داملالار

سئوگیناز سؤزجویونو مؤحتشم شاعیر دوستوم "و.ایلقار"دان بورج آلمیشام.

گرایلی‌دیر او گؤزون یا غزل‌دی سئوگینازیم؟                  

غزل‌لرین هامیسیندان گوزه‌لدی سئوگینازیم

باخیشلارین ائله اولدوز سپیر "ثریا" کیمی

او گؤزلرین گؤیولن اولما الدی سئوگینازیم

آماندی ده‌یمه سینه‌مده سیزیلدایان اوره‌یه

سنین ساچین سایاغی تئل به تئلدی سئوگینازیم

خوماردی کئفلی گؤزون خالق آرا گورونمه گوزه

گوره‌ن دییه‌ر شَهَره کئفلی گلدی سئوگینازیم

یازین جنازه‌سی بوردا قالیب الیمده غریب

سن اولماسان باهاریمدا خزلدی سئوگینازیم

دانیش دانیش کی جانیم چیخمادان سسین ائشیدیم

پتک سوزوملو دوداغین عسلدی سئوگینازیم

سینیق اوره‌کلییه‌م "آرزیم" منیله قول بویون اول

سیناندا قول بویونوندو  مثلدی سئوگینازیم

دئدیم یازیم گؤزونو آمما بیلمه‌دیم نه یازیم 

گرایلی‌دیر او گوزون یا غزل‌دی سئوگینازیم؟  

سئچیلمیش شاعیر تا نینیب . آشاغیدا گتیردییم شعیر اونداندیر.

دوداقلاریمی کسین.

قورد قولاغیندان آسلایین.

دیلیمی کسین

آتین سووا.

گوزلریمی چیخاردین

قویون کاسیب قیزی هئلله دیب اویناتسین.

اوءلورم و بیر قورو نفسه قوناغام.

منی قارانلیقلاردا باسدیریب بوراخمایین.

منی یاندیرین لوطفن

شعیر دفتریملن.

کول کی اولدوم

      سوورون

              پوفله یین

                   قویون گئدیم.

باهار چاغی بیته جه یه م قانقال یارپاغیندا.

منی گامیش دا یئسه

سود اولوب گئده جه یه م گوءزلریمین آردییجا.

     نه

    توی توتا بیلیره م

     نه

     یاس.

آخی تویوقلاریمین

      جانیندان قورخورام!

یاسلار یییه سیز اولسون

       تویلار سیزین.

آنجاق

   دورنا گوءزلو

   تویوقلارینیزدان

        موغایت اولون.

          گوءزو یاشلی.

  بسله دیییم بیر عومورلوک دیله ییمدن .                 

ال گوءروشدوم سون گوءروشده

هئچ بیلمه دیم

اللری نین ایستی سی ایدی،

یوخسا آیریلیق داغی ایدی،

                          تام یاندیردی اوره ییمی.

آیریلیردیق آستا آستا

کور دوگون تک

             دوگونله شدی باخیشیمیز بیر بیرینه.

دوگونلری

           آیاق آچدی

                      ال یئرینه.  

بیر نئچه واخت اولمادیغیمدان عوذور دیله یه رکن دئمه لییه م کی آبان آیی نین اونوندا منیم اللی نجی ایل ودوغوم گونوم ایدی . شاعیر دوستوم کامیل قهرمان اوغلو بو موناسیبتله بیر شئعیر یازیب گوءنده ر میشدی . بئله دئییر.

 اللی پاییز آخدی بو گوءز یاشیما

بو داش دوگونلویو هارا آپاریم ؟

اللی یای آغلادی اللی قیشیما

آه بو سورگونلویو هارا آپاریم ؟ 

       - - - - - - -

منده بیر اللی یاش گئدیب یوخویا

اللی یای اللی قیش گئدیب یوخویا

گوءزومده بیر قارقیش گئدیب یوخویا

بو قریب گونلویو هارا آپاریم ؟

        - - - - - - - 

منی اوءزگه بیر من باشیما قاخدی

بیر ستلجم پاییز گوءزومدن آخدی

اوءزونو بیر اللی عوءمرومه یاخدی

بو آجی شن لییی هارا آپاریم ؟

          - - - - - - -

نه دئییم عوءمرومه آجی گونلویه

گوءزومون یاشیندا کور دویونلویه

بو منده منله شن بو سورگونلویه

آه بو ایتگین لییی هارا آپاریم ؟   

             بری باخما

                        .......

آخی بیزیم پئنجره دن

                 چوخداندیر

                  داها هئچ بیر داش گلمیر

                       و خومار گؤزده ن یاش!

بری باخما داها

اودلو باخیشینلا.

اوره ییمی آتشه توتما.     

 نه آختاریرسان؟

سئودا قوخولو غزل لری

                " کؤهنه لیب "

                                 دئییرلر.

اولورمو سئودا  کؤهنه له؟

یوخ ... یوخ ... سئودالیم!

 او خومار گؤزونله 

             بری باخ

" آی بری باخ " ماهنی سی دیلیمده ،

                                 پئنجره مدن

                                          اتک اتک داش گلسه ده

من بیر داها

غزل یازمالییام ......

کامیل قهرمان اوغلودان بیرغزل  

قارالدی قالدی گؤزومده چیراخلیغیم قارداش

قاریشدی اولدوز آلوونا داراخلیغیم قارداش

یاشیل سطیرلری قوسدوردو منده کی خیالین

یاخینلیغیندا گؤوه ردی اوزاخلیغیم قارداش

"گونش" کوچنده قیریلدی گؤزون ده گوزگوسو آه

الیمده قالدی ساچاخلی دوواخلیغیم قارداش

یئتیم چیناردا منه بیر اوراغ سالام وئردی

کی قانلی گونلره قالدی اویاخلیغیم قارداش

و آند اولا بو سویوق کور اوجاخلارین داشینا

قوجالدی منده کی کؤرپه اوشاخلیغیم قارداش

                       = = =  = = = = = = = = 

                               latınca

    qaraldı qaldı gözümdə çıraxlığım qardaş

    qarışdı ulduz alovna daraxlığım qardaş

    yaşıl sətirləri qusdurdu məndəki xəyalın

    yaxınlığında gövərdi uzaxlığım qardaş

    günəş köçəndə qırıldı gözündə güzgüsü ah

    əlimdə qaldı saçaxlı duvaxlığım qardaş

    yetim çinarda mənə bir orax salam verdi

    ki qanlı günlərə qaldı oyaxlığım qardaş

    və and ola bu soyuq kor ocaxların daşına

    qocaldı məndəki körpə uşaxlığım qardaş  

  

  آی

اوغورلانیبدیر،

قانداللانیبدیر.

 قیسیر بولودلارین دوستاقلاریندا.

ظولمتده ن بو یلودور گئجه لریمیز،

بیرتیکه ایشیقا یامان یئریکلیر.

بویلودور:

        کدره،

        حیرمانا،

         درده.

آی

اوغورلانیبدیر،

قانداللانیبدیر.

قارانلیق هله ده حؤکمونو سورور.

بیزیم پئنجره نین عطش آغیزی،

                   بیر ایچیم ایشیغا

                                      آچیق قالیبدیر.

الیمده گوزگونو شفیع آپاریب.

بیر قوتسال ساندیغیم

                          ساققا خانادا ،

بیر اوووج اولدوزو قوربان دئمیشه م.

اونون گلیشینه، قورتاریشینا.   

مانند گلی که دلربا می رویی

زیبا و عفیف وبا حیا می رویی

گاهی که هوای دل من بارانی است

درباغ دلم چه با صفا می رویی

همخوی شقایقی و آویشن ها

با عشوهء سرو نازها می رویی

من عاشقم وبه عشق ایمان دارم

در سجده گهم مثل خدا می رویی

در شهر غریب عشق،تو، تنها تو

در خانهء چشمم آشنا می رویی

در ذهن مشوش و پراز آشوبم

آرام و صبور و بی صدا می رویی

در قحطی کالای نشاط و مستی

چون تار و ترانه و نوا می رویی

در هر غزل و ترانه ام خواهم گفت:

مانند گلی که دلربا می رویی  

حسرتین قیزغین اودیلا منی یاخدین گئتدین

سارالیب سولموش اوره ک باغی سنه مؤحتاج کن

بیر سو تک اؤزگه باغین باغرینا آخدین گئتدین

طوفانا دوشموشه یاردیم گرگ اولسون - سنده

منی طوفانلار آراسیندا بوراخدین گئتدین

سن کی بیر عؤمر منیم بخت قوشوم اولموشدون

یادلارین بیرکسیگ*آتماغینا قاخدین گئتدین؟

وحشی دویغوملا ده لی کؤنلومو گؤردون آمما

منه عاقیل لیگین آدین قارا یاخدین گئتدین  

  سنی دام دوواردان سوراجیام من        

آجیلی هیجرانی یوراجیام من            

قاراگونلریمین چینینده بوینون

سنین گلیشینله بوراجیام من

قیروولو دؤرانین دامی نین اوسته

گونشین بایراغین ووراجیام من

آچاجاق بیلیره م بیرده بوباغچا

یازین ایاغینا دوراجیام من

خیالین خاطیره ن بیرده اوره کله

هرگون مین یغینجاق قوراجیام من

گئجه لریوخوما اولدوز اله نسه

سنین گؤزلرینه یوراجیام من

بوشهره هرگلیب گئدندن کی هئچ

سنی دام دوواردان سوراجیام من 

          گئجه نین قارانلیقیندا

                                گونشین دوغوم ایل دؤنومون

                                                     توی دوتدولار.

                                                     تیرینگه لر ویردیلار.

   صوبحو ن ایشیغی چاغریلمادی.

 نه گولدوروجو بیر اویون اولدو بو. 

                                                                                                                   "ما خویش ندانستیم بیداریمان از خواب

                                                                                                                    گفتند که بیدارید. گفتیم که بیداریم"

دئدیلر آییق سیز

                   آییغیق دئدیک

دئدیلر یوخلوسوز

                  یوخلویوق دئدیک

اؤزوموز بیلمه دیک

                 آییغیق

                         یوخسا

                              اویخولو

سئودا گؤزه ل دئییل 

                گؤزه ل لیک دیر

                  وهر نه یی گؤزه ل گؤرسن

                                       اینان کی 

                                                 اونا سئودالی باخیبسان.