Sápmi

Lappi gearretriekti dubmii golbma Báišduoddara boazodoalli evttolaš fáŋgavuhtii

Albmát ožžo duomu suoládeamis, muhto sivahusaid roavva vearisteamis hilgo.

Paistunturi-oikeudenkäynti on alkamassa.
Fáŋgavuođa lassin buot golbma boazodoalli galget máksit ovttas goluid oktiibuot badjel 12 000 euro. Govva lea váldojuvvon diibmá, go ášši gieđahalle Avvilis Anára gielddadálus. Govva: Sanna Hirvonen / Yle

Lappi gearretriekti lea dubmen evttolaš fáŋgavuhtii golbma báikkálaš boazodoalli Báišduoddara bálgosis. Sin sivahedje badjel 50 bohcco suoládeamis eará boazodolliin.

Áššáskuhtti gáibidii duomu roavva suoládeames ja roavva vearisteamis. Buot albmát ožžo duomu suoládeamis, muhto gearretrievtti čovdosa mielde sáhka ii lean roavva suoládeamis. Sivahusaid roavva vearisteamis hilgo.

Albmát ožžo iešguđet guhkkosaš ráŋggáštusaid: 20 beaivve, 30 beaivve ja 70 beaivve evttolaš fáŋgavuođa.

Duopmu ii leat vel ožžon lága fámu ja das lea 30 beaivvi váidináigi.

Áššáskuhtton albmát mieđihedje oasil daguid jo ovdadutkamis. Sii goittotge šiite, ahte livčče sivalaččat roavva suolavuhtii ja roavva vearisteapmái.

Goluid galget buhtadit oktiibuot badjel 12 000 euro ovddas

Fáŋgavuođa lassin buot golbma boazodoalli galget máksit ovttas goluid oktiibuot badjel 12 000 euro.

Boazodoallit galget buhtadit stáhtii duođašteamis ja bealljemearkadutkamušain šaddan goluid ja Báišduoddara bálgosii šaddan goluid.

Lassin juohkehaš šaddá máksit vahátbuhtadusaid eará boazodolliide.

Alaguoddi mielde albmát rievdadedje bohccuid mearkkaid

Alaguoddi oainnu mielde golbma albmá leat juogo ovttas dahje okto suoládan máŋggaid logiid bohccuid nu, ahte leat rievdadan daid mearkkaid.

Gearretrievtti mielde buot bohccuid, maid navde suoláduvvon, eai bastán doallevaččat duođaštit.

Vástideddjiid mielde sii suoládedje bohccuid, muhto eai eisige nu olu, go maid čuoččuhedje.

Dagut dáhpáhuvve giđđat 2020.

Alaguoddi mielde albmát ledje merken vierrobohccuid iežaset merkii. Lassin bohccuide málejuvvon guolgamearkkaid leat rievdadan vástidit áššáskuhtton olbmo guolgamearkkaid ja bohccuide leat bidjan iežaset bilttáid.

Gearretriekti oaidná, ahte dušše dihto guolgamearkka vuođul eai sáhte navdit, ahte bohccuid leat buktán nuppi bálgosis.

Ášši gieđahalle mannan giđa Lappi gearretrievttis máŋga beaivve. Alaguoddi Emilia Välimaa muitala, ahte seamma viiddes boazosuoládeami eai leat gieđahallan gearregiin maŋimus jagiid áigge.

Ođđasamosat: paketissa on 10 artikkelia

Maŋŋebárgga váralašvuođa­dieđuid testema oktavuođas eatnašat ožžo dieđuid telefovdnii dušše sámegillii. Sámegielat oidnojedje viidát mediain ja spivkavideoin.

Oulu čuvgehus­lávdegoddi lea mearridan seailluhit Lintulampi skuvlla sámeluohká, juos dihto eavttut divvet.

Mätt’tõsduumšeǩ Satu Moshnikoff tuejjii miârkteei tuâj sääʹmǩiõl sannõõzz da ǩeʹrjjǩiõl ouʹdde. Son jaaʹmi 86 âkksiʹžžen.