Zum Inhalt springen

Louis Gauchat

Des isch einer vo de bsunders glungene Artikel.
Us der alemannische Wikipedia, der freie DialÀkt-Enzyklopedy
der Louis Gauchat

Der Louis Gauchat isch am 12. JĂ€nner 1866 z Les Brenets im Kanton Nöieburg uf d WĂ€lt cho und am 22. Augschte 1942 uf der LĂ€nzerheid im BĂŒndnerland gstorbe. Er isch e Schwiizer SproochwĂŒsseschaftler, Romanischt, DialĂ€ktoloog und Lexikograaf gsi, wo d Afangszyt vom WĂ€lschschwiizer Mundartwörterbuech Glossaire des patois de la Suisse romande prĂ€gt het.

Der Louis Gauchat isch us ere alte Familie vom Nöieburger Jura gsi, wo sid Generazioone z LigniĂšres glĂ€bt het. Das isch es Nöieburger Dorf am Jurafuess ĂŒberem Bielersee a der GrĂ€nze zum Kanton BÀÀrn. Em Louis sin Vatter Louis Emile Gauchat het as Lehrer gschaffet. Der Louis Gauchat isch nid z LigniĂšres, sondern anne 1866 im Dorf Les Brenets ganz oben im Nöieburger BĂ€rgbezirk weschtlech vo La Chaux-de-Fonds a der GrĂ€nze zu Frankrych uf d WĂ€lt cho. Der Vatter isch gly drufabe z BÀÀrn Lehrer fĂŒr Französisch worde, und so isch der Louis denn i dere DĂŒĂŒtschschwiizer Stadt ufgwachse. Bis Gauchats deheime het me Französisch, DĂŒĂŒtsch und au no HollĂ€ndisch gredt; das isch so cho, wil d Muetter, d Cornelie-Marguerite-Bramine Gauchat-Bazengh, nĂ€mli e HollĂ€nderin gsi isch; ihre sind schynts d Kunscht und d Musig öppis wichtig gsi, und so het au der Louis vil drvo mit ĂŒbercho; er het Musigunderricht gnoo, und s ganze LĂ€be heig er immer wider gĂ€rn uf sim Cello gspiilt, verzelt eine vo sine Biograafe.

Nach em Gimnasium het der Louis Gauchat zeerscht z BÀÀrn und spööter z ZĂŒri bim Heinrich Morf (1854–1921), drno au z Paris bim Gaston Paris (1839–1903) un z Rom bim Ernesto Monaci (1844–1918) s Fach Romanischtik studiert. Em Sproochforscher Morf, wo a der Uni ZĂŒri do grad anne 1889 s Romanische Seminar grĂŒndet het, isch s drufaa cho, ass sini StudĂ€nte ufem Land, i de wĂ€lsche Landesdeil vo der Schwiiz, die lĂ€bige Mundarte dirĂ€kt bi de LĂŒĂŒt ghööre. So isch au der Louis Gauchat zum Theema vo sinere Dokterarbet cho. Er isch is Fryburgerland uf Dompierre ggange, emene Dorf im Broyetal zwĂŒsche Wifflisburg un PĂ€tterlinge, wo hĂŒt zu dr Gmeind Belmont-Broye ghört.[1] Döört het er d Foneetik vom OrtsdialĂ€kt ufgnoo. Dr Gauchat het gschribe, i dĂ€m Dorf heig er non e ganz e lĂ€bigi mundartlichi Umgangssprooch atroffe; s Französisch, wo me sit churzem au doo i dr Schuel als einzigi Sprooch het dörfe bruuche, sig bi de LĂŒĂŒt bis zu sĂ€bere Zyt numen en Art e Suntigssprooch gsi, seit er, im Alltag het me no immer s Patois gredt, sogar au der Dorflehrer. Vom Gauchat sinere Undersuechig Le patois de Dompierre isch ane 1890 der Deil ĂŒber d Vokaal trukt usecho, es isch der Band vierzÀÀ vo der Zytschrift fĂŒr romanischi Filology.

Wo sis Studium umme gsi isch, het der Louis Gauchat z BÀÀrn und denn au z ZĂŒri as Middelschuellehrer und as PrivatdozĂ€nt[2] gschaffet. 1893 het er d Maria-Martha Schmid vo BÀÀrn ghĂŒrootet. I der erschte Zyt als DozĂ€nt het der Gauchat es paar vo de romanische Sprooche und Sache vo der Literaturgschicht aglueget. NĂ€be de WĂ€lschschwiizer Mundarte isch em au d Sprooch im SĂŒde vo Frankrych, s ProvĂ€nzalische wichtig gsi. Döört derzue het er KĂŒrs a er Uni gÀÀ, und mit eren alte Handschrift i der Bongarsiana-Samlig vo der Burgerbiblioteek BÀÀrn isch er der Überliferigsgschicht vo provĂ€nzalische Gedicht us em Mittelalter nochegange.[3] Sid 1902 isch der Louis Gauchat ProfĂ€sser a der Uni BÀÀrn gsi, und zwar bis ane 1907. Denn isch er a der Uni ZĂŒri der Nochfolger vom ProfĂ€sser fĂŒr romanischi Filology Jakob Ulrich (1856–1906) worde; nĂ€ben iim isch im Romanische Seminar z ZĂŒri der WadtlĂ€nder Ernest Bovet (1870–1941) as DozĂ€nt agstelt gsi; dĂ€ isch ane 1901 als Nochfolger vom Heinrich Morf dörthi cho.

Bi sim Lehrer, em Morf, het der Gauchat es Arbetsgebiet lehre könne, wo sech dozmol i der Romanistik starch entwicklet het: d DialĂ€ktology. Das Fach het z ZĂŒri nĂ€be der Gschicht vo de Sproochsischteem und vo der Literaturgschicht sid em Morf e guete Platz i der Forschig, d Uni ZĂŒri isch dank iim so öppis wie s dialĂ€ktologische ZĂ€ntrum vo der Schwiiz worde.[4] Der Gauchat het de sĂ€lber als ProfĂ€sser z ZĂŒri au die romanischi und bsunders die galloromanischi DialĂ€ktforschig no wyter usbout. Au Ă€r isch mit sine StudĂ€nte go FĂ€ldforschig mache, so öppe ane 1910 im Fryburger Oberland und 1913 – zĂ€me mit em Tuurgauer Romanischt und ZĂŒrcher ProfĂ€sser Jakob Jud (1882–1952),[5] wo au e SchĂŒeler vom Morf gsi isch – is BĂŒndnerland. Mit em BĂŒndnerromanische het er vil z tue gha, sid er 1907 als ExpĂ€rte em WörterbuechprojĂ€kt Dicziunari Rumantsch Grischun isch go hĂ€lfe. Em Gauchat sis grosse WĂ€rch isch s WĂ€lschschwiizer Mundartwörterbuech Glossaire des patois de la Suisse romande, wo mer wyter unde no chly gnöier aluege.

Bis ane 1931 isch der Louis Gauchat z ZĂŒri ProfĂ€sser fĂŒr Romanischtik gsi, und vo 1926 bis 1928 derzue ane au der Rektor vo der ZĂŒrcher Hochschuel. Zu sim sĂ€chzigschte Geburtstag am 12. JĂ€nner 1926 isch es Buech als Eeregaab usecho;[6] d Schriftleitig isch bim Jakob Jud und em BĂ€rner Romanischt und Mundartforscher Franz Fankhuuser (1883–1959), emene SchĂŒeler vom Gauchat und Mitarbeiter am Glossaire, glĂ€ge,[7] und trukt het’s dr SuurlĂ€nder z Aarau, dĂ€ Buechverlag, wo au sĂŒsch immer vil fĂŒr d Schwiizer SproochwĂŒsseschaft too het. I dr Feschtschrift het’s 29 BytrÀÀg vo Schwiizer und usslĂ€ndische Fachkoleege und vom Gauchat syne Mitarbeiter und SchĂŒeler, wo Frooge us em wyte Gebiet vo dr romanistische Forschig behandle, nid numme zu de Sproochareal vo dr Schwiiz, sondern au zu anderne LĂ€nder: En Uufsatz isch vom Paul Scheuermeier (1888–1973), wo ĂŒbere Sprooch- un Sachatlas vo Italien un dr SĂŒdschwiiz gschribe het.[8]

Wo der Gauchat a der Uni ZĂŒri ufghört het, isch sini Arbet am wĂ€lsche Wörterbuech no wytergange; und er het dernĂ€be wyters z ZĂŒri als HonorarprofĂ€sser gschaffet. Sin Nochfolger als ZĂŒrcher ProfĂ€sser fĂŒr Romanischtik isch der Jakob Jud worde, au e SchĂŒler vom Morf; dr Jud het scho vorhĂ€r vil mit em Gauchat z tue gha, und au Ă€r het de Redaktoore vom Dicziunari Rumantsch Grischun und em RĂ€tische Namebuech ghulfe.

Es isch schynts denn fĂŒr d Redakzioon vom Glossaire e schwÀÀri Zyt cho, wo em Gauchat sini Ă€ngschte Mitarbeiter chrank worde und gstorbe sind. Är sĂ€lber het als Scheffredakter no es Wyli wyter gmacht, de isch aber au Ă€r sĂ€lber chrank worde; im Summer 1942, won er wider mol im Feriehuus «Drosaida» z Bsuech gsi isch, wo si Soon, der Grafiker Pierre Gauchat[9] uf der LĂ€nzerheid gha het, isch er döört am 22. Augschte mit Achtesibezgi gstorbe.

der DialÀktoloog

[Àndere | QuÀlltÀxt bearbeite]

Änds 19. Joorhundert het sech a de Schwiizer UniversitĂ€te s Lehren und Forsche ĂŒber die romanische Sprooche als vilsytigs und wĂ€ge der Mehrsproochikeit vom Land bedĂŒtends Fach etabliert, und der Louis Gauchat isch eine vo dene gsi, wo dank iine i der Schwiiz d DialĂ€ktforschig und d Sproochgeografy es bedĂŒĂŒtends wĂŒsseschaftlechs Spezialgebiet worden isch. Er het bsunders d WĂ€lschschwiizer Mundarte als Teil vo der frankoprovĂ€nzalische Sprooch undersuecht.

1903 isch der Gauchat im Uufsatz «Gibt es Mundartgrenzen?» i der Zytschrift Archiv fĂŒr das Studium der neueren Sprachen und Literaturen ere Froog nooggange, wo me bi de Sproochforscher sid em 19. Joorhundert starch diskutiert het.[10] Er het ufzelt, was bis do ane vo Romanischte und au vo Germanischte zu de regionale SproochgrĂ€nze gseit worden isch; und er prichtet vo eigete Beobachtige bi de Mundarte im WĂ€lschfryburgischen und au im BÀÀrner Jura; der Gauchat isch der Meinig gsi, wil s DialĂ€kt gĂ€b, wo me eidĂŒĂŒtig chönn underscheide, dörf men au vo GrĂ€nze zwĂŒsche dene MundartrĂŒĂŒm rede; das sigen aber nid eifach immer feschti Linie i der Landschaft, es gÀÀb i der DialĂ€ktgeografy ebe so öppis wie «ChĂ€rnlandschafte» vo de Mundarten und derzwĂŒsche ganz verschideni Areal, wo sech die spezielle sproochleche FĂ€nomeen underscheide; fĂŒr zum die einzelne Mundarte z charakterisiere sell me die tĂŒpische sproochleche Merkmool innerhalb vo somene Sischteem vo sproochleche TrĂ€nnlinie aluege (de «Isoglosse»).[11] Die Idee isch sider es feschts ElemĂ€nt vo der sproochgeografische Forschig.[12] Der Gauchat zeigt mit ere Charte zu der Uussprooch von es paar Wörter i de WĂ€lschschwiizer DialĂ€kt, wie kompliziert die sprochgeografische VerhĂ€ltnis scho im ene chlyne Sproochpiet sind, und er erklĂ€rt es paar FĂ€nomeen mit konkreete Sachen us der Landesgschicht sid em frĂŒene Mittelalter.[13]

Im ene eigete ProjĂ€kt isch der Louis Gauchat der Sprooch vom fryburgische Dorf Galmis im Greyerzbezirk (i der hĂŒtige Gmeind Val-de-Charmey) nochegange. Galmis heisst uf Französisch Charmey und es lyt a der SproochgrĂ€nze, chly underhalb vom dĂŒĂŒtschsproochige Dorf Juu. Der Gauchat isch mit de LĂŒĂŒt go rede und het bsunders druf glueget, wie sech d Umgangssprooch bi de verschidene Generazioone underscheidet. Do het er gmerkt, ass me au i dĂ€m einzelnen, abglĂ€gene BĂ€rgdorf nid vonnere einheitleche Ortsmundart chönn rede, wil sech bi de alte und de junge LĂŒĂŒt zimli vil verschideni Sproochgwoonete zeige. I sinere Schrift ĂŒber d Sproochsituazioon vo Galmis, wo anne 1905 usecho isch, het der Gauchat das eso erklĂ€rt: me ghöört eben au bim Rede, wie sech s soziale LÀÀbe vo dr Dorfgmeinschaft Ă€nderet. Er het gseh, ass d LĂŒĂŒt i dĂ€m usgwÀÀlte Dorf verschideni Variante vo gwĂŒssne sproochleche Forme bruuche, und er het druus abgleitet, e Sprooche Ă€nderi sech mit der Zyt (me seit dĂ€mm «diachronisch»), wil jede Mönsch d Sprooch e chly andersch bruucht weder die andere und wil di Junge in ere nöie LĂ€benssituazion nĂŒmm ganz glych rede wie die eltere. Der Gauchat het zeigt, ass es e langsame ProzĂ€ss sig, wo öpe drĂŒ Generazioone lang bruucht, bis sech e nöii Form i dr Umgangssprooch duregsetzt het.[14] I dere frĂŒene soziolinguistischen Arbet ĂŒber d Sprooch vo Galmis het dr Louis Gauchat dr Begriff «VarietĂ€t» id SproochwĂŒsseschaft ygfĂŒert.[15]

Der Romanischt het bi sine BsĂŒech i de WĂ€lschschwiizer Dörfer und gwĂŒss au i sinere nöieburgische Heimet gmerkt, ass die alti Mundart vo de WĂ€lschschwiizer, s Patois, wo i jedem Kantoon und i vilne chlynere GĂ€gende e bitz andersch töönt het, nume no bi wenig LĂŒĂŒt die lĂ€bigi Umgangssprooch gsi isch. Grad i sim Heimetkanton Nöieburg het sech im nĂŒĂŒnzÀÀte Joorhundert wĂ€ge der Induschtry, der modĂ€rne LĂ€bensart bsunders i de Stedt und wĂ€ge de staatleche Schuele und dr Verwaltig s Französische als gwoonti Umgangssprooch uf alnen Ebene duregsetzt, und die alte Mundarte het me praktisch ganz ufgÀÀ.

Der Gauchat het emol imene Ufsatz drvo gschribe, wien er uf ere Reise is Nöieburgische dĂŒtlech gmerkt het, ass es mit em Patois nĂŒmm wyt hĂ€r isch. FrĂŒener sig’s so gsi, ass er wenigschtens im Nöieburger Jura doo und döört no LĂŒĂŒt troffe heig, wo s Patois rede. Jetz aber verzelt er i sim Pricht La derniĂšre page de l’histoire du Patois Ă  La Chaux-de-Fonds, wien em ane 1901 gar niemer me i dere Stadt het chönen Uskumpft ĂŒber dr ehemolig DialĂ€kt vo dört gĂ€. Me heig sech grad no dra erinneret, ass der Ami Huguenin eine vo de letschte VerfĂ€chter vo dr Mundart gsi sig es halbs Joorhundert frĂŒener; dÀÀ het ane 1857 en Mundartverein z La Chaux-de-Fonds grĂŒndet, das isch der Cercle du Sapin, wo’s au hĂŒt no git, aber nĂŒmmen as Sproochgselschaft, sondern eifach als prominĂ€nte stedtische Kulturverein.[16] Der Gauchat het gseh, ass me bi dĂ€m sine Mitgliider jetz nume no Französisch gredt het. Im alte Vereinsprotokoll het er glÀÀse, wie scho anne 1865 chuum me öper im Verein s Patois richtig chönne heig, drum het me dozmol d Statute nöi gschribe und die frĂŒeneri Regle, bi de Versamlige törf me nume Mundart rede, eifach abgschafft.[17]

Sid em nĂŒĂŒnzÀÀte Joorhundert bruucht men i der Linguischtik nach em Vorschlaag vom iteliĂ€nische Sproochforscher Graziadio Ascoli als Name fĂŒr die grösseri Sproochfamilie, wo die meischte WĂ€lschschwiizer DialĂ€kt e Deil dervo sind, der nöi Begriff «FrankoprovĂ€nzalischi Sprooch». Eine vo de beschte Kenner vo der Weschtschwiizer Mundartlandschaft isch der Gauchat dank em grosse Wörterbuech worde, won er ufbout het.

der Gauchat und s WÀlschschwiizer Mundartwörterbuech (GPSR)

[Àndere | QuÀlltÀxt bearbeite]
em Louis Gauchat sys ChÀÀrtli fĂŒr dr Albert Baachme vom Schwiizerischen Idiotikon, won er em der eerscht Faszikel vom Glossaire gschickt het (27. SeptĂ€mber 1924)

Scho 1888 het der Louis Gauchat als RomanistikstudĂ€nt mit sim Lehrer, em Heinrich Morf, drĂŒber gredt, wie’s wĂ€r, es nöis grosses DialĂ€ktprojĂ€kt z mache, wo me nach em Vorbild vom schwiizerdĂŒĂŒtsche Wörterbuech «Idiotikon» au die verschidene, so ganz underschidleche Weschtschwiizer Mundarte giengt go samle. I dene paar Kantöön sind im nĂŒĂŒnzÀÀte Joorhundert no RĂ€schte vo ganz underschidleche regionale Sproochforme lĂ€big gsi. Im Kanton Jura isch es öppis vo der alte Sprooch i der Freigrafschaft, s Franc-comtois, won e regionali Variante vo der französische Langue d’oĂŻl isch, und au verströiti Oort a der LandesgrĂ€nze wyter im Weschte ghööre zum dĂ€m DialĂ€ktruum. I de andere Kantöön vo GĂ€mf bis is Wallis ufe sind s vil verschideni DialĂ€kt vom FrankoprovĂ€nzalische. Wo d SproochgrĂ€nze zwĂŒsche dr GrafschĂ€ftler Sprooch, also em Areal vo dr Langue d’oĂŻl, und em FrankoprovĂ€nzalische im Schwiizer Jura duregoot, het dr Louis Gauchat imenen Artikel fĂŒr s Geografische Lexikon vo dr Schwiiz anne 1908 nomol beschribe.[18][19] Alli die verschidene Sproochforme sind em starche Yfluss vo der normierte und offizielle französische Sprooch vo Paris nĂŒmme gwachse gsi und vo dere i dr Zyt vom internazionale WirtschaftslÀÀbe an Rand drĂŒckt worde, gwĂŒssi Mundarte grad i de Stedt sind scho lang verschwunde gsi. Uf der andere Syte het men aber i der WĂ€lschschwiiz divĂ€rsi regionali Französischforme gfunde, wo meh oder weniger vom klassische Französisch abwyche und wo fĂŒr d Sproochelandschaft au öppis wichtigs sind, wie me no wird gseh.

Em Morf het d Idee fĂŒr so nes ProjĂ€kt zuegseit. Er het em Gauchat ghulfe mit dĂ€m Plan vom ene wĂ€lsche Wörterbuech. Und der Nöieburger het au bi de Germanischte vom Idiotikon, em Friedrich Staub (1826–1896) und em Ludwig Tobler (1827–1895), offeni TĂŒĂŒre gfunde.

Jetz isch s no drum ggange, fĂŒr s ufwĂ€ndige ProjĂ€kt s GĂ€lt ufztrybe; so isch der jung Gauchat schynts grad dirĂ€kt zum Bundesroot uf BÀÀrn. Er het mit em Bundesroot Karl Schenk, wo s DepartemĂ€nt vom Innere gleitet het, em Emil Welti vom Poscht- und YsebahndepartemĂ€nt und em Numa Droz, wo au e Nöieburger gsi isch und doo s Äiggnössischen UssedepartemĂ€nt gha het, gredt. Und tank em Nöieburger Regierigsroot John Clerc (1857–1898) het ane 1898 au d Versamlig vo de BildigsdirĂ€ktoore vo de wĂ€lsche Kantöön z Nöieburg d Idee ufgnoo und pschlosse, em Bundesroot es SubvĂ€ntzionsgsuech fĂŒr s Glossaire des patois de la Suisse romande z schicke. D Landesregierig isch druuf ygschtige, und so het anne 1899 s WörterbuechprojĂ€kt mit Ă€iggnössischer und vil kantonaler Hilf ofiziell chönnen afoo. Dr Gauchat isch dr erscht DirĂ€kter und Redakter woorde. D Scheffe vo de WĂ€lschschwiizer BildigsdirĂ€kzioone sind dĂ€nn zĂ€me d Verwaltigskommissioon vom nöie Institut gsi.

Zum sech fachlech breit abstĂŒtze het me die bedĂŒĂŒtende Romanischte vo Paris yglade, der Gaston Paris und der Jules GilliĂ©ron (1854–1926),[20] wo sĂ€lber au vom Jurafuess, vo Nöiestadt gsi isch und grad s grosse ProjĂ€kt vom französische Sproochatlas Atlas linguistique de la France agfange het. Si möchte doch der wĂŒsseschaftlech Plan fĂŒr s Glossaire kritisch aluege un durlĂŒĂŒchte, het me se gfrogt; als Muschter wie dr Inhalt vom Wörterbuech chönt usgsee het me ne dr Probeartikel vache ĂŒber die wĂ€lsche Wörter vo dr Chue zeigt. Und ihri Stimm het em junge Schwiizer ProjĂ€kt guet too. Und so het d Redaktooregruppe mit der Arbet chönnen afoo. E sind der Gauchat, der Nöieburger Romanischt Jules Jeanjaquet un der ZĂŒrcher Romanischt Ernst Tappolet gsi. Der Gauchat het z ZĂŒri gschaffet, der Jeanjaquet as Archivar und spöter UniprofĂ€sser z Nöieburg un der Tappolet z Basel as ProfĂ€sser fĂŒr Romanischi Filology. S BĂŒro vom Glossaire mit em gsamlete Material isch bim Scheffredakter gsi, am Afang z ZĂŒri im Gauchat sym BĂŒro, und mit iim vo 1902 bis 1907 de z BĂ€rn und derno wider z ZĂŒri; es baar Schrybchreft het d Redakzioon agstelt zum d KoreschpondĂ€nz und d DokumĂ€ntazioon, wo schnĂ€ll gwachsen isch, z pflÀÀge; dr eerscht SekretĂ€r isch dr Louis Gignoux gsi. E Filologischi Kommission het d Redakzioonsarbet sproochwĂŒsseschaftlich beglĂ€itet, dr WaadtlĂ€nder Romanischt Jean Bonnard (1855-1915) vo der Uni Lausanne isch deren iiren eerscht PresidĂ€nt worde.

Au fĂŒr s Glossaire het me die verschidene und bewÀÀrte sproochwĂŒsseschaftleche Methoden ĂŒbernoo, wie me se scho vo anderne LexikonprojĂ€kt könnt het:

  • d Patois-Literatur sueche und dureluege; e gueti Kwellen isch dr wĂ€lsch KalĂ€nder Conteur vaudois gsi.
  • sproochwĂŒsseschaftlechi Schriften uuswĂ€rte; dr Gauchat het öpe d Arbet vom Louis Gignoux ĂŒber d Sprooch vo de Winzer grĂŒempt.[21]
  • alti DokumĂ€nt i den Archyv sueche, wo i der Mundart gschribe sind oder wo DialĂ€ktwörter drin vorchöme
  • die frĂŒenere, regionale Patois-WörterbĂŒecher i de Kantöön zĂ€metrÀÀge und uuswĂ€rte; es guets Bischpiil isch s Patois-Lexikon vo der WadtlĂ€ndere Louise Odin (1836–1909), die eltischti Wörterlischte vom Franc-comtois isch vom Jurassier Ferdinand Raspieler (1696–1762), und do drzue bassen au d Patoisschrifte vom GĂ€mfer Jean-Daniel Blavignac.
  • i gwĂŒssnen Ortschafte sĂ€lber dirĂ€kt mit de LĂŒĂŒt go rede und d Wörter gnau so wie me se seit uufnÀÀ
  • mit ere Umfroog – ere EnquĂȘte – bi dene GwÀÀrslĂŒĂŒt sistematisch dr Wortschatz vom ganzen Arbetsgebiet zĂ€metrÀÀge.

Bi der sproochgeografische Laag vo der Romandie am öschtleche Rand vom groosse französische Sproochruum isch derzue ane no die psunderi Uufgab cho, au di regionale volchssproochleche französeschi Wörter und UustrĂŒck ufzschrybe: Me het ne Provincialismes romands oder ÀÀnlech gseit. Die regionalfranzösische Forme ghören au zum diferĂ€nzierte Bild vo der Sproochlandschaft vom modĂ€rne Französisch, wo i vilne Regioone vo der wĂ€ltwyte Francophonie e vilschichtige Sproochgebruuch mit ere Standardsprooch und regionalen und sozialen Umgangssprooche kĂ€nnt. D DialĂ€ktoloogin DorothĂ©e Aquino, wo a der Uni Nöieburg un bim GPSR schaffet, het agluegt, wie me frĂŒener i der Schwiiz ĂŒber die sproochleche Forme tĂ€nkt het, und si het usegfunde, wie au der Gauchat z’eerscht au no der alte MĂ€inig gsi isch, s Français fĂ©dĂ©ral sig eigentlech eifach e schlĂ€chti Variante vom Französischen und es heig en huuffe Wörter, wo d PĂ€dagooge mĂŒesste bekĂ€mpfe – me het frĂŒener sogar vo «cacologies» (uf DĂŒĂŒtsch: «SchlĂ€chtwörter») gredt.[22][23] Die DĂ€nkaart chunt vo dr zĂ€ntralistische französische Sproochpolitik hÀÀr, wo bi dr Französische Revoluzioon mit em Plaan vom Rapport GrĂ©goire anne 1794 agfange het, em Rapport sur la nĂ©cessitĂ© et les moyens d’anĂ©antir les patois et d’universaliser l’usage de la langue française.

Mit der Zyt isch der Gauchat, wie d Aquino prichtet, druuf cho, ass s Regionalfranzösisch e sproochlechi VarietĂ€t isch, wo als TĂ€il zu der ganze romanische Sproochgschicht und zu dr lĂ€bige Sproochkultur ghöört; me cha jo au vil vo dene Wortformen i de WÀÀrch vo Schwiizer Schriftsteller lÀÀse. Der Lexikograaf vom Nöieburger Patois William Pierrehumbert (1882–1940) het zeigt, ass es vil Mundartwörter git, wo i de grosse französische Dictionnaire fĂ€hle,[24] und so gseht me: die romanischi SproochwĂ€lt isch vil rycher ass me chönt meine, wemme nume d Standardsproochen aluegt. Der Gauchat het die Theory ĂŒbernoo, und er het spöter sogar emol gseit, die eltere didaktische Schrifte gĂ€ge die regionali Sprooch sigen am Änd fĂŒr s GPSR sogar e ganz e gueti Kwelle fĂŒre Wortschatz vom Patois gsi.[25] Bim nöie Dictionnaire suisse romand DSR[26] un dr Panfrankofoone Wörterdatebank,[27] wo d Aquino un der Andres Kristol au mitmache, het me das alles jetz uufgnoo.[28]

Jetz aber zrugg zu den AfĂ€ng vom GPSR. Uf d GrĂŒnder vom Glossaire het also e grossi Arbet gwartet. 25 Joor lang sind die FachlĂŒĂŒt – nĂ€be de prueflechen Uufgaben an iirne Arbeitsstelle – i allne WĂ€lschschwiizer Regioone, vo GĂ€mf bis uf Pruntrut und im Wallis bis is Eifischtal uf vilne Fahrte go mit de LĂŒĂŒt rede. Ysebahne het’s numen i de TÀÀler unde gha, und nid i jedes Dorf isch e Strooss ggange; so sind teil Reise sicher rĂ€cht schwirig gsi und me het z Fuess vil Zyt bruucht derfĂŒĂŒr. D Redaktoore sind im Land usse go luege, wĂ€r no guet Patois redt, si hĂ€nd noch Wörter i de regionale DialĂ€kt ĂŒber d Arbet und im Huus gfrogt, und eso isch s wĂŒsseschaftleche Material fĂŒr das grosse Lexikon zĂ€mechoo. Wo sech einisch zeigt het, ass im Kanton Fryburg fasch nume s Patois vom Greyerzerland bi dr WĂŒsseschaft guet bekannt gsi isch, derfĂŒr d Sprooch vom Seebezirk so guet wie gar nit, isch der Gauchat Ă€xtra mol dörthii gange und het fĂŒr d Gmeind StĂ€ffis am See grad sĂ€lber es nöis lokals Wörterbuech zĂ€megstellt.

e Wand im BĂŒro vom Glossaire mit ZedelchĂ€schte vo dr sproochlichen «EnquĂȘte»

Mit em Netz vo GwÀÀrslĂŒĂŒt i alne Regioone het me de sistematisch chönne die sproochwĂŒsseschaftlech bedĂŒtende Sache dokumĂ€ntiere. Die grossi EnquĂȘte, wo me mit der Boscht us allne Mundartregioone vo der «Romandie» fĂŒr s Glossaire e lexikalische, e grammatikalischen und e foneetische Schatz zĂ€metreit het, isch fĂŒr d Redakzioon es ganz es wĂ€rtvolls und praktischs WĂ€rchzĂŒĂŒg gsi. Und es isch au höchschti Zyt gsi fĂŒr die Umfroog; me het grad i de meischte Regioone non es paar Informante gfunde, im Ganzen öppe vierhundert, und dr Gauchat het mol gseit, öppe achzg vo dene «Patoisants» sige fĂŒr s Wörterbuech psunders gueti Kwelle gsi.

Es sind LĂŒĂŒt gsi wie öppe dr Nöieburger ZĂ©lim Huguenin vo La BrĂ©vine un d ClĂ©mentine Digier vo Le Landeron, dr Fryburger Archivar Louis Ruffieux vo Greyerz un dr Greyerzer Lehrer und Dichter Cyprien Ruffieux, nĂ€be der Louise Odin au dr WadtlĂ€nder François Isabel, oder im undere Wallis dr Denis Coquoz iim Trienttal; dĂ€m sini Patois-Wörtersamlig isch mit Hilf vo der Walliser Romanischtin GisĂšle Pannatier vom GPSR anne 2018 trukt usecho. Anderi Walliser, wo me z Nöieburg vonne gueti Antworten ĂŒbercho het, sin dr Schurnalischt und Volchskuntler Maurice Gabbud us em Bangistaal un dr Theoloog Basile Luyet vo SaviĂšse gsi. Übere d GrafschĂ€ftler Sprooch im BĂ€rner Jura obe het me nĂ€bem WÀÀrch vom Ferdinand Raspieler au us dr Wörterlischte vom Sproochforscher a dr Uni Rennes Georges Dottin[29] und us dere vom Jean-Georges Quiquerez öppis chönne nÀÀ.[30] Gschetzt het men uf der Glossaire-Redakzioon au d Informazioone vom Jules Surdez vo Saint-Ursanne und em Elsgauer Lehrer François Fridelance.[31] Elf Johr lang het d Redakzioon jetz all Monet dene und alnen andere Patoisants mit dr Boscht Froogeböge oder Notizcharte gschickt, eis ums andere sind Mundartwörter zu gwĂŒssne Sachgebiet oder sproochlechen Eigeheite gfrogt gsi, und au nach em Ändi vo der grossen EnquĂȘte sin d Kontakt zu vilne KorreschpondĂ€nte fĂŒr d Redakzioon guet gsi, wie dr GPSR-Redakter Eric FlĂŒckiger seit.[32] Eis vo de erschte grosse WĂ€rch, wo s Glossaire mit dĂ€m Material useprocht het, sind d «Tableaux PhonĂ©tiques des Patois suisses romands» gsi. Do drfĂŒr isch vo 1904 bis 1907 non en eigeti Umfroog mit öppe föifhundert Wörter nötig gsi.

Es isch de Sproochforscher bi iirnen Umfroogen au wichtig gsi z luege, wie sech d LĂŒĂŒt mit Hilf vo der Sprooch i dr Landschaft oriĂ€ntiere. Mit ere bsundere Kampagne het d Redakzioon die mundartlechen Orts- und FluernĂ€me zĂ€metreit. I den alte frankoprovĂ€nzalische NÀÀme fĂŒr d Dörfer, d FĂ€lder und d Naturlandschaft, und au fĂŒr d Alpweiden un d BÀÀrge vom Jura und i den Alpe cha me no meh ĂŒber d Gschicht vo vilnen alte Wörter usefinde weder das, wo i der Umgangssprooch no lĂ€big gsi isch. Zu vilnen OrtsnĂ€me bringe d BĂ€nd vom Glossaire de sogar eigeti Artikel.[33]

e Wörterzedel us Charmoille im Archyv vom Glossaire des patois de la Suisse romande, woorschyns mit Informazioone vom Patoisant François Fridelance

Wo d Redakzioon mit em Mundartwörterbuech uf em guete WÀÀg gsi isch, het si scho gly en eigeti Zytschrift usegÀÀ, s Bulletin du Glossaire des Patois de la Suisse romande. Do drin het me vier mol im Joor dervo chönne lĂ€se, wie s em ProjĂ€kt ggangen isch, was fĂŒr Erfolg und Probleem d Redakzioon gha het, was me fĂŒr intrĂ€ssanti Wortgschichten und sproochlechi DokumĂ€nt i de Regioone gfunde het, und immer wider öppis au vo volchskundleche Sache, wo me bi dr Arbet am Lexikon druuf cho isch. Das Bulletin het’s vo 1902 bis 1915 ggÀÀ. Der Gauchat het anne 1902 im Vorwort zu dr erschte Nummeren e Bytrag Nos Patois romands gschribe. Er seit dört drin, was me vo dĂ€m ProjĂ€kt dörfi erwarte, un er het so aagfange – do jetz is SchwiizerdĂŒĂŒtschen ĂŒbertreit:[34]

«D Patois vo der WĂ€lschschwiiz sind zwöituusig Joor lang guet gsi fĂŒr s Volch i de BÀÀrge zum vo sine Gedanke rede. Es tschuderet eim wemme dĂ€nkt dass alls, wo die kreativi Arbet i zwĂ€nzg Joorhundert mit dere Sprooch hĂ€reprocht het, jetz i so churzer Zyt eifach verschwindet »[35]

Und er verzelt wyters, wie’s i de Regioonen um d DialĂ€kt stoot; zu sym Heimetkanton seit er: «HĂŒt het der Kanton Nöieburg der Patois komplett ufgÀÀ. Är isch dĂ€m sin radikalschti Find gsi, und drfĂŒĂŒr isch er au no grĂŒemt worde, wil er statt dĂ€m s guete Französisch – le bon français – redi. Im Oberland, wo sech d Zytinduschtry am beschte yglĂ€bt het, het me der DialĂ€kt am grĂŒntlechschten abgschafft.»[36] Öpen i de 1920er Joor sin do die letschte Nöieburger Patoisants gstorbe. Mit em Patois sigs i der ganze WĂ€lschschwiiz nĂŒmm wyt hĂ€r, seit dr Gauchat: «Il vĂ©gĂšte dans le canton de Vaud, il est dĂ©jĂ  fort entamĂ© dans le canton de GenĂšve, il perd tous les jours du terrain dans les cantons catholiques: Fribourg, Berne et le Valais. A la fin de ce nouveau siĂšcle il n'y en aura plus trace!»

Zmingscht die pessimistischi Vermuetig am Schluss vo dĂ€m Ufsatz isch ĂŒbertribe gsi: s zwĂ€nzigschte Joorhundert het de doch nit mit allne wĂ€lsche Mundarte ganz ufgruumet;[37] es paar RĂ€schte vom alte Patois sind sogar no am Afang vom 21. Joorhundert doo, Ă€mel im Greyerzerland und i teil Walliser TĂ€ler, bsunders z EvolĂšne, wo s no LĂŒĂŒt git, wo der DialĂ€kt verstönd und sogar no rede.[38] Besser stoot’s no im iteliĂ€nischen Augschttaal, wo die frankoprovĂ€nzalischi Sprooch no zimli lĂ€big isch. Und es isch, wo der Louis Gauchat scho nĂŒmme glĂ€bt het, au in andere GĂ€gete zun ere kulturelle GĂ€gebewegig cho, me het doo und döört i dr zwöite Helfti vom 20. Joorhundert agfange Kulturgselschafte grĂŒnde, ass die alti Sprooch und s Bruuchtum, wo drmit verbunden isch, nit ganz vergĂ€sse goot; öpe d Walliser Patoisgselschaft LĂš Partichiou vo Crans-Montana und d Greyerzer Musiggruppe ChƓur des Armaillis de la GruyĂšre. Es chöme nöji WörterbĂŒecher zu de wĂ€lsche lokale Mundarten use, so wie anne 2019 dr Dichyonire du patuĂ© dĂ« Banye, s nöie DialĂ€ktwörterbuech vom Walliser Bangistaal.[39][40] Und es git sit 2004 en Organisazioon fĂŒre gröösser internazional Berych vom FrankoprovĂ€nzalische, dr Verein Arpitania – Aliance culturĂšla arpitana;[41] wo sit 2012 z Prilly bi Lausanne sogar en Internet-RadiosĂ€nder i dere Sprooch het, s RadiĂŽ Arpitania. Das alles het der Louis Gauchat nĂŒmmen erlĂ€bt, und vilech au chuum öpis vo der nöiere Mundartliteratur, wo nodisno uufchoo isch. Von es paar Schriftsteller wien em Friburger Joseph Yerly (1896–1961) git’s jĂŒngeri WĂ€rch und TheaterstĂŒck im Patois, 1985 isch sogar s erschte Mol en Oopere i der Friburger Mundart uf d BĂŒĂŒni cho, Le ChĂškrĂš dou tsandĂšlĂȘ vom Nicolas Kolly; und sid 1956 findet all Joor s internazionale FĂ€scht vo dr frankoprovĂ€nzalische Kultur statt.

I dĂ€m Artikel, wo grad drvo d Reed gsi isch, chunt der Louis Gauchat no druuf, fĂŒr was die dringendi Arbet am «Glossaire» dĂ€nkt sig; is DĂŒtschen ĂŒbertreit heisst s: «S Studium vom Patois und algemein d DialĂ€ktology isch bsunders guet derfĂŒr zum ĂŒĂŒs d Augen ufztue und ĂŒs z zeige was d Gheimnis vo der Sproochgschicht sind.»[42] Es sig fĂŒr nes Wörterbuech guet, der Gschicht vo de Wörter no z goo bis zrugg zu den erschte sprochleche Wurzle wo me drfĂŒr ZĂŒgnis cha finde, das isch d Methode vo der Etimology; und wemme d Gschicht vo de Wörter im Patois aluegi, so hĂ€lfi das au d Wörter vom hĂŒtige Französische besser z verstoo.

Er verglycht d Arbet am Patois-Wörterbuech mit der Uufgab vo der TĂ€nkmolpfleeg: «Wenn es BoudĂ€nkmol halt muess verschwinde, so macht men alls zum wenigschtens s AdĂ€nke dra fĂŒr die spötere Generazioone z bhalte. Me macht Fotine dervo. Und so isch es au gsi, wo me dra dĂ€nkt het, s «Glossaire vo de wĂ€lsche Patois» z mache. Es goot nid drum, e feschti Norm fĂŒr d Sprooch ufzstelle wie s öppe der Dictionnaire vo der AcadĂ©mie française wott sy. Und es isch au nid eifach numen es Verzeichnis vo kurioose Wörter und spezielle Redensarte. S «Glossaire» wird ganz eifach s möglechscht getröie Abbild und halt derby au grad der Grabschtei sy, wo a ĂŒsi wĂ€lsche Patois maanet!» Uf Französisch het das bim Gauchat so töönt: «Le Glossaire sera tout simplement l'image aussi fidĂšle que possible, en mĂȘme temps que la pierre funĂ©raire de nos patois romands.» Und er seit wyters: «Uf dĂ€ Schtei wird me schrybe: “Do lyt d Sprooch, wo ĂŒsi Vorfahre dermit zwĂ€nzg Joorhundert lang gseit hĂ€n was si tĂ€nke. Es isch e grobi Sprooch gsi mit iirne FÀÀler, aber si isch fĂŒr die LĂŒĂŒt guet gnue gsi. Und si isch nen am HĂ€rze glĂ€gen und si hĂ€n gwĂŒnscht ass men ere es TĂ€nkmol widmet.” Me wird gseh, ass aller Gattig ChrĂŒĂŒter um dĂ€ GedĂ€nkschtei ume wachse, und d Pflanzekuntler wĂ€rde cho und öppis dervo gĂŒnne, und si wĂ€rde’s undersueche und dervo vilech Sachen usefinde, wo fĂŒr d WĂŒsseschaft vo der Mönschheit öppis wĂ€rt isch.»

Zu Gauchat’s LĂ€bzyte isch im BĂŒro schon e riisige sproochleche Grundstock zĂ€mecho, wo au de spötere FachlĂŒĂŒt vo der Wörterbuechredakzioon im ganze 20. Joorhundert vil tue gÀÀ het. Sid 1924 chöme die trukte BĂ€nd vo dĂ€m Wörterbuech z Nöieburg use, die erschte het also no dr Gauchat mit syne Mitautoore sĂ€lber gmacht. Und au no im 21. Joorhundert wird dra wytergschaffet, es goot non es paar JoorzÀÀnt bis em Gauchat sys WÀÀrch vo de hĂŒtige Redaktooren und Redaktoorinne fertig gschriben isch. Sid 2018 chame d Artikel vom Glossaire, wo scho fertig sind, au online im Internet lÀÀse.[43] S Institut vom Glossaire isch 1942 uf BĂ€rn und 1955 uf Lausanne cho und vo dört 1972 uf Nöieburg, wos sid 2008 e Deil vo der Uni isch.[44]

ZĂ€menarbet und WĂŒrkig

[Àndere | QuÀlltÀxt bearbeite]

1907 het d BĂŒndner Gsellschaft fĂŒr die romanischi Sprooch und Kultur Societad Retorumantscha der Louis Gauchat als bekanten ExpĂ€rte vo der romanistische Lexikografy yglade zum bim wĂŒsseschaftleche Byrot vo iirem Wörterbuech, em Dicziunari Rumantsch Grischun, cho mitmache. Das grosse bĂŒnderromanische ProjĂ€kt isch fasch glychzytig entstande wie s Glossaire; der Sproochforscher Robert von Planta het 1899 agfange mit der Idee. 1904 het d Societad Retorumantscha s Patronat dervo ĂŒbernoo, und dr Gauchat isch em eerschte Redakter Florian Melcher und em Romanischt Chasper Pult z Hilf choo, wo i der Afangszyt als ExpĂ€rte mitgmacht het und 1914, wo dr Melcher vil z frĂŒe gstorben isch, sĂ€lber Redakter worden. 35 Joor lang isch der Nöieburger Louis Gauchat im i dr filologische Kommissioon vom Dicziunari drby gsi.

Z ZĂŒri het der Gauchat 1913 zĂ€me mit em GermanistikprofĂ€sser Albert Baachme und em Robert von Planta s sproochwĂŒsseschaftleche ToonprojĂ€kt Fonogrammarchyv ZĂŒri grĂŒndet, wo die modĂ€rni Technik vom Fonograaf bruucht het zum jetz vo dr gredte Sprooch nid numme e schriftlechi Ufzeichnig, sondern au d Luut sĂ€lber feschtzhalte. S ZĂŒrcher Archyv isch nach dĂ€mm z Wien s zwöite setige ProjĂ€kt gsi z Öiropa. Es het under dr Leitig vom Otto Gröger und sine Nochfolger Bischpiil vo de Mundarten i der ganze Schwiiz mit verschidene ToontrÀÀger lo ufnÀÀ, und es isch no hĂŒt e wĂ€rtvolli Quelle fĂŒr d Forschig.

Der Gauchat het mit Fachkollegen i dr Schwiiz und im Ussland Brief ustuuscht, öppe mit em Öschtrycher SproochwĂŒsseschaftler Hugo Schuchardt; me cha i dene Schrifte, wo s Hugo-Schuchardt-Archyv bi dr Uni Graz online gstellt het, es paar gnaui Sache vo dr praktische Wörterbuecharbet lÀÀse.[45][46] Wie me de Grazer Schuchardt-Archyvaar bi dr Glossaire-Redakzioon gseit het, sind schynts umkeert em Schuchardt syni Brief an Gauchat nĂŒmmen ume,[47] und vo ĂŒsem Schwiizer Romanischt sym private Nochlass wĂŒssi au niemmer öppis.[48]

Und au im Ussland het me d Arbetswys vom Glossaire ufgnoo, wie der Jakob Jud i sim Artikel ĂŒber s LĂ€benswĂ€rch vom Gauchat schrybt. D Methoode vom WĂ€lschschwiizer Wörterbuech isch auf bim Wörterbuech vo der kataloonische Sprooch zum Zuug cho, em Diccionari de la llengua catalana; der Louis Gauchat isch au em fachliche Byroot vom dĂ€m ProjĂ€kt go hĂ€lfe. FĂŒr die romanischi Sprooch het er sich scho lang intrĂ€ssiert, er isch au öppe mit syne StudĂ€nte dörthii gange.[49] No wichtiger isch em Gauchat dr Verglych vom frankoprovĂ€nzalische Wortschatz mit der grössere französische Regionalsprooch, em ProvĂ€nzalische gsi. Eis vo de guete Hilfsmittel fĂŒr d Glossaire-Redakzioon isch em Louis Piat (1854–1941) sys Wörterbuech vo 1893 gsi.[50]

ZĂ€me mit der Uni und de Middelschuele vo GĂ€mf het dr Louis Gauchat es Lehrmittel fĂŒre Französischunderricht zĂ€megstellt. Vo der Uni GĂ€mf het er derno anne 1926 der Eeredokter ĂŒbercho.

Bi de Fachkollege und SchĂŒeler vom Gauchat sind d Ufgabe, wo der bedĂŒtend Romanischt nĂŒmme glĂ€bt het, i guete HĂ€nd gsi. I die Filologischi Kommission vom Dicziunari Rumantsch Grischun isch jetz, wo dr Gauchat gfÀÀlt het, dr Paul Scheuermeier cho. Und bim Glossaire het anne 1942 dr BĂ€rner Romanischt Karl Jaberg d Leitig ĂŒbernoo, wo zĂ€me mit em Jakob Jud dr Sprooch- und Sachatlas vo Italien un dr SĂŒĂŒdschwiiz redigiert het.

I der Zytschrift Annalas da la Societad Retorumantscha het der BĂŒndner Romanischt und Dicziunari-Scheffredakter Andrea Schorta fĂŒre Louis Gauchat anne 1944 uf Romanisch en feine und gnaue Nochruef gschribe; er brichtet döört vo dĂ€m sinere Leischtig fĂŒr s bĂŒndnerromanische Wörterbuech und au fĂŒr s romanischen Institut vo dr Uni ZĂŒri, und wien er als Lehrer vo StudĂ€nte vom RĂ€tormanische gsi sig, und drzue au vom Gauchat sym private LĂ€be und synen IntrĂ€sse; es sig immer guet gsi mit em vilsytige DialĂ€ktoloog, wo s BĂŒndnerland guet könt heig, ĂŒber Frooge vom DRG z diskutiere, er heig vil jungi Schwiizer Romanischte prĂ€gt und au von es bar SchĂŒeler lo Dissertazioonen ĂŒber s RĂ€toromanische schrybe,[51][52] Der Schorta seit, me heig grad do draa gmerkt, wie bim Louis Gauchat e fĂŒrnĂ€me Charakter und s strĂ€nge wĂŒsseschaftleche DĂ€nke zĂ€mebasse, wil er der Arbet und den IdeeĂš vo Fachkollegen und SchĂŒeler mit grossem ReschpĂ€kt begĂ€gnet sig.[53]

  • Le Patois de Dompierre. In: Zeitschrift fĂŒr romanische Philologie, 14, 1890, S. 397–466.
  • zĂ€me mit em Heinrich Kehrli: Il canzoniere provenzale H. In: Studi di filologia romanza, 5, 1891, S. 341–568.
  • Les poĂ©sies provençales conservĂ©es par des chansonniers français. In: Romania, 22, 1893, S. 364–404.
  • Etude sur les Ranz des vaches Fribourgeois. In: Programm der ZĂŒrcher Kantonsschule, 1899, S. 37–46.
  • Gibt es Mundartgrenzen? In: Archiv fĂŒr das Studium der neueren Sprachen und Literaturen, 111, 1904, S. 365–403.
  • Les limites dialectales dans la Suisse romande. In: Bulletin du Glossaire des patois de la Suisse romande, 3, 1904, S. 17–22.
  • L’unitĂ© phonĂ©tique dans le patois d’une commune, In: Aus romanischen Sprachen und Literaturen. Festschrift Heinrich Morf, Halle an d. Saale 1905, S. 175–232.
  • Sprachgeschichte eines AlpenĂŒberganges (Furka–Oberalp). In: Archiv fĂŒr das Studium der neueren Sprachen und Literaturen, 117, 1906, S. 345–361.
  • Langue et patois de la Suisse romande. In: Dictionnaire gĂ©ographique de la Suisse, NeuchĂątel 1907.
  • Warum verĂ€ndert sich die Sprache? In: Wissen und Leben, 2, 1908. S. 57ff.
  • Lazarillo de Tormes und die AnfĂ€nge des spanischen Schelmenromans. In: Archiv fĂŒr das Studium der neueren Sprachen und Literaturen, 129, 1912, S. 430–444.
  • Glossaire des patois de la suisse romande. Notice historique. In: Bulletin du Glossaire des patois de la Suisse romande, 13, 1914, S. 3–30.
  • Grammaire et lexicographie des patois de la Suisse romande: Bibliographie analytique. Nöieburg 1916.
  • Les noms de lieux et de personnes de la Suisse romande: Bibliographie analytique. Nöieburg 1919.
  • Mit em Jules Jeanjaquet: Bibliographie linguistique de la Suisse romande. 1920.
  • Jean de Paris. ZĂŒrich 1927.
  • DorothĂ©e Aquino: Aux origines du Glossaire des patois de la Suisse romande. IdĂ©ologies des fondateurs et contexte de production de l’Ɠuvre.
  • Franz Fankhauser, Jakob Jud: Festschrift Louis Gauchat zu seinem 60. Geburtstage. SuurlĂ€nder Verlag, Aarau 1926.
  • Anne-Marguerite FrĂœba-Reber: Philologie et linguistique romanes. Institutionnalisation des disciplines dans les universitĂ©s suisses (1872–1945). Leuven 2013.
  • In memoriam: Louis Gauchat, 12. Januar 1866 – 22. August 1942. In: Vox Romanica, 7, 1943–1944, S. 349–353.
  • Jakob Jud: Professor Louis Gauchat 12. Januar 1866 bis 22. August 1942. In: UniversitĂ€t ZĂŒrich. Bericht ĂŒber das akademische Jahr 1942/43, S. 64–66.
  • Andres Kristol: Gauchat, Louis.. In: Historisches Lexikon vo dr Schwiiz.
  • Andres Kristol: Louis Gauchat. In: H. Stammerjohann: Lexicon grammaticorum, TĂŒbingen 1996, S. 328–329.
  • Andres Kristol: Louis Gauchat. In: Les linguistes suisses et la variation linguistique. Basel/TĂŒbingen 1997, S. 101–114.
  • Andrea Schorta: Prof. Dr. Louis Gauchat. In: Annalas da la Societad Retorumantscha, 58, 1944, S. 135–140.
  • Pierre Swiggers: Louis Gauchat et l’idĂ©e de variation linguistique. In: Ricarda Liver, Iwar Werlen, Peter Wunderli (Hrsg): Sprachtheorie und Theorie der Sprachwissenschaft. Geschichte und Perspektiven. Festschrift fĂŒr Rudolf Engler zum 60. Geburtstag. TĂŒbingen 1990, s. 284–298.
  • Jakob WĂŒest: Louis Gauchat (1866–1942). In: Jakob WĂŒest: Les linguistes suisses et la variation linguistique. Actes d’un colloque organisĂ© Ă  l’occasion de centenaire du SĂ©minaire des langues romanes de l’UniversitĂ© de Zurich. Basel 1997, S. 101–114.

Wikisource Louis Gauchat im dĂŒtschsprochige Wikisource

  1. ↑ Marianne Rolle: Dompierre (FR).. In: Historisches Lexikon vo dr Schwiiz.
  2. ↑ dr Louis Gauchat im historische VorlĂ€sigsverzeichnis vo der Uni ZĂŒri
  3. ↑ Louis Gauchat: Les poĂ©sies provençales conservĂ©s par des chansonniers français. In: Romania, 87, 1893. S. 364–404.
  4. ↑ Anne-Marguerite FrĂœba-Reber: Philologie et linguistique romanes. Institutionnalisation des disciplines dans les universitĂ©s suisses (1872–1945). Leuven 2013.
  5. ↑ Ricarda Liver: Jud, Jakob.. In: Historisches Lexikon vo dr Schwiiz.
  6. ↑ E gnaui BesprĂ€chig vo dr Feschtschrift Gauchat isch i dr Zytschrift Romania, 1928, S. 527–529, z finde.
  7. ↑ Max Pfister: Franz Fankhauser 1883–1959. In: Vox Romanica, 18, 1959, S. 379–387.
  8. ↑ Andrea Schorta: Paul Scheuermeier 1888–1973. In: Vox Romanica, 33, 1974, S. 365–373.
  9. ↑ Pierre Gauchat, der Graphiker. Ausstellung vom 23. Januar bis 28. Februar 1960, Helmhaus ZĂŒrich, Kunstgewerbemuseum ZĂŒrich 1960.
  10. ↑ Louis Gauchat: Gibt es Mundartgrenzen? In: Archiv fĂŒr das Studium der neueren Sprachen und Literaturen, 57, 1903, S. 365–403.
  11. ↑ JĂŒrgen Lang: Sprache im Raum. Zu den theoretischen Grundlagen der Mundartforschung, unter BerĂŒcksichtigung des RĂ€toromanischen und Leonesischen. TĂŒbingen 1982, S. 206.
  12. ↑ Em Louis Gauchat syn Bytrag a d Forschig wĂŒrdigen au: Friedrich Stolz, Albert Debrunner: Geschichte der lateinischen Sprache. Berlin 1966, S. 128.
  13. ↑ Louis Gauchat: Les limites dialectales dans la Suisse romande. In: In: Bulletin du Glossaire des patois de la Suisse romande, 3, 1904, S. 17–22.
  14. ↑ Walther von Wartburg, Gustav Ineichen: EinfĂŒhrung in Problematik und Methodik der Sprachwissenschaft. TĂŒbingen 1970, S. 32.
  15. ↑ Gerald Bernhard, Heidi Siller-Runggaldier: Sprache im Raum. Raum in der Sprache. Akten der sprachwissenschaftlichen Sektion des Deutschen Italianistentages in Bochum, 23.–25. MĂ€rz 2006. Peter Lang 2008, S. 97.
  16. ↑ Cercle du Sapin uf chaux-de-fonds.ch/musees
  17. ↑ Louis Gauchat: La derniùre page de l’histoire du Patois à La Chaux-de-Fonds. In: Bulletin du Glossaire des patois de la Suisse romande, 1, 1902, S. 46–55.
  18. ↑ Louis Gauchat: Langue et patois de la Suisse romande. In: Dictionnaire gĂ©ographique de la Suisse, Band 5, NeuchĂątel 1908.
  19. ↑ Über die nöieri Forschig zum Sproochkontakt i dĂ€m Piet schrybt d Romanschtin Heike Jauch vo dr Uni Paderborn. Lueg u. a.: Heike Jauch: Les frontiĂšres linguistiques extĂ©rieures du francopovençal. In: Christina Ossenkop, Otto Winkelmann: Manuel des frontiĂšres linguistiques dans la Romania. Oldenbourg 2018, S. 93–113. Zum Gauchat uf S. 94.
  20. ↑ Matteo Pedroni: GilliĂ©ron, Jules.. In: Historisches Lexikon vo dr Schwiiz.
  21. ↑ Louis Gignoux: La terminologie du vigneron dans les patois de la Suisse romande. In: Zeitschrift fĂŒr romanische Philologie, 26, 1902, S. 129–168.
  22. ↑ Charles de la Harpe: Recueil de locutions vicieuses les plus usitĂ©es que l’on doit Ă©viter dans le langage et remarques Ă  ce sujet. Lausanne 1843.
  23. ↑ DorothĂ©e Aquino-Weber, Sara Cotelli, Christel Nissille: Les recueils de cacologies du XIXe siĂšcle en Suisse romande, entre description et proscription. In: Vox Romanica 70, 2011, S. 219–243.
  24. ↑ William Pierrehumbert: Dictionnaire historique du parler Neuchñtelois et Suisse Romand. Neuchñtel 1926.
  25. ↑ DorothĂ©e Aquino-Weber: Panorama de la DĂ©scription des diatopismes du Français de Suisse Romande de 1691 Ă  nos jour. uf unine.ch
  26. ↑ Pierre Knecht, AndrĂ© Thibault: Dictionnaire Suisse Romand. ParticularitĂ©s lexicales du français contemporain. Carouge 2004.
  27. ↑ Base de donnĂ©es lexicographiques panfrancophone (BDLP) uf bdlp.org
  28. ↑ Lueg au: Andres Kristol: Une francophonie polycentrique: Lexicographie diffĂ©rentielle et lĂ©gitimitĂ© des français rĂ©gionaux. In: Yan Greub, AndrĂ© Thibault (UsegĂ€ber): Dialectologie et Ă©tymologie galloromanes. MĂ©langes en l’honneur de l’émĂ©ritat de Jean-Paul Chauveau. Strasbourg 2014, S. 275–290.
  29. ↑ Georges Dottin: Notes sur deux patois de la Cîte-d’Or et du Jura. 1892.
  30. ↑ Jean-Georges Quiquerez: Dictionnaire ou explication en français, quelques fois en Latin et en allemand, des termes patois les plus singuliers en usage dans la vallĂ©e de DelĂ©mont et dans le paĂŻs d’Ajoye. Manuskript. BibliothĂšque cantonale jurassienne.
  31. ↑ Pierre Henry: Les glossaires jurassiens. Lexicographie patoise. Ferdinand Raspieler – Jean-Georges Quiquerez – Antoine BiĂ©try – François Fridelance – François-Joseph GuĂ©lat – Simon VatrĂ© – Robert Jolidon. 1992.
  32. ↑ Eric FlĂŒckiger: Les patoisants et le GPSR. In: L’Ami du Patois. Trimestriel romand, 33, 2006, S. 51–55.
  33. ↑ Lueg fĂŒr d Namensforschig im Wallis: Iwar Werlen: Zur Geschichte der Walliser Orts- und Flurnamenkunde. In: Vallesia, LXVII, 2012, S. 269–291.
  34. ↑ Louis Gauchat: Nos patois romands. In: Bulletin du Glossaire des patois de la Suisse romande, 1, 1902, S. 11–13, 14–16, 20–24.
  35. ↑ Em Gauchat sin französisch Orignaltext: «L’histoire de nos patois romands a subi le contrecoup de l’histoire nationale. Une langue qui a servi pendant deux mille ns Ă  exprimer les pensĂ©es d’un peuple montagnard s’éteint en soixante ans! On ne peut pas s’empĂȘcher de frĂ©mir qu’un travail de vingt siĂšcles puisse se perdre en si peu de temps.»
  36. ↑ Em Gauchat sin französisch Tegscht mit emene chly lengeren Usschnitt: «Aujourd'hui le canton de NeuchĂ tel a complĂštement abandonnĂ© le patois. Il en a Ă©tĂ© l'ennemi le plus radical et en a Ă©tĂ© rĂ©compensĂ© par la rĂ©putation qu'il s’est faite de parler le bon français. Le district de la montagne, oĂč l'industrie horlogĂšre s'est le mieux acclimatĂ©e, s'est plus radicalement dĂ©barrassĂ© du dialecte que par exemple la contrĂ©e plutĂŽt agricole du Val-de-Ruz. A la montagne on a vu le patois s'en aller en 40 ou 50 ans. Une gĂ©nĂ©ration s'est mise Ă  parler français aux enfants. Ceux-ci, qui entendaient les vieux jacasser entre eux, comprenaient encore le patois sans le parler; pour la troisiĂšme gĂ©nĂ©ration le dialecte Ă©tait dĂ©jĂ  devenu inintelligible, une espĂšce de langue secrĂšte, dont les vieux se servaient lorsqu’ils ne voulaient pas Ăątre compris.  »
  37. ↑ Wulf MĂŒller: Zur Sprachgeschichte der Suisse romande. In: Schweizerdeutsches Wörterbuch. Schweizerisches Idiotikon. Bericht ĂŒber das Jahr 2002. [ZĂŒrich] 2003, S. 11–24. (Digitalisat).
  38. ↑ RaphaĂ«l MaĂźtre, Marinette Matthey: Le patois d’EvolĂšne, dernier dialecte francoprovençal parlĂ© et transmis en Suisse. In: Jean-Michel Éloy (Useg.): Des langues collatĂ©rales. ProblĂšmes linguistiques, sociolinguistique et glottopolitiques de la proximitĂ© linguistique. Actes du colloque international rĂ©uni Ă  Amiens, du 21 au 24 novembre 2001. L’Harmattan, Paris 2004, S. 375–390.
  39. ↑ Maurice Casanova, RaphaĂ«l MaĂźtre, Eric FlĂŒckiger, GisĂšle Pannatier: Dictionnaire du patois de Bagnes. Lexique d’un parler francoprovençal alpin. Bagnes 2019. ISBN 978-2-839926713
  40. ↑ Dictionnaire du patois de Bagnes. Dichyonire du patuĂ© dĂ« Banye uf unine.ch
  41. ↑ Aliance Culturùla Arpitana
  42. ↑ uf Französisch: «L'Ă©tude des patois ou la dialectologie est particuliĂšrement apte Ă  nous ouvrir les yeux et Ă  nous dĂ©voiler les secrets du dĂ©veloppement linguistique.»
  43. ↑ Website, wo me s GPSR chan online abfrööge.
  44. ↑ Historique du GPSR uf unine.ch
  45. ↑ Frank-Rutger Hausmann: Die Korrespondenz zwischen Louis Gauchat und Hugo Schuchardt. In: Bernhard Hurch: Hugo Schuchardt Archiv, 2007.
  46. ↑ Em Louis Gauchat syni Brief an Hugo Schuchardt (Site cha nĂŒme abgrĂŒeft wĂ€rde; Suche im Webarchiv) uf schuchardt.uni-graz.at
  47. ↑ Uskumft vo dr Glossaire-Mitarbeiterin DorothĂ©e Aquino Flores-Weber as Hugo Schuchardt-Archyv.
  48. ↑ D Uni ZĂŒri het us em Louis Gauchat sym Nochlass anne 1942 e Zylete FachbĂŒecher ĂŒberchoo, wi dr Jooresbricht 1942-1943 vo dr Uni uf Syte 58 seit.
  49. ↑ Jakob Jud: Professor Louis Gauchat 12. Januar 1866 bis 22. August 1942. In: UniversitĂ€t ZĂŒrich. Bericht ĂŒber das akademische Jahr 1942/43, S.64–66.
  50. ↑ Louis Piat: Dictionnaire français-occitanien, donnant l'Ă©quivalent des mots français dans tous les dialectes de la langue d'oc moderne. NĂźmes 1893, 1894.
  51. ↑ Martin Lutta: Der Dialekt von BergĂŒn und seine Stellung innerhalb der rĂ€toromanischen Mundarten GraubĂŒndens. Halle/Saale 1923.
  52. ↑ Raymond Vieli: Die Terminologie der MĂŒhle in Romanisch-BĂŒnden. Chur 1927.
  53. ↑ Andrea Schorta: Prof. Dr. Louis Gauchat. In: Annalas da la Societad Retorumantscha, 1944, S. 140: «Ma bain la piu bella cumprova per la stretta uniun cha nöblezza da caracter e conscienza scientifica avaivan fat in sia persunalitĂ  ais il respet ch’el ha demuossĂ  per la lavur, per las nouvas ideas ed ils nouvs plans da seis collegas e scolars.»
Dr Artikel „Louis Gauchat“ isch einer vo de bsunders glungene Artikel.

Churz zÀmmegfasst, isch de Artikel sproochlig un stilistisch vorbildlich gschriibe, bhandlet alli wichtigi Aspekt vum Thema ussfierlich, isch sachlig korrekt un sorgfÀltig mit Quelle belait, glunge gstaltet un profilgrÀcht.

Alli sin hÀrzlich yyglade wyter aa dÀm Artikel z schaffe, z erwyytre un z verbessre!