ئه‌کرد

له یادمه

که بولبولی ده‌م به چریکه‌ی ئاره‌زووم

چلۆن به بۆنی میخه‌ک و

سمڵ و رێحانه‌ی باوه‌شی تۆ مه‌ست ئه‌کرد

ئه‌مدی خواوه‌ند

له هه‌وری چاوی مانگه‌وه

تریفه چۆن کلوو کلوو

به سه‌ر قژ و روخسارتا ئه‌بارێنێ

هه‌ستم ئه‌کرد

که‌ بازی دیده‌کانی تۆ

چلۆن قه‌لی

شعوور و هۆشی روو ره‌شم

به یه‌ک نیگا ئه‌تارێنێ

ئه‌مدی زه‌مان

له به‌سته‌ری گه‌رمی نیگاهی ئێمه‌دا

خه‌ریکه سه‌رخه‌و ئه‌شکێنێ

وه سه‌مفۆنیای ئه‌به‌دییه‌ت

گه‌رم و به سۆز

"ژیان ژیان" ئه‌چریکێنێ

 

به‌ڵام هه‌زار ئه‌فسووس و خه‌م

که ڕاچه‌نیم

وه ئه‌ندامی کفتی خه‌وی خۆمم بزاوت

چم پێ نه‌کرا

ته‌نیا... ته‌نیا

هه‌ناسه‌یه‌ک شه‌ڵاڵی ته‌م

 

له‌و خه‌ونه‌دا

که‌ هه‌ست حه‌قیقه‌تی وجوودی له‌مس ئه‌کرد

له‌و خه‌ونه‌دا

که‌ جه‌و له‌ به‌ینی راز و جواب

له به‌ینی چاوه‌کانی تۆ و دوو چاوی من

ئه‌بوو به پرد

له‌و خه‌ونه‌دا

که گه‌ر به ئه‌شقی دیتنی تۆ نه‌بایه

رۆحم بۆ نێو رۆحت ئه‌خزا

وه‌ک یادگار

ته‌نیا نیشانه‌ی پرسیارێکم هێناوه

هێند مه‌زنه

هه‌موو ژیانی وشیاریم

شانه‌وشانی وی داناوه!

سه‌مای فریشته

له گۆڤه‌ندی دوو ئه‌ستێره‌ی وێڵ و ته‌نیا

پۆل پۆل فریشته‌ی جریوه هاتنه سه‌ما

له گۆڤه‌ندی یه‌که‌م نیگاکه‌ی ئێمه‌شدا

کۆرپه‌یه‌کی دڵ‌ناسکی خۆشه‌ویستی هاته دنیا

به بێ‌ئارام خۆ ده‌بات و خۆ وێک‌دێنێ

دڵی منیش

له‌وی گه‌لێ بێ‌ئارام‌تر

رایده‌ژێنێ

رایده‌ژێنێ

رایده‌ژێنێ

سنوور

ئه‌مشه‌و شێعرم لێ‌ بۆته بووک

تارایه‌کی ئه‌فسووناوی رووی پۆشیوه

تارا سنووری مین‌رێژه

من له‌م دیوم

ئه‌و له‌و دیوه

شێعری نامۆ

شاعیرێک بوو

له گێژاوی خه‌یاڵی شاعیرانه‌دا

وه‌کوو کرمی ئاوریشمی

ده‌ور و به‌ری له خۆی ته‌نی

خه‌ڵک هه‌موو بڕیاریان دا که بێ‌ده‌نگ بن

نه‌با خه‌لسه‌ی شاعیرانه‌ی لێ تێک درێ

وه‌کوو گلێنه‌ی چاوانیان پاراستیان

وتیان نه‌با

په‌پووله‌کانى شێعرێکی

خه‌ویان بزرێ

رۆژگار رابورد و هاته ده‌ر

که‌سی نه‌دوان

لووتی نابوو به بانیژه‌ی ئاسمانه‌وه و

ئه‌یوت نزمه!

که ده‌فته‌ری له چاپ درا

خه‌ڵک هاتن

شێعره‌کانیان پاک پشکنی

به‌ڵام شێعر هه‌موو نامۆ

هه‌موو مردوو

ئه‌و شاعیره

له گێژاوی خه‌یاڵی شاعیرانه‌دا

خه‌ڵکه‌که‌ی خۆی

ون کردبوو

سه‌عاتی سفر

 

ژوورێکم بوو زۆر ئاسایی؛

چوار دیوار و درگایه‌ک و په‌‌نجه‌ره‌یه‌ک.

له‌و رۆژه‌ی‌را کردته ژوانگه

گیانی زیندووی له‌به‌ر دایه

جێم هێشتووه‌ و

که‌چی ئێسته‌یش وا هه‌ست ئه‌که‌م

چاوێکی من له‌وێ ماوه و

له په‌نجه‌ره‌ی ئه‌و ژووره‌وه

ئه‌ڕوانێته ئه‌م دنیایه

 

كات…

سڕه‌ ئه‌مشه‌و … ناڕوات

ناسكۆله‌،

وه‌ڵامه‌كه‌م چی به‌سه‌رهات؟

زووكه‌…

بۆ نازانی؟

بۆ نازانی چه‌ند درێژه‌

عومری شه‌وی چاوه‌ڕوانی؟!

ناسكۆڵه‌

په‌پووله‌یه‌ك هه‌ر دوو باڵی بۆته‌ ده‌فته‌ر

كه‌ تۆ شێعری وه‌ڵامێكی بخه‌یته‌ سه‌ر

زوو كه‌…

تو خوا زووكه‌…

كات…

سڕه‌ ئه‌مشه‌و … ناڕوات

عومری شه‌وی چاوه‌ڕوانیش

درێژه‌ و هه‌ر نابڕێته‌وه‌ …

ئه‌زانم جارێكیتر ناڕوێمه‌وه

ئه‌زانم

له گه‌ڵ وه‌رینی ئه‌م جاره‌م

له ئاسمانی هیچ ئه‌شقێكا

به باڵای خوادا

هه‌ڵنازنێمه‌وه.


ئه‌زانم

له سووتانی به‌ر برووسكه‌ی ئه‌م ئێواره‌وه

تا ما‌ڵاواییم له خاك و له خوا

تازه دوو چاوی تاسه‌باری من

به دره‌ختی هیچ باڵایه‌كدا نابنه‌وه چرۆ

ئه‌زانم

پاش لێك‌ترازانی من و تۆ

ده‌لاقه‌ی ژوان

به روومانا هه‌ڵئه‌پێكرێ بۆ هه‌تا هه‌تا

سه‌رمامه…

هه‌ر ئێستاكه به ماچێكت دامگیرسێنه

وه‌كوو مناڵ

سه‌رم بگره له ئامێز و

به‌فری مه‌رگ

له كاكۆڵ و شانی رۆحم داته‌كێنه

(1)

له‌ سه‌ر گوێسه‌بانه‌ی ماڵه‌كه‌تان راوه‌ستابووی

ده‌ستت نابووه‌ به‌ر كه‌له‌كه‌و

به‌ فیزه‌وه‌ لێت ئه‌ڕوانیم.

وتت: «ئاده‌ی نه‌ختێك چه‌توونی بنوێنه‌!»

نه‌مزانی چه‌توونی چیه‌… چی بنوێنم؟

تۆ جارێ‌ با به‌ چڵاكێك

شانه‌ زه‌رگه‌ته‌ی ژێر قاچت بورووژێنم.

(2)

ئای له‌و هه‌موو دڵخۆشییه‌ی

كاتێك ئاوی بنجۆكه‌مان

ئه‌كرده‌ سه‌ر جاده‌ی لێژی به‌ر ئاوایی و

ئه‌وسا گرمه‌ و ناڵه‌ی ماشێن

تا سه‌ره‌وه‌ بوكسه‌وادو

دواتر پاشه‌ و پاش خلیسكێن.


(3)

له‌ گه‌ڵ به‌هنام

جارجار نێوانمان تێك ئه‌چوو

لووتمان له‌ یه‌كتر ئه‌كرد و

ئیتر ته‌پ تا رۆژی حه‌شر.

ئای له‌ مه‌ودای ئه‌و رۆژانه‌ی

ئه‌مانبڕی به‌ بێ‌یه‌كتر!!

هه‌تا ئه‌گه‌شته‌ ئێوارێ‌

دزه‌نیگامان له‌ سه‌ر یه‌ك هه‌ڵنه‌ئه‌گرت

سه‌د هێنده‌ی رۆژانی ئاشتی

یه‌كترمان لا شیرین‌تر بوو

سه‌د هێنده‌ی رۆژانی پێشوو

خۆری دۆستی به‌تین‌تر بوو


(4)

خاتوون

له‌ پاش ئه‌و ماچه‌ی دوێنێكه‌

هه‌تا ئێستایش

ده‌مم سوێره‌

وه‌كوو تۆپه‌ خوێم مژیبێ‌ وایه‌

تكایه‌

بۆ ماچه‌كه‌ی ئه‌م ئێواره‌

تۆزێ ده‌م و چاوت بشۆ

كچێ‌ به‌خوا چت لێ نایه‌

(5)
سه‌ره‌تای شه‌و

ئه‌و كاتانه‌ی كه‌ په‌نجه‌ره‌ی ماڵانی دێ‌

یه‌ك یه‌ك… دوو دوو

لاله‌ی چرای تیا ده‌پشكوێ‌

كه‌ غه‌ڵبه‌غه‌ڵبی به‌رغه‌ل و كابانی ماڵ

دا ئه‌مركێ‌

به‌ سه‌ره‌یش بێ‌

نۆبه‌ ئه‌گاته‌ دوو شتان

قڕه‌قڕی بۆقی چۆم و

غژه‌غژی رادوێی سه‌ربان

سێعری خۆفرۆشی

فلیمه‌كه‌

باسی ئه‌وسه‌ری دنیا بوو

له‌ نیوه‌یا ئه‌كته‌رێكیان

وه‌ك بروسكه‌ی به‌ تاو و جۆش

تفی هاویشت بۆ نێوچاوی

ئه‌كته‌رێكی دیكه‌ و پێی وت:

له‌‌ په‌ناما

پڕ به‌ پڕی خۆی داچڵه‌كی

هه‌ستا سینه‌مای به‌ جێ‌ هێشت

له‌و فیلمه‌دا خۆی ناسی‌بوو

ئاخر ئه‌ویش

نرخ و سێعری خۆفرۆشی،

به‌ شانیه‌وه‌ هه‌ڵواسیبوو…

ته‌رجه‌مه‌ی شێعری «خارکش پیر»ی عه‌بدولڕه‌حمانی جامی

پیره‌ پیاوێ به‌ هه‌ژاری ناودار

له‌نگه‌ له‌نگ چی قه‌ده‌مێكی ده‌ینا

كه‌ی به‌رزراگری ئه‌م ئاسمانه‌

چاو ده‌كه‌م هه‌ر له‌ یه‌خه‌م تا به‌ر پێم

گه‌نجی به‌خت و كه‌ره‌مت پێ‌داوم

كوانێ‌ حه‌ددم كه‌ سه‌نای تۆ بێرم؟

نه‌وجه‌وانێ‌ به‌ جه‌وانی مه‌غروور

هاته‌گوێی حه‌مد و سه‌نای مامه‌ی پیر

بارت چقڵه‌ و به‌ گرانێك ده‌یبه‌ی

پووش و سه‌نگ هه‌ر دوو له‌ لات یه‌كسانه‌

پیر وتی به‌رزی له‌مه‌ زیاتر كوا

كه‌ فڵانی بده‌ پێم پۆشاكێ‌

شوكر ئه‌ڵێم چونكه‌ منی خار نه‌كرد

هه‌مدسان چاوی نه‌كرد غافڵ لێم

چاوی تێر هه‌م سه‌رفرازی دا پێم

ئه‌و هه‌تاوه‌ كاكۆڵ زێڕینه‌ی له‌ دوندی ئه‌شته‌رانكۆوه‌ ئاوا بوو

له‌ فه‌رهه‌نگی ئه‌ندێشه‌ما

تۆ بووی واتای به‌رزیت به‌خشی

به‌ لوتكه‌ و

فڕین به‌ هه‌ڵۆ

كاتێ‌ ده‌ستت له‌ داوێنی بنار به‌ردا

بێ‌ یادی تۆ ئه‌شته‌رانكۆ

شاخێكی ساردی بێ‌ رۆحه‌ و

بێ‌هه‌ناسه‌

به‌ڵام ئێستا‌

ئه‌شته‌رانكۆ یانی تۆ

ئه‌م ئێواره‌كانیی چاوم

به‌ سوێرترین ئه‌سرین ته‌قی و

په‌نجه‌ره‌یێك

تا ئه‌و په‌ڕی سه‌رگه‌ردانی ونی كردم

گیان كه‌وته‌ به‌ر

وه‌رزێكی لێڵی خۆڵ‌بارین

ده‌مم پڕ بوو له‌ بۆنی گڵ

هۆ كاكاغا

زوو زوو وه‌ره‌ و سه‌ردانم كه‌

درگای خه‌ون و خه‌یاڵ هه‌ر ده‌م ئاوه‌ڵایه‌

ئاخر كه‌ دێی

تامی چایی قاوه‌خانه‌كه‌ی هه‌یجانان

تامی تفتی ده‌مم ئه‌با

ئاخر كه‌ دێی

باخه‌ڵ پڕ ئه‌بێ‌ له‌ بۆنی

ره‌شه‌رێحانه‌ی به‌ر هه‌تاو

ده‌سته‌كانم

بۆنی شه‌مامه‌ هه‌ڵئه‌گرن

درگای چاوم هه‌ڵئه‌پێكم

به‌ری رۆشتنت لێ بگرن

89/4/1

سه‌رژمێری


كاكێشانه‌ چاوگه‌شه‌كه‌

تۆ پێم بڵێ‌؛

شه‌وان ئه‌ستێره‌كانی خۆت ئه‌ژمێری –یان-

هه‌روا به‌ خوایان ئه‌سپێری؟

له‌ وڵاتی من …

هه‌موو دایكێ‌…

هه‌موو شه‌وێ‌…

تا كۆرپه‌كانی نه‌ژمێرێ‌،

خه‌و له‌ چاوانی ناكه‌وێ‌!

شه‌وشه‌وێكیش ئارامی شار

- پاش ئه‌ژماردن -

به‌ قه‌مچی هاواری دایكێك راپێچ ئه‌كرێ‌ و

له‌ گه‌ڵ جوانێك 

ئه‌درێ‌ له‌ دار…

وه‌كوو ئه‌ستێره‌ دایپۆشێ‌ مژ و ته‌م

سریوه‌ی ون ببێ‌، په‌یدا به‌ ئه‌سته‌م

زریزه‌ی كاڵه‌واشی سه‌ر كراسی

كچی ناكامی قه‌یره‌ی دڵ به‌ ماته‌م

وه‌ها شێعرم له‌ سووتانه‌ له‌ سینه‌م

كه‌ پینهانه‌ به‌ زۆری ئاشكرا كه‌م

منی راوچی ته‌مای نێچیری چی كه‌م

له‌ له‌رزۆكی ده‌س و ئاشووبی دیده‌م

حه‌شار كه‌وگیره‌ هه‌ڵگیراوه‌ جاسووس

نه‌ ده‌نگێوم نه‌ سه‌برێ‌ وا كه‌وی كه‌م

نیشانه‌ی ئه‌و دڵه‌م گه‌ر هات و هاتی:

پڕی ئه‌ستێره‌یه‌، ساماڵ و ته‌م هه‌م

ده‌مه‌و ساڵێكه‌ وا لاولاوی لاویم

نه‌ ته‌قسیرێ‌… نه‌ ته‌گبیرێ‌، خودایا

چ خاكێ‌ كه‌م به‌ سه‌ردا من، چ خاكێ‌؟

نیگا مۆڵه‌ق به‌ ئینتیزاری تۆوه‌ن

ده‌مه‌و ساڵێكه‌ هۆش و هه‌ست و تاسه‌م

وه‌كوو خاڵێ‌ به‌ رووی گوڵزاری تۆوه‌ن

له‌ لام تۆراوه‌ دڵ دوور كه‌وتوو ون بوو

ده‌مه‌و ساڵێكه‌ دیده‌م پێكی ئه‌شكه‌

ئه‌وا ئه‌مشه‌و له‌ كوڵدا سه‌رنخوون بوو

گوڵه‌ندام تا به‌كه‌ی نایێیته‌ فریام

دره‌نگه‌ ژاڵه‌كه‌ی كوێستانی بانه‌م

وه‌ره‌ كوێر بووم له‌ دووریت، هێنده‌ گریام

هه‌تا تیری فیراقت جه‌رگی پێكا

له‌ جه‌رگه‌ی سینه‌ما ئاهه‌نگێ‌ به‌رپا

له‌ زه‌ربی نامورادی، چه‌نگی دووری

كه‌مانی عاتیفه‌م هاتۆته‌ سه‌ودا

ده‌فی دڵ زرموكوت كه‌وتۆته‌ ناڵیین

نه‌یی قه‌ددم به‌ تاوی تاسه‌ سووتا

كه‌ دیده‌م تاری گرت گریه‌ی نه‌كیسا

ده‌یان مارش و سروودی خسته‌ ده‌م با

((منم سه‌ركرده‌تان بۆ له‌شكری غه‌م))

له‌ سای سوڵتانی عیشقی جیبهه‌ئارا

له‌ ئاته‌شگه‌ی فیراقت بوومه‌ خاوه‌ن

سوپاه‌ و ده‌وڵه‌ت و پاته‌خت و ئاڵا

وه‌كوو كۆماره‌كه‌ی كوردی، ویساڵت

ته‌مه‌ن كورت و به‌ جه‌زبه‌ و به‌رزه‌ باڵا