الشعر الشعبي _الشاعر سید حسن الشریفي

يا عطش كلما اشربچ اشتهيج..
ياحلم .. كلما يفز بيه السفر بمتاع غفواتي ابتديچ..
روحي و الايام تمشي ..
وانتي مثل الغيم ما تنلاح ايديچ...
انتي يا كشخة سواليفي و ضحكتي . .
آنه بعيوني تغيير كلشي لونه و إنتي انتي ..
انتي مثل الساجيه التروي بساتيني و عطشها ..
وآنه مثل السنبله المنجل الشوگ بكيفه حشها ..
مرّي مدري شصار بيّه ..
آخ هذا الشوگ مثل الياهل المايفتهمني ..
طاسة ايامي بلعب كل ساعه طشها ..
سيد حسن الشريفي

و بتده صوت القنابل .

..و جفن كوت الشيخ نایم..
و انه مثل الطیر فوگ همومی هایم ...
والحرب ضحكة سياسي و آنه شاعر للوطن مو للسياسه ...
انه شاعر كل شجر هاي المدينه ..

كل وردها..

كل ضحكها..

و حزن کارون و یباسه..
يا عصاري الساحل الماشال خلگي و لا دفن بشعاري ونّي ...
انه امشي و هاي المحمره و جسرها و كل مراكبها تصيح بصوت غنّي ..
شلون اغنّي...؟!
و الحرب و الناس و اللوعه الغميجه .. ، ؟
شلون اغنّي و انه حدر ضلوعي مشتعله حريجه ....
آه یا ساحل الديره شكثر ضيجه...

سيد حسن الشريفي

و ینفتح باب القصیده و ابدي اشوفك ..
گمر منحوت اعلى دگات الگلايد ...
يا حلاتك من تکض ایدي وتجر گلبي بدرب هاي القصايد ..
يا حلاتك من تشب ناري وتگلي النهر يا حسون طافي ..
ياحلاتك من تصحيني اعلى جمره وتبقى غافي ..
و يا حلاتك من تكض مساحه بيدك ..
تمحي كل هاي الاسامي بلحظة من دفتر شفافي...

سيد حسن الشريفي

#سيد_حسن_الشريفي

اذكر الكلمات كلهن ...

اذكر حروف الگلتها و طارن بصدري حمامات المحاچي ...

اذكر ظنوني و خجلها ...

و انا عطشان اعلى طولچ انثر سنيني بواچي..

ردت اگلچ و التوابيت التشيّع ضِحكِتي كلها غريبه...

ردت اگلّچ بين كل هاي القصايد چنت ادورنچ حبيبه ..

ردت اگلچ يا بعد جرحي و طبيبه ..

انا جيتچ ..

من بعد ما وشّلت روحي و املها ..

انا جيتچ من زمن شگ التقاليد و خجلها ..

انا اجيتچ من هذاك الكوكب الأسمر العالي الكفر بالأعراف كلها ..

سيد حسن الشريفي

#سيد_حسن_الشريفي

دخيلك

دخيلك من صبر سجني الترسته اسوالف الغيّاب..

دخيلك من شكو بروحي نغيج غراب..

دخيلك من رماد الخوف ..

والصفنه وگفلها الزنجر اعلى الباب ...

ولك هذا اليسولف كل دمع عمره على الاوراق دم وتراب ..

ولك هذا النزع صوته ..

ورضى بسجنك يابعد الروح دم وتراب..

دم وتراب ..

دم وتراب و الأيام ظلمه..

و الهجر تيزاب ...

سيد حسن الشريفي

حنطة محنه

و تعطش النظره و نهر وجهي يغنّي ...

دنّي يالمبعد على الحبوك دنّي....

ذرني لشراع الشمس حنطة محنّه..

و اگطع بجيتك عبرتي و خيط وني ...

يا ترس گلبي و ضحكتي ..

و يا مراد العين من يذبل جفنها..

و يا فرح روح المساجين الخلص همها و سجنها ..

وسفه حنيتك على الوادم تحنها ...

سيد حسن الشريفي

قمصان عمري

تبسّلن قمصان عمري وگتلچ الچلمات بادن...

و برد نص دمي و شتا الایام یضحک..

و من لبست اصواتهم ضاجت علیه..

شرد اگلچ یا بنیه ..

كل اساميهم گصیره منین ما البس حرف ینشاف تعبی ..

توه رايد اطوي من بين النعاس اوراق دربي .

توه راید یغفی گلبی..

کحلچ من بعید مد ايده و ندهني ..

للكحل صوت اليجر خيط الثواني..

و آنه ماباگيلي غير اخويط صفنه اشما اگطعه اتچلب بطوله دمعتي..

 ..

بیدچ امفایح واید و انه مگفوله ضحکتی..

آخ لو هاي السوالف تعبر اعيوني و عطشها..

چا دريتي الشوگ‌یاهل ...

طاسة ايامي بلعب كل ساعه طشها...

سيد حسن الشريفي

رصيف السيف

من آخر رصیف السیف..
و اعیون الصفا التعبانه من كلشي ..
لحد آخر ضلع مكسور من صدر القصر جيتك ..
من الچاسبي المطموم..
من دم التراب الشبع بس اهموم ..
اجيتك و الأحزان اغيوم ...
اجيت اشكي و الوذ و اشتكي و ابچي ..
اجيت اكسر گفل چلماتي الخرسه و الك احچي ..
اجيتك يا علو شانك ...
يرب العاليات البيض سبحانك ..
انه ماني غريب اعليك ..
لیش تعذّب انسانك..
انه الكلش رچيچ و تعبي اولايه...
آنه الشط الغريب المنسلب مايه...
آنه الباگو دکاکینه و عليهن رتلو آيه ...
اجيتك اشكي من ديني  ..
من خوفي اليطشر جمره بسنيني ..
اجيتك رايدك بيه تدلّيني ....
آنه ضايع و لاغيرك يدلّيني ..

سيد حسن الشريفي


 

مواني

ضايع و مالي مواني التفتهم حچي السفينه ...
اشلون تفهمني؟
و انا ثيابي مثل روحي حزينه ...
مدري ياهو الباگ من فكري عناوين المدينه ..
آنه مدري اشجابني الهاي العماره ..
اشخله جدم الروح يركض صوب مصعد ماله وادم ...
مصعد متيه مسيره ..
مثلي دايخ..
لا إله عنوان ثابت..
و لاله بين الناس ديره ..
گلي وين تريد اصعد ؟
گتله كيفك ..
وين يا طابق تشوفه ايشيل خلگي حطني يمه..
بلكي يفهم گفل روحي..
انه ادور كون مفتاح اليفك گلبي ويحرر منه همه ..
سيد حسن الشريفي

حچي الشبّاچ

گبل لا يگعد النعناع و یفك گلبه و عيونه ..
يجي غيمك شذر شايل على امتونه ..
و يفض رحمه على البيبان و الگیعان..
و يدوّر بلكت بهل الطين يلگه انسان...
يرب الغيم و النعمه...
 يفززني حچي الشباچ...
و اگعد و انده اعيوني..
و يجي صوتك مطر و يصيح ياوادم ...
ياوادم ...
_ياهو ايريد يغسل گلبه من گلبه ..؟
_ياهو يريد يغسل روحه من ناسه و يگرب خاطره الربه..
_ياهو ايريد يرجع للطفوله اردود .؟

مد ايدك يبن طيني ..

_يبن طيني
مطر ربك جسر ممدود ...

سيد حسن الشريفي

مراية السلطان

وهم ماخذني للمعراج ...
وهم تارس شرايني و لا بيه يفز حلاّج ..
على الفنجان و الاقدار و التعويذه ومراية حچي السلطان...
على القسمه و نصيب و آية المكتوب.. گالولي صرت انسان ..
اساطير و قصص هابيل و الشجره و فصيلة سام ..
لابسهن مثل ثوبي على الايام..
اثاريني چنت غافي و غطاي اوهام ..
بالدم مو حقيقه اوهام..
اثاريني مجرد صوت معجود بلسان الطين...
اثارينه يگلبي اسنين من ميتين ..
اثاري مراية السلطان چذبت على الناس اسنين ..
سيد حسن الشريفي

من النطفه..
لحد ماحط حمام الشيب فوگ خدود المرايه..
عشت وياك يا گلبي حرف مضموم بحچايه..
حرف متوسد الصفنه..
غريب و ماله غايه.
لوبيدي تركتك بالمشيمه ولا تجي متعوب
لو بيدي فلا غنّيت من دمي و شمرت بكل قصيده غروب ...
انه وياك يگليبي تأذينه ...
محد شاورو من اختلق طينه . ..
ولا واحد خذو رايه بسجن عمره و محاكم لوعة اسنينه ..
آنه وياك يگليبي تأذينه..
و انته الوحّدك تگدر ..
فك اگماطك الرابط دلللولك على ايامي. ..
و خل غيمك يرويني ..
انه بصدري طفل ضامي ...
سيد حسن الشريفي

جمر_الدم
.
أسمع ابطيفك يگلّي..
_جيت اريد أحصد سنابل ذكرياتي ..
فك لي جرحك انه جيتك ...
:يا هلا بلوعة اسنيني ..
هذا إسمك يلمع بصوتي و لا مره لگيتك ..
هذا إسمك ينده بدمّي و  على الصفنه حچيتك...
بس ولا مره لگيتك..
تفضل بنبضي تراهو البيت بيتك...
تفضّل بنبضي و إخذ كلما تريده...
يا بعيد ، الگلب مشتاگ البعيده..
ماني اول واحد اليضحك على الخوف اليمر سكته بوريده ..
و لاني آخر واحد اليبچي بضحكته
و غارگ ابدنيه جديده..
آنه من اسنين محترگه السوالف حدر گلبي..
آنه جمر الدم حرگني و طش رمادي ابكل قصيده ..
#سيد_حسن_الشريفي

#خمر_وجهك
يل إملثّگ هدم سالوفة ايامي بحبر إسمك ..
كرهت احلامي من إتگودني الرسمك ..
مساماتي تبّرن من عطر جسمك ..
إستلذ يا عافية غيري ..
ي ريشه الطاحت من جناح تفكيري..
إستلذ بيهم ي بعد الماشرب نهري ..
إستلذ بيهم يمن بعيوبهم تدري ..
يلمحرّج دكاكينك تبيع احساس..
ترى الشارب خمر وجهك وسط عينك يِكِسْرْ الكاس..
#سيد_حسن_الشريفي

مراسي

کل سفینه اترید سفّان اليدليها اعلى شطها..
و المراسي إعيونها اعلى الشط رهینه .. 
کل غریب یرید ساحل ینزع اهمومه اعلی طینه ..
و آنه و انته احلامنه اتعادي السفینه .. 
کلمن ایرافج صفنته بسفر عمره .. 
وکلمن بصندوگ گلبه ایضم عشگ مشتعل جمره.‌
آنه و انته الشوگ مشانه اعله امره .. 

سيد حسن الشريفي

گزازة خوف

شخبطني القدر بكتاب ايامك ...
و تعب بيه القلم گد ما يصلّح جملة اسنيني ..
ولگيت اول شطر محذوف من قصة سواديني ..
ولو دمي يعاندني و يعذبني بشرايني ..
ولو اسمك گزازة خوف مشموره اعلى عشريني ..
رغم هذا صحتلك لا تخليني ..
دخيلك لا تخليني ..
و اجيت انته و قريت ايامي.. و الاوهام . .و ادموعي ..
و عرفت الظلمه ما تنشال لوما تحرگ اشموعي ..
و لاانلام من اشهگ ..
جمر راهم على اضلوعي...
الحزن مگفول بأيامي..
و لا مفتاح بسبوعي ...

سيد حسن الشريفي

 

وحشه

ردني لسنين الخضر يا گلب ردني ..
يا كبر وحشة اسنيني ...
و يا غمگ ایام شيبي البيها يا گلبي عفتني..
غرگتني بصفنه سوده ..
يا گلب و اشلون افهمك غرگتني..؟.
اشکثر وصيتك عليه ...
وگتلك ايامي بحرها بلايه ساحل ..
صير لعيوني سفينه..
و بالك تضيع الدرب ..
 اي یگلبي ..
يا مسودن لا تحب ..
انه گتلك جامه مكسوره العمر..
و آنه گتلك من درب احلام غيرك لا تمر..
و حيل وصّيتك یگلبي حافي لا تمشي اعلى نيتك ..
بيا جرح رايد توهدن شاعريتك ..
هسه احسنلك يگلبي ..
ليش ما عندك گلب ..

سيد حسن الشريفي

غنوة هيل

عرفت الله گبل لا یخلق الوادم .. 
عرفته ابکل معانيه .. 
عرفت الله دفو يوزع على البيبان يوميه .. 
مثل حلمي يراودني ... 
يغطيني بضحكته اشما حزن مرني ..
و اذا اعثر يكض ايدي و يعبرني ..
عرفت الله حنین اهواي مثل الوالده و اكثر .. 
یوديلي قصايد شوگ من اسهر.‌.. 
و يغني بروحي غنوة هيل ..
ضحكة زعفران و رازقي و عنبر ..
عرفت الله اليحب الناس، حتى الناس التسبه..
عرفت الله اليشارك كل فقير بهمه و بتعبه .. 
حتى الطفله من تحزن يصير الها حضن لعبه..
هذا الله گبل لا ینكتل هابيل ..
و بعدهو الله رغم کل یوم دم یسیل.. 
يفك گلبه سبع بيبان لليعشگ .. 
هذا الله یظل اجدید ما یعتگ ..

سيد حسن الشريفي

يا صباحك

يا صباحك من يجي بموجة فرح ياخذني لله ..
و آخ لو چل الظلام اتصير مو انته العرفتك ..
انه بلمي صغير و امواجك چبیره ...
وساحل الدنيه بعيد...
 و عمري ياهل ماله ديره..
يا حرير الگاعد بدكان غيري..
و راعي الدكان فاهي و ما عرف قيمة حريره ...
گتلک  اعبر للعنب و احوي التریده..
لا تخاف الناس كلهم نومتهم بين چلمات الجریده ..
هوه كلمن لاهي بسنينه و غفه و احلامه بيده..
اعبر اعبر..
 انه بستاني اشتهاك و مستوي بيه الحنين ...
مد اديك و احوي كل هاي السنين...

سيد حسن الشريفي

 

حيره

يمدري اشلون ابدي اوياچ..
على الورده الندى من ايطيح اتریاچ ..
اذا ينزل مطر من غيمة الاحلام اترياچ...
يروحي العاشگچ فلاح ينطر تستوي الايام...
وبزرعه ثمر يلگاچ..
بس انتي عنيدة راي ما تدرين..
بس انتي زغيرة راي ما تدرين ...
ماتدرين من اتغمّض اعیونچ
 يفز شوگي مثل عصفور..
ما تدرين بعيوني زرعتچ نور ..

 سيد حسن الشريفي