Dávjá ihtet govat bohccuin, maid čorvviide leat sorron báttit, sreaŋggat, horsttat ja feara mat. Avvilis ja Suoločielggis leat moatti vahku siste dihtton juo guokte bohcco, maid čorvviide leat sorron juovlačuovggat ja vel šleađgaáiddi stoalpuge.
Avvillaš badjeolmmoš Kirsti Kustula muitala, ahte son oaidná bohcco čorvviide sorron tiŋggaid juoba juohke vahkus. Kustula lea ieš oaidnán bohcco čorvviin heaŋgámin biktasiid, firpmiid ja juovlačuovggaid, buot mii olbmuid terássain fal gávdno.
Son ávžžuha olbmuid smiehttat, maid olgun seailluha.
– Ii bija dohko dakkár áššiid, mat leat váralaččat ealliide, Kustula dadjá.
Gánnehage smiehttat, gokko buohta ja man guhkká heaŋgu biktasiid dahjege firpmiid olgun vai eallit eai daidda sorrošii. Boazu lea dan mađe hárjánan olbmuide, ahte dat ii bala boahtit šiljuide.
– Mun jurddašan nu, ahte go dálvit bohccuid bibmet de dat hárjánit olbmuide ja danin bohtet šiljuide.
Kustula evttoha, ahte šilju sáhttá vaikko áidut vai bohccot eai beasa dohko sorrot.
– Muhtumin lea nu, ahte gávdno dakkár boazu, mii lea jápmán, Kustula muitala.
Sorron ja jápmán bohccuid eai gávnna goittotge nu dávjá, go olbmot gal riŋgejit boazoisidii jus oidnet tiŋggaid heaŋgámin bohcco čorvviin, Kustula lasiha.
– Dáppe leat bohccot ja ferte eallit nu go lea dat báiki, son muittuha.
Kustula rávve, ahte boazoisidii ferte riŋget jus oaidná bohcco čorvviide sorron tiŋggaid. Dasa lassin lea buorre muitit, ahte lunduige ii oaččo guođđit ruskkaid nu mo sreaŋggaid dahje báddestuhkaid go eallit sáhttet sorrot ja darvánit daidda.
Beaivvi ságaid ja Yle Ođđasiid Sámis sáhtát maid guldalit Yle Areenas.