اوزاق یول

اولماقدان _ اؤلمه گه

..........

محمودخان 

نگارجان 

.....

دوم دوم چالینیر جنگ ناما قسسی 

چکیلیر کول قوپولور هلهله هئی هئی

آسیلیر داغلارا بایداق

باش اه ییر چوللره بویناق

ال وئریر قیشلاغا ییلاق

دوم دوم چالینیر جنگ ناما قسسی

گوتورور دایاغی جئیداق

ایگیدینگ غمزه سی ائیناق

سالیبان داغ و دوزه زلزله هئی هئی

اوسالار هلهله چالیر

آی و گونلر

وئریبان ال اله چالیر

بولوتوم نور یاغیر آی دان

گونوموز یار گله چالیر

نه گؤزل بیزیم ائله

           یار گله هئی هئی

یول ها یول چایلاری اوینار

کیشنه یه ر آتی هلئیوان هله هئی هئی

قولونو دای لاری اوینار

بورخولار بورماغی آیینگ

توکولر عرقی چایینگ

بوغولار قایغی بوغازی

بوغازیم وایلاری اوینار

پرری لر اوجومدا اولدوز

       گؤلومونگ آیلاری اوینار

یئل دولو تاب و توان دیر 

                      گول دولو حوصله هئی هئی

دوم دوم چالینیر جنگ ناما قسسی

چکیلیر گول قوپولور هلهله هئی هئی

چیرپینیر گؤومده آسلان

اقیشیر قیچیمده جئیران

قازیلیر دؤشومده کگلیگ

یواسی اوجومدا ترلان

سسله نیر ایچیمده بیرنوو

چالینیر شیرین نه خسروو

غم یئیه م غوصا یئیه م 

حاشا کی یوو یوو

کرمینگ اصلی سی اصلی

من سنم قریبه تانیش

نیگارینگ محمودو گلمیش

چکه های های سالا قیرغوو

قوشمالار باغی بوتون ولوله هئی هئی

دوم دوم چالینیر جنگ ناما قسسی

چکیلیر گول قوپولور هلهله هئی هئی

مأذونونگ شعری قوپور

یوسوفونگ خسروو سولطان

سه تارینگ آتاسی داوود

داوودونگ حبیبی خان دیر

فرودونگ فرهادی شیرین

نیگارینگ محمودو گلمیش

ییرلایار شعری چالار

قمیشلرینگ نفسی

گوینومونگ گول هوسی

ائلیمینگ گؤزل سسی

ائلیمینگ صولتی دیر کوراوغلوسو

باخیرام هئیبتینه گؤز دولوسو

قوماشیر گؤز، دولاشیر دیل 

دوشورم ساز و طربدن اوخورام شاه ختایی:

((قره داغا قار یاغاندا داشلاری بیربیر اوچار

توی یاتار مطرب قوجالیر رنگ و تار الدن گئدر))

نگارجان 

محمودخان

نگار داغی هامی داغدان اوجادیر

محمود داغی هامی داغدان آغیر

چکمیشم بیر قیراغا 

و بو مسئله هئی هئی

((بو باهاردا هر نه وارینگ وئر مئی یه شاد ایچ گینن

تا گؤزونگ آچیب یومانچاز بو باهار الدن گئدر))

دوم دوم چالینیر جنگ ناما سسی ....

...

محمودخان: محمودخان اسکندری قشقایینینگ بویوگ عالیمی شعر و موسیقی حوزه سینده کی گئدن ایل (1394 ) ده دونیاسینی ده ییشدی 

نگارجان: محمودونگ معشوقه سی ( نگار و محمود عاشقانه بیر داستان )

فرود و فرهاد: فرود و فرهاد گرگین پور قشقایی نینگ بویوگ موزیسین لری 

داوود: داوود نکیسا قشقایی دا یاخچی سه تار چالان و حبیب خان گرگین پورونگ اوستادی

 مأذون و یوسف( یوسفعلی به ی ) : قشقایینینگ معروف شاعیرلاری 

سولطان : یوسفعلی به ی معشوقه سی 

اوچ آساناک ( بایاتی) قشقاینینگ فولکلور ادبیاتیندان

سرحدینگ یئلی اسدی

سوووغو منی کسدی

بیر گؤزوم یارا قوربان

بیر گؤزوم منه بسدی

*****************

اوغول دونونگ قه یطانی

یولونان گئد یول تانی

من کی یارینگ ده‌ییلم

گئد یارینگی بول تانی

****************

قه‌یلانینگ چاغ چاغیندا

چکه‎یدیم چاغ چاغیندا

گیره یدیم یار قوینونا

سققلیم آغ چاغیندا

بو آدرس ده منیم  دانیشیغیمی رادیو /یاسوجونان/ ائشیدینگ

http://www.uplooder.net/cgi-bin/dl.cgi?key=87f6b9d82668a0b73b62825cd85bbc75

آغیر ائل برناماسی/ حورمتلی دوستوموز نوذر استوار ایجراسی نان

سون مکتوب

بوناما سون مکتوبوم دور

و بو قوشما آخیرکی یازما دیر سنه

نه سه‌ومکدن بیر سؤزوم وار

نه آغیزیمدا دیلیم واردیر

نه بیر ایشارا آنگلایان

گچمیش گونلر:

آدینگ بولاغیندان آندلار ایچیردیم

قاشلارینگ قافیندان قورآن اوخوردوم

اوزونگ قیبله‌سینده نامازیم اولمازدی قضا

اووجونگ یواناغی ا‌ه‌‌ویم دیرلیگیم

آما ایندی:

نه یالواردام نه یاخاردام

نه ساچلارینگ هؤروموندان گؤی قوشما مونجوغو آسدام

نه من مجنون فرهاد اولدام

نه سن شیرین لئیلی تکین

نه من گؤرمه‌گینگه حسرت

نه ده اونوم دالیمدادیر

گئدیرم بو اوزاق یولو

بو گئدیش سونکو گئدمگ دیر

گچمیش گونلر تکین بودا گلر گچر

گئدن قیش تک

اوزو قره کؤمور قالیر...

هاردایانگ ؟

هاردایانگ سن آی وفاسیز هاردایانگ؟

سن جووغالی من یالینگیز هاردایانگ؟

گلین الینگ قالدی اؤزگه الینده

بیر دئ گؤرم ایندی من سیز هاردایانگ؟

تورک ائلینده گون آیلاردان سورموشام

دوغو، باتی، قوزایلاردان سورموشام

یاکوتلاردان آلتایلاردان سورموشام

استانبولدا، اوروم، تبریز هاردایانگ؟

آینایا باخ اوزونگو گؤر اؤزونگده

هر نه یاخچی یامان واردیر اؤزونگده

کور اوغلونونگ هیبتی وار اوزونگده

قاشی تیمور گؤزو چینگیز هاردایانگ؟

گل ای منیم اورگیمی قوپاردان

دیندیر منه او سیتاردان او تاردان

هانی ائلدن هانی بویدان تباردان

تورکمنه‌نگ، قازاق، قیرقیز هاردایانگ؟

ملک یازار قره مکتوب چینیمده

بیلمم سن سیز نه یازغی وار اونومده

ایشیق گتیر منیم قره گونومده

هیلال قاشلیم اوزو گوندوز هاردایانگ؟

هاردایانگ سن؟ سندن سورا سولدو یاز

آیریلیقدان منه هرنه اولدو یاز

مدت دیر کی هئچنه منی جوشدورماز

داریخمیشام بعد_ ی هرگیز هاردایانگ؟

یئر قورشاغی گول اوزونگدن آلار رنگ

آسیماندان یئر اوزونه گله‌رنگ

چوخ قریبم من سنم یا سن مننگ؟

یئددی ایلده اولدو سکیز هاردایانگ؟

                              قزاقستان، تورکستان شهری92/2/14

        قشقایی یازاری محمد هنرمند شیش به‌ی‌لی طایفاسیندان « قانون قبیله‌ی پدری» آدلی رومانینی 1389 جی ایلده یاییملاندیرمیش. بو کیتاب گرچکدن «ادبی،فرهنگی،اجتماعی، سیاسی و ...» باخیمدان بیر اوخومالی کیتاب دیر.

        «به او گفته بودم تصويري كه بعضي وقت‌ها آنسوي آينه مي‌بينم، خطري را متوجه زندگي مشتركمان نمي‌كند. گفته بودم در فرهنگ قبيله‌اي ما، اولين عشق هر دلداده‌اي با دختر دلخواهش، اين‌گونه كليد مي‌خورد...»

حیات یولداشیم ایچین

قشقایی گول منیم اینن یولا گل

من گئدیرم سنده استانبولا گل

بیر دامچایدیم باتمیشام آغ دنگیزه

اوز و ایزله منی بولا بولا گل

یوردو بولوب یورد داشینی سالمیشام

آغ سارای دان بوکول بیر آز سولا گل

دیلی باغلی چوخولاری بئله ک له

دوش بو یولا قوی هرنه سیر اولا گل

بو آیریلیق آغیر ائله چتین دیر

قویما گؤزوم بوز تورپاقدان دولا گل

آیاق یالین، باشینگ آچیق، قارنینگ آج

سو الینگده قوی یئره دوش یولا گل

گول دیلینگی گؤتور قوتار دؤگوشدن

*صولتیمز گلمز  یولدان بئله گل

* «صابا قونداگ استانبولونگ دوزونه»

گلمز گلین باشا دوواق دولا گل

اولما رضا*، آسینا*میز پوزولا

قویما گولوم قونچاسیندا سولا گل

                                                   92/2/11استانبول

....................................................................

*قشقایی ائلخانی صولت الدوله دئییرلر: رضا شاه سیتمدن قشقایی ائلینی کؤچرد تورکیه تورپاغینا...

صولت الدوله بویورار کی: ائلی آپاردیم تورپاغی نیج ائیلاییم؟!

..................................................................

قشقایی شعری:

*:صابا قونداگ استانبولونگ دوزونه         قوش آتاراگ اوردکینه قازینا

...................................................................

*: رضا و آسینا: آد

ائل نقاشی

هئچ دوربین گؤزوینن باخمادینگ ائله

گؤینونن چکمیشنگ وطن عکسینی

قویمادینگ ائلیمیز جان وئره اؤله

بزتدینگ چؤللری چیمن عکسینی

سورو گللاه گلیب بوردا سان وئریر

بور قوینونلار دانگاهلاردا دان وئریر

شوخ گؤزللر قوچ ایگیددن یان وئریر

چکمیشنگ منیژه_  بیژن عکسینی

طبیب گؤردوم یامان دردی علاجدا

دایاق توتموش ایگید گؤزو آغاجدا

آتلی چاپیر گؤروب جئیران قیقاجدا

نه چکمیشنگ ساچی خرمن عکسینی

دوگو دؤیمه‌گ هاینا هلی  چکمیشنگ

پوخوولاردا دؤنمز دلی چکمیشنگ

ائل ایچینده هر عملی چکمیشنگ

گلن، گئدن، دئیه‌ن، گولن عکسینی

ائل ایچینده گومورلانان لؤکلری

آراغاجی، توربالاری یوکلری

ده‌ییرماندا آغاراتمادیگ توکلری

جاوان کرز گؤردوم بو تن عکسینی

چکمیشنگ سن تویدا آتلی چاپانی

قیقاج ائدیب یئردن یاغلیق قاپانی

یاییق یایان سحر چؤرک یاپانی

قیزیل گومپول چادیر_ گرمن عکسینی

فرهادی چکمیشنگ شیرینی تویدا

خوسروو چکمیشنگ بیر اوجا بویدا

ایگیدی چکمیشنگ های اینان هویدا

کرم اصلی قرری همن عکسینی

سن ائلیمه جان وئرمیشنگ بیژن خان

قلیمینگ بورماق دیر رنگی قیزیل قان

اؤلمه‌ینگ سن الحق اؤلمه‌نگ هئچ زامان

گؤینوموزه چکدگ بیژن عکسینی

1391_ شیراز

اوستاد اثرلرینی بوردا گؤرونگ

http://www.qashqaie.ir/showthread.php?tid=501

تئز ترپنمه‌سه‌گ چوخ گئج اولار...

اوبامیزدا بیر قارری، گؤینونونگ کوهنا چیققینی آچاندا بو آساناکلار

( بایاتی لار) ایچیندن چیخدی:

آبی دونونگ دورنگی                           یومادیم گئتدی رنگی

سن کی سه‌ودینگ آلمادینگ                 ائللرینگ نام و ننگی

آغ داغدان کاماه بیچدیم                        سوووق سولاردان ایچدیم

بس کی دئدیم یار گله                         آللاه گؤزوندن دوشدوم

آغ اوغول آی اوغول                             دوداغی قایماق اوغول

وعده‌یمیز چشمه‌ باشی                       یاتاغیمیز داغ اوغول

قرشی ده قره کونار                             بلگی وار بونار_  بونار

یاریم اوباسی کؤچموش                        باخ گؤرم هارا قونار

آغ دونونگ علم_ علم                            جیبینده داوات_ قلم

گئدنده کوسدورموشم                           گل تا گؤینونگو آلام

.......

داغلارینگ باشینا تورپاق اله‌یینگ

تؤکونگوز قلبیره سیز داغ اله‌یینگ

آی اوزونگ حورمتینه بیرجه سلام

زاغی گؤز ساغلیغینا زاغ اله‌یینگ

سویوزلار آدینا سیز سو نذر ائدینگ

سود ایچن دوداغا قه‌یماق اله‌یینگ

هر باشینگ باشینا بیر گول سپینگیز

هر گولونگ اوستونه بیر باغ اله‌یینگ

آتلارینگ نالینا بیر آی اکینگیز

خئیمه لر باشینا بایداق اله‌یینگ

هر یولونگ سولونو دؤندرینگ ساغا

هر ساغینگ ساغلیغینا ساغ اله‌یینگ

گؤزلرینگ یاشینی توزدان سیلینگیز

تئللرینگ تارینا داراق اله‌یینگ

آللاهینگ قانی تؤکولموش تورپاغا

بو کولونگ باشینا یارپاق اله‌یینگ

بو یولونگ اوجوندا جنت اه‌وی وار

بو یولونگ یولوندا باشماق اله‌یینگ

کربلا لئیلاسی مجنون ایسته‌یه‌ر

تؤکونگوز قلبیره مشتاق اله‌یینگ

                                              91/10/8 شیراز