''ساڵ''
- هیچ کەس نازانێ من کێم مردە، هیچ کەس نازانێ
- ڕۆڵەی لە ماڵ تۆریاوەکەم ڕۆ
- چەمەدان بێ خاوەنەکەم ڕۆ
- کچە ساڵێک لێ گومبووەکەم
- ڕۆڵە ماڵ لێ جیاکردووەکەم
- دایک و باوکەکەم ڕۆڵەی گەردنکەو، ڕۆڵەی باڵابەرز
- تەنیا لەبەر تۆ هەژدە ساڵ قەبووڵکردووەکەم
- من دوای تۆ چیبکەم دایکەکەی دایکم؟
- ڕوو لە کام چۆڵ کەم دایکەکەی دایکم؟
- لەیلێی پیر نەبووم، چاو هەر لە خۆو جوان، دەم هەر لە خۆو جوان
- هەی خۆزگەم بە پار ئەم عەینانە
- پار ئەم وەختە هێشتا لەسەر پای خۆت بووی ڕۆڵە گیان
- ئاخۆ ئەو دڵەو چی خەمین بوو؟ چەنێ ترساوێتی لەو ماڵا؟
- بۆ بە لاتۆ نەبووم یەخوا کوێر بێ بیناییم
- دەبا من کوێر بوایێم حەو ساڵ تۆ دەسگیرم بوایی مریەم گیان
- بن دڵم بڕیا ڕۆڵە، بۆ باڵت شکانم باوک و دایکەکەم
- خۆ من چووم کراسی تازەت بۆ بێرمۆ بە ملی وردم
- بە میراتت کەوت ڕۆڵەی سوور بۆ نەکریاوم
- ئەی هاوار خوا، ئەی هاوار چیبکەم؟
- بەخوا ڕۆڵەم زۆر جوان بوو ڕۆڵە گیان
- بەخوا بێ عەیب بوو دادە گیان
- دایکتان جەرگی نەسووتێ ڕۆڵە
- دە توخوا ئێوە کامتان وەک مریەم جوانن خۆتان بێژن؟
- دە توخوا ئێوە لیپرسن، بەشکەم جواو ئێوە باتۆ ڕفێقی بوون
- دە ئاخر جواو دایکی ناتۆ دایکی لاڵ بێ
- بۆ منیان بەر لە تۆ نەخستە ئەو چاڵە مریەم گیان
- ئەو بەژن و باڵا بێ عەیبەو –دایکەکەم- چۆن بوو بە خۆراکی کرم و مار ئەی هاوار
- ڕۆڵە گۆنا کرم خواردووەکەم ڕۆڵەگیان
- ڕۆڵە دەم و لێو کرم خواردووەکەم ڕۆڵە گیان
- بۆ بەزەییت بە دایکتا نەهات جەرگوو بڕی
- کچێ گڕاڵکت نا بە دڵمۆ جەرگوو سووتانم مریەم
- کچێ هەڵسە ڕۆڵە بێژە دایکە زوانوو شکێ، من مام
- بێژە دایکە خەوت دییە ئاوەتام
- بێژە دایکە با سەری خۆمان هەڵگرین، چش ئێژن قەحبە بوون
- ڕۆڵە بەخوا بێ تۆ نامکریێ
- لێویام ڕۆڵە، حەیا چووە خۆم ڕۆڵە گیان
- ئەوە بۆ من و باوکت نەبووین بە قیمە هەرکمان بە ڕۆژێ
- شەڵڵا ئێمە خۆمان دەرمانخوارد کردایێ، نەک تۆ بمردایی
- حەیفی ئەو بەژن و باڵای تۆ نەبوو بەو قەنارەوۆ
- حەیفی ئەو گەردنە بەرزەو نەبوو ڕۆڵە ئەو خوێنەی تێ زا
- ئەی سەد شەڵڵا من و باوکت بوایین لە جێی تۆ
- تازە دنیا ئێمەی بۆ چی بوو؟ منی بۆ چی بوو؟
- وام ئەزانی شووم کردە بە پاشای وڵاتان، ڕووم نەبوو بەرامبەر تماشای ناوچاوی کەم، کە ئەڕۆی لە پشتۆ لێم ئەڕوانی، سامی بوو، هەی ماڵی سامت کاول بێ کاورا بۆ پیاوەتیت
- وتم ڕجاو لێ ئەکەم کەم بێژە کوڕ، کچ بەو جوانییە –دایکەکەی کوێر بێ_ خوا پیداین؛ وتی دەڵ بۆ تۆ و خەڵک، کچ بوو بە هی خۆڵ
- دایکەکەو لاڵ بێ بۆ شانس و ناوچاوت
- باوکوو بێ بە کۆی زووخاڵ یاڕەبی، دە بۆی بگری دەی، ئەوە کوڕ بەو دەردە چوو، ئای لە دنیا نەما، کچیش بەم بەڵا
- ئەگ ڕۆڵە دایکەکەو لاڵ بێ
- دایکەکەو زووخاو هەڵێرێ ڕۆڵە
- دە توخوا ڕۆڵە بەزەییو پیاما بێ هەڵسە
- بەخوا ڕۆڵە باوکوو بە هەژدە ساڵ ئەوەی پێم نەکرد، تۆ پێو کردم ئەم یەک ساڵە
- برا خەڵکە من ڕەفێقم لە دەز دا نەک دایک و فەرزەنی
- هەی ڕەفێقی خاسم ڕۆ
-مەحرەمی ڕاز و نیازم ڕۆ مریەم گیان
- هەر خۆو لە دەردم زانا دادە گیان
- وتی دایکە بێ با بڕۆین، بۆ دانیشتی، بە قسەم نەکرد
- دایکە بەخوا کار ئەکەین نامرین لە برسا، بە قسەم نەکرد
- دوایەوە نامانیەوێ، دایکە بۆ تامڵی کەین، نەمکرد
- وتم ئەوی بە بنیام، لەم ئاخرۆ عەیبە تەڵاق، ناومان مەزڕێنە کاورا
-وتی ئەو کوڕە تۆ واتلێکرد، ژن ئێرم بە سەرتا
- وتی دایکە بە جەحانم با ژن بێرێ، لە کۆڵ ئێمە ئەوێتۆ، خوا خراوی بۆم کرد بە قسەم نەکرد
- دە خوا گیان یاڕەبی تۆبە کچەکەم پێبەرۆ
- دە خۆ تۆ خوای لە دەست دێ، ئەو کچەم پێ ببەخشەرۆ
- دە ئەوە من ئەڕۆمۆ بۆ وێرانەکە، با مریەم لە دریاوۆ بێ بە ڕووما خواگیان
- دە جواو بەرۆ خوا گیان
- نایکەی بەخوا
- ڕەحموو نیە بەخواااا
- ساڵێکە لێت ئەپاڕمۆ نایبیسی ماڵو کاول بێ
- خۆ ئێژن تۆ لە جێی حەقای، ئەی بۆ باوکیت نەبردۆ لە جێی ئەو
- بۆ دایکیت زینەبەچاڵ نەکرد لە جێی ئەو
- بۆ ماڵو وێران کردم خوا، مریەم گیان
- ( بە سۆزەوە) تازە ناگەڕێتۆ ڕۆڵەڕۆ دڵەی ناشادم، فرمێسکی بە خوڕ ڕەنجی بەربادم
- مریەم دایکت ئەونە بێ شەرمە، شەرم لە کەس ناکا، دەنگی ئەونە ئەڕوا بەخوا، دنیا مەنعیەکا، ڕۆڵە حەیاچووە خۆم دە بێرۆ
- بێرۆ با بڕۆین ڕۆڵە، بەخوا بۆ هەرکوێ ئەڵێی دێم
- لە هەر کوێ تۆ حەزکەی ماڵ ئەخەین
- یاڵەویاڵ ئەڕۆین وەک گورگ بەخوا، خوا نێچیری ئێمەیش هەر ئا مریەم گیان
- ئەی هاوار خوا، ئەی هاوار
- تازە مریەم خەوێ بوو دیم و تەواو بوو
- بەخوا دڵەکەی وا لە دایکی ئێشا تازە محاڵە
- دڵەکەی بەرگەی نەگرت، ئەو وەک ئێمە بێعار نەبوو
- چەنێ بەرگەی بگرتایێ ئیتر دایک و باوکەکەم بێ بەقوربانی دڵە کەیلەکەو
- هەر لە سکمو خەم چووە دڵی، بی بە کۆی زووخاڵ کاورا یاڕەبی
- ماڵو کاول بێ یاڕەبی وەک بوو
- ڕووێ خۆشوو هەر پێ نیشان نەداین
- دوو جار وەک باوکی خەڵک نەکەوتیتە تەکی بزانی ئەم کچە ئاواتی چیە
- هەر وتی دایکە باوکی ئەم و باوکی ئەو بە ماشینەکەی خۆیان هات و چۆی پێ ئەکەن؛ دە خۆ ماشینو بوو خوا بە میراتتی خا، بۆ مانگی جارێ نەتئەگێڕا؟
- کوڕە من و تۆ کوا لیاقەتمان ئەو پەرییە بوو، خوا بمانواتۆ من و تۆ
- دە بۆی بگری؛ دە قوڕ پێوە دەی
- کچێ بم بەقوربان دەرز و دەورەکەو، بم بە قوربان ماڵە بێ دریا و پەنجێرەکەو، هۆ ماڵ لێ جیاکردووەکەم بێ وەفا
- لان لێ جیاکردووەکەم زاڵم گیان
- دە خوا گووم خوارد تەنیا ئەو کچەم پێبەرۆ هیچم ناوێ
- بەخوا بە چنگ هەڵیەکۆڵم، لێمگەڕن، دەری ئێرم کۆرپەی شیرینم لەو ژێر خۆڵا
- ئەی هاوار خەڵکە لێمگەڕن، بەرهەمی هەژدە ساڵ ڕەنج و هیوام ڕۆ
- کێ لە دەردەکەی من ئەزانێ خۆم نەوێ
- کێ لە دڵەکەی مریەم ئاگادار بوو خۆم نەوێ، داااایکەکەم مریەم
- هەی ڕەنجی بێوەرم خواااا
- باشە ئیتر نەجیم گیان، باشە ڕۆڵە گوناحباری مەکە، هەڵسە دایکەکەم، تازە هیچ ناکریێ، هەرەسە و هاتە و ماڵی کاول کردین، دۆعای بۆ بکە خوا لە گوناحی خۆشبێ، ڕەحیمەڵڵاهو لیمەن قەرەئەلفاتیحە، ئەعوزووبیللاهی مینەششەیتانی ڕەجیم، بیسمیلاهی ڕەحمانی ڕە...
کۆتایی
جۆزەردانی ٢٧١٩ی کوردی
