Njuorggánlaš Aslak Holmberg lea eanaš oasil duđavaš vástádussii, man lea ožžon Finnmárkku kommišuvnnas, mii guoská su čielggadangáibádusa Suoma beale sápmelaččaid rivttiin.
Finnmárkku kommišuvnna bargagođii sullii njeallje jagi dassái geavahan- ja oamastanvuoigatvuođaid čielggademiin Deanu gielddas. Čakčamánus dat almmustahtii raportta áššis ja das muitalii earret eará NRK.
Holmberg lei dáhtton kommišuvnna čielggadit Suoma beale sápmelaččaid rájáidrasttildeaddji rivttiid Norgga bealde.
– Sii leat ovttaoaivilis das, ahte sámiin geat orrot dás rájá lahka, leat rievttit geavahit guovlluid maiddái Norgga bealde rájá. Dat lea hui movttiidahtti, dadjá Holmberg.
Son lei gáibidan rájáidrasttildeaddji rivttiid čielggadeami árbevirolaš meahccebivdui, guolástussii ja johtimii. Holmberg ákkastalai rivttiid dainna, ahte olbmot leat áiggiid čađa atnán ávkin guovlluid ovdal go riikkaráját gessojuvvojedje.
– Dáppehan leamašan seamma siida goappat beal Deanu. Dathan lei ovdalgo riikkarádjá lei oba jurddašuvvonge. Dáppe leat seamma sogat ávkkástallan lagaš guovlluid, čilge Holmberg.
Holmberg ii goittot leat áibbas duđavaš dasa, ahte kommišuvdna lea dulkon rivttiid guoskat dušše ovttaskas olbmuid.
– Mun gal oaivvildan, ahte dat leat kollektiivva rievttit olbmuide, geat orrot dán guovllus.
Nubbi masa son ii leat duđavaš, lea dat, ahte kommišuvnna ii dutkan rivttiid vuotnabivdui.
Holmberg ii vuos dieđe maid Finnmárkku kommišuvdna vástádus mearkkaša.
– Mun jáhkán dat váldá vel guhkes áiggi ovdal go dat lea láhkii ja njuolggadusaide čállon, maid dat kommišuvnna mearrádus mearkkaša.
Ferte goit gulahallat maid Norgga beale olbmuiguin dán áššis, deattuha Holmberg.
– Ulbmilhan ii leat dat, ahte mii leat bahkkemin geange eará guovlluide, muhto vai livčče vejolaš doalahit daid oktavuođaid, mat jo leamašan dáppe áiggiid čađa.